УОК, Засгийн газраас цаг үеийн асуудлаар мэдээлэл хийж байна. Энэ үеэр Ерөнхий сайд Л.Оюун-Эрдэнэ сэтгүүлчдийн асуултад хариуллаа.

-Хил хаасантай холбоотой эм, эмнэлгийн хэрэгсэл тасарсан байна. Энэ асуудлыг ойрын хугацаанд шийдэх боломж байна уу?

-Монгол Улсаас шалтгаалахгүй нөхцөл байдал үүссэн. БНХАУ-д цар тахал гарсан амаргүй цаг үе байна. Энэ нь манай улсын экспорт, импортын нөхцөл байдалд нөлөөлж байгаа. Тус улсад сүүлийн тохиолдол тэг бүртгэгдснээс хойш 21 хоногийн дараа хил гааль нээнэ гэсэн журам хүчин төгөлдөр үйлчилж байгаа. Бид байнга мэдээлэл солилцож байна. Эрээн хот ч  өөрөө хүнсний хомсдолд орчихсон байгаа юм билээ.

Бараа бүтээгдэхүүний хомсдол дэлхий нийтэд тулгамдсан асуудал болоод байна. Бид эм тариаг зэргийг агаарын нислэгээр татан авах талаар  ярьж байгаа. Дэлхий нийтэд инфляц нэмэгдэх төлөв ажиглагдаж байгаа. Учир нь тээвэр логистикийн асуудлаас үүдэлтэй хомсдол үүсчихсэн. Эндээс бид гарах ганцхан сонголт бий. Гол нэрийн бүтээгдэхүүнээ дотоодоос авах. Инфляцтай холбоотой асуудлаар ажлын хэсэг гаргаж ажиллаж байна. 

Эрүүл мэндийн сайд С.Энхболд

-Эрүүл мэндийн яамны дэргэд Эм, эмнэлгийн хэрэгсэл зохицуулах газар гэж байдаг. Энэ байгууллага, эмийн чанар, нөөц зэрэгт хяналт тавьдаг. Бид өнгөрсөн хугацаанд эм, эмнэлгийн байгууллагыг 1-2 сарын нөөц бүрдүүл гэсэн албан даалгавар өгсөн. Үүний хүрээнд эмнэлгийн тусламж үзүүлж байгаа эрүүл мэндийн байгууллагуудад  нөөцийн хомсдол үүсээгүй. Манай улс эм тарианы дийлэнхийг нь импортоор хангадаг. Бид эм тарианы нөөцийг яаралтай татан авах, тээвэр ложистикийн асуудлыг шийдэж, дан ганц Тэньжнийн боомт гэлтгүй бусад боомтоор татах ажлыг зохион байгуулж байна. Энэ сарын 1,2,3-нд Солонгос Улсаас эм, эмнэлгийн хэрэгслийн тээвэрлэж авч ирж байгаа. Манай улс нарти үйлдвэрлэдэг. Энэ үйлдвэр хэвийн үйл ажиллагаа явуулж байгаа. Гэхдээ өмнөх шигээ энэ үйлдвэр шаардсанаар нь их хэмжээгээр өгөхгүй. Хуваарилалт хийгээд явахад 14 хоногийн нөөц байна. Мөн эмнэлгийн хэрэгслийн сав баглаа боодол, түүхий эдийн татах ажлыг зохион байгуулж байна. Дахин хэлэхэд эмнэлгийн хэрэгсэл хосмдоогүй, бүх байгууллага хоёр сарын нөөцтэй.