Засгийн газрын хуралдаанаар Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөрийг ажлаас нь чөлөөлж, УИХ-ын гишүүн асан Д.Ганболдыг томилжээ.

Хотын ерөнхий менежер асан Т.Гантөмөрийг “Камертон” хамтлагийн тоглолт зохион байгуулсан “Зайсан хилл”-тэй холбоотой асуудлаар чөлөөлсөн гэнэ. Хэдийгээр хариуцлага алдаж, албан тушаалаасаа чөлөөлөгдсөн гэж байгаа ч Т.Гантөмөрийг ирэх оны нэгдүгээр сарын 1-ээс үйл ажиллагаагаа явуулах Ойн агентлагийн даргаар томилох тохироо явагдсан байж болзошгүй гэнэ. 

Т.ГАНТӨМӨР ГЭЖ ХЭН БЭ

            Ерөнхий менежер Т.Гантөмөр нь 1959 оны есдүгээр сарын 18-нд төрсөн. Удирдахуйн ухааны доктор, Хүний их эмч, Улс төр судлаач, Төрийн удирдлагын менежер мэргэжилтэй. 1999-2004 онд Удирдлагын академи, 1997-1999 онд ТЗУХ институт, 1991-1993 онд Улс төрийн их сургууль, 1977-1982 онд Анагаах ухааны дээд сургууль, 2001 онд МУИС-Хууль зүйн сургуулийг төгссөн аж.  

Тэрбээр 2000-2004 онд Баянзүрх дүүргийн Засаг дарга, 2004-2008 онд Удирдлагын академийн докторант, багш, 2011-2012 онуудад Ерөнхий сайдын зөвлөх, 2008-2016 онд НИТХ-ын МАН-ын бүлгийн дэд дарга зэрэг албан тушаал хашиж байсан. 2016-2021 оны хугацаанд Улаанбаатар хотын Ерөнхий менежер бөгөөд Захирагчийн ажлын албаны даргаар томилогдон ажиллаж байсан.

Тэрбээр уулын модыг Улаанбаатарт шилжүүлэн суулгах ажлыг тэргүүлж ажилладаг хүний нэг билээ.