Завхан аймгийн Нэгдсэн эмнэлгийн халаалт тасарч, эмнэлэгт хэвтэн эмчлүүлж байгаа иргэдийн нөхцөл байдал хүнд байгаа талаарх зураг цахим орчинд хөврөөд байна.  Эл зурагтай холбоотойгоор Завхан аймгаас сонгогдсон УИХ-ын гишүүн Б.Баярсайхан тайлбар хийжээ.

            Тэрбээр “Завхан аймгийн Нэгдсэн эмнэлэгт дулаан тасарсан талаар аймгийн засаг Д.Түвшинжаргалтай холбогдлоо. Яагаад ийм асуудал гарав, маш яаралтай арга хэмжээ авах талаар ярилаа. Халаалтын зууханд доголдол гарсан, засахаар шуурхайлан ажиллаж байна гэсэн. Төрөх тасгийн барилга 2013-2014 онд ашиглалтад орсон шинэд тооцогдох барилга ч орсон цагаасаа эхлээд дулаан алдагдал ихтэй, асуудлуудтай тулгарчээ. Ажил гүйцэтгэсэн компани засаж жигдрүүлэх нэг жилийн хугацаандаа ирж засвар үйлчилгээ хийсэн ч дулаан алдагдал буураагүй байна. Миний байнга ярьж байгаа Завхан аймагт улсын төсвийн хөрөнгөөр чанаргүй барилга барьдаг нэг жишээ энэ.

Мөн дараагийн асуудал нь Улиастай суманд төвлөрсөн дулааны цахилгаан станц байдаггүй ба одоогийн байдлаар төсөвт байгууллагуудыг халааж байгаа хувийн 11 уурын зуух байна. Төрөх тасгийг халааж байгаа уурын зууханд доголдол үүсэж ээжүүд маань хүйтэнд тухгүйдэж, гам алдаж байна. Иймд нэг талаас дулаан алдагдалтай барилга нөгөө талаас төвлөрсөн дулааны системгүйгээс болж өнөөдрийн байдал үүсэж байна.

Завхан аймгаас сонгогдсон гишүүний хувьд удаа дараа чанаргүй барилгын асуудлыг гаргаж ирж, ярьж байгаа. Харин энэ удаад Эрчим хүчний сайдад хандаж БНСУ-ын хөнгөлөлттэй зээлээр 10 аймагт баригдахаар болсон "Дулааны цахилгаан станц"-тай холбоотой асуудлаар УИХ-ын гишүүний асуулгыг хүргүүлэх болно” хэмээжээ.