УИХ-ын гишүүн Б.Энх-Амгалангийн ажлын албанаас нэгэн цахим уралдааныг зарлажээ. Тодруулбал, Б.Энх-Амгалангийн албан ёсны пэйж хуудаст лайк дарах, орсон мэдээллийг шэйр хийх, олон нийтэд хүргэх цахим уралдаан аж. Тус уралдаан нь  30 хоног үргэлжлэх бөгөөд уралдаанд оролцогчид дараах гурван үүргийг биелүүлэх ёстой гэнэ.  

-УИХ-ын гишүүн Б.Энх-Амгалангийн пэйж хуудсыг дагаж, нэгдэх,

-Хуудсанд тавигдсан мэдээ, постуудыг иргэд өөрийн хувийн хаягаар хуваалцах, олон хүнтэй групп рүү түгээх,

-Оруулсан мэдээ, мэдээлэл дор сэтгэгдэл бичсэн байх ёстой гэсэн гурван журмыг дагаж мөрдөх аж.

Тус уралдаанд амжилттай оролцож, Б.Энх-Амгалан гишүүний цахим хаягийг идэвхжүүлж, олон нийтэд түгээн дэлгэрүүлсэн, дагах хүнийг тоо өсгөсөн таван хүнийг шалгаруулж, мөнгөн шагналаар шагнах ажээ.

Төрийн мөнгийг үр ашиггүй зарцуулж байна хэмээн эл уралдааныг зарласан Б.Энх-Амгалан гишүүнийг буруутгах хүн олон байна. Тэгвэл бид түүнтэй холбогдож, дараах тодруулгыг авлаа.

          Тэрбээр “Би Говь-Алтай аймгийн МАН-ын дарга. “Цахим нам” хөтөлбөрийн хүрээнд хийх гэж байсан ажлыг ажлын албаныхан буруу ойлгож, намын даргынх нь нэрээр хийх юм байна гэж бодсон байна лээ. Тус уралдаан цуцлагдсан. Говь-Алтай аймгийнхаа гишүүдийг идэвхтэй болгож, зохион байгуулах гэж байсан ажлыг манай хүмүүс буруугаар ойлгосон гэсэн үг. Би Говь-Алтай аймгийн намын байр руу ярьж, ажлыг нь зогсоо гэж хэлсэн байгаа” гэв.