Хууль зүйн байнгын хорооны хуралдаанаар Хүний хувийн мэдээлэл хамгаалах тухай хуулийн төслийг хэлэлцэх байсан. Тус хуулийн анхны хэлэлцүүлэг эхэлсэн ч Ардчилсан намын бүлгээс тав хоногийн завсарлага авч, хойшиллоо.

           Хуулийн төсөлтэй холбоотойгоор гишүүд байр сууриа илэрхийлэв. УИХ-ын гишүүн Н.Учрал “Манай улс 1995 онд Хувь хүний нууцын хуулийг баталсан байдаг. Нууцын хуулиар мэдээлэл хариуцагч хуулийн ямар ч хариуцлага хүлээдэггүй. Нэг үгээр, хувь хүн өөрөө мэдээллээ хамгаалахыг хуульчилсан байдаг. Гэтэл нөхцөл байдал дээр олон аргаар хувь хүний мэдээллийг цуглуулж байна шүү дээ. Хувь хүний мэдээллийг авч байгаа буюу мэдээлэл хариуцаж байгаа тал нь хариуцлагагүй байгаа нь зохимжтой бус. Тийм учраас Хувь хүний мэдээлэл хамгаалах тухай хуулиар хэрэв хэн нэгэн хувь хүний мэдээлэл цуглуулж, боловсруулж, ашиглаж байвал тухайн мэдээллийг бүрэн хариуцах ёстой. Таны цуглуулсан мэдээллээс ямар нэгэн мэдээлэл, баримт алдагдаж, хүний эрхэнд халдах, амь насанд аюул учрах, иргэний эрх ашиг зөрчигдсөн тохиолдолд мэдээллийг цуглуулсан тал хариуцлага хүлээж байх ёстой. Хүний эмзэг мэдээллийг цуглуулахгүй, ашиглахгүй, боловсруулахгүй байхыг хориглож, заалтад оруулна. Цаашид мэдээлэл хариуцагч хариуцлага хүлээдэг болно гэсэн үг” гэлээ.