УИХ дахь АН-ын бүлгийн өнөөдрийн ээлжит хурлын мэдээллийг бүлгийн дарга Д.Ганбат, дэд дарга Н.Ганибал нар хийж байна.

 Энэ үеэр бүлгийн дарга Д.Ганбат "Намын бүлгийн хуралдаанаар хоёр асуудал хэлэлцлээ. Нэгдүгээрт, Жолоочийн даатгалын тухай хуулийн шинэчилсэн найруулгын төсөл, хоёрдугаарт, Жагсаал цуглаан хийх журмын тухай хуулийн нэмэлт, өөрчлөлтийн тухай хуулийн төслийг хэлэлцсэн. Мөн ирэх долоо хоногт Мөнгөний бодлого хэлэлцэнэ. Мөнгөний бодлого дээр койны асуудлыг бид хөндөж байсан. УИХ-ын ээлжит бус чуулганы хуралдаан хийхийг  ч сануулж байлаа. Тухайлбал, албан ёсоор хоёр их наяд, албан бусаар найман их наяд төгрөг койнд орчихсон юм билээ. Энэ бол ард түмний мөнгө. Үүнтэй холбоотой хууль эрх зүйн орчноо сайжруулмаар байна. Жолоочийн даатгал дээр ярилцлах зүйл байна. Нийт нэг сая жолооч бий. Харин 630 мянга гаруй хүн даатгалд хамрагдчихсан, 17 компани ажиллаж байна. Тэд хангалттай ажиллахгүй, шаардлага хангахгүй байгаа. Эрх баригчид байр сууриа илэрхийлэхгүй байна, тодорхой болго. Харин жагсаал цуглаан хийхийг Үндсэн хуульд тусгаж өгсөн. Энэ хууль бол Үндсэн хуультай нийцэхгүй байна. Хэрэв энэ даамжраад явбал цагдаа, иргэдийн хооронд мөргөлдөөн, эмх замбараагүй байдал үүсэх эрсдэлтэй байна. Хуулийн төсөл өргөн барихаар судалж, О.Цогтгэрэл гишүүн өргөн барьсан. Нөгөө талаас Н.Учрал гишүүн өргөн барьсан юм билээ. Нээлттэй сонсгол явуулах хэрэгтэй байна, үүнийг 35 гишүүн дэмжээд гарын үсэг зурсан" гэлээ.

УИХ-ын гишүүн Н.Ганибал "Жолоочийн даатгалын тухай хуульд зөрчилдөөнтэй асуудал бий. Хууль сахиулагч нар энэ хуулийг өргөн барихаасаа өмнө зохиомлоор даатгалын компанитай олон улстөрч улс төрд бий гэдэг ажлыг эхлүүлсэн. Энэ дундаа миний зургийг ч оруулаад явж байна лээ. Надад ямар нэг даатгалын компани байхгүй. Энэ нь олон нийтэд мэдээллээ буруу өгснөөс үүдэлтэй. АН хөрөнгийн зах зээл, даатгалын системийг сайн хөгжүүлэх нь зүйтэй гэсэн байр суурин дээр байгаа" гэлээ.