УИХ-ын чуулганы нэгдсэн хуралдаанаар Төрийн албаны тухай хуульд нэмэлт, өөрчлөлт оруулах тухай болон хамт өргөн мэдүүлсэн хуулийн төслийн хэлэлцэх эсэхийг хэлэлцлээ. Хуулийн төсөлд төрийн албаны хүний нөөцийн удирдлагын чиг үүргүүд Засгийн газарт байх талаар Монгол Улсын Засгийн газрын тухай хуульд заасан зохицуулалтад нийцүүлэн төрийн албаны төв байгууллагын үндсэн чиг үүрэгт үл хамаарах бүрэн эрх, үйл ажиллагааг хасаж, төрийн жинхэнэ албаны ерөнхий шалгалтыг улиралд нэгээс доошгүй удаа зохион байгуулж байх зохицуулалтыг тусгажээ.

Хуулийн төсөлтэй холбоотой УИХ-ын гишүүн Ц.Туваан "Төрийн албан хаагчийн тоо 206 мянга болжээ. Энэ чинь нөгөө төрийн данхар бүтэцтэй болсон гэдгийг чинь шууд харуулж байна. 2016 онд төрийн албанд 170 гаруй мянган хүн байсан. Энэ тоо яг өнөөдөр хэд байна. 2012-2016 онд ажиллаж байсан хүмүүсийг намын харьяалал, ажилд орсон огноогоор нь нийт 30 мянган хүнийг хоморголон халсан байдаг. Төрийн албанд чадваргүй, хэн нэгний дэмжлэгээр ажиллаж буй хүн олон. Мөн нутгархах байдлаар ханддаг байдал төрийн албанд хавтгайрсан. Хуулийн үзэл баримтлалын шаардлагад, төрийн алба иргэдэд үйлчилдэг гэж байгаа. Эсрэгээрээ төрийн алба иргэдэд биш, эзэндээ үйлчилдэг болсон. Үүнийг хэрхэх зорилгоор хууль санаачлагчид хуульд тусгасан бэ. Үүний томоохон хохирогч Ардчилсан нам" гэлээ.

Энэ талаар УИХ-ын гишүүн Г.Тэмүүлэн "Энэ оны есөн сарын байдлаар нийт 206 мянган төрийн албан хаагч байна. Үүнээс  улс төрийн 3600, төрийн захиргааны 20650, төрийн тусгай албанд 45453, төрийн үйлчилгээний албанд 136 мянган хүн ажилладаг. Төрийн алба бүх ард түмний төлөө үйлчлэх ёстой. Нийтийн эрх ашгийн сонирхолд үйлчлэх ёстой. Төрийн алба нэг талдаа нийгмийн алба юм. Өнөөдөр Монголын нийгэмд улс төрийн алба илүү давамгайлж, нийгмийн албаас итгэлийг нь хөсөрдүүлэх болох маягтай байна. Тэгэхээр иргэд өөрсдөө үйлчлүүлэх ашиг сонирхлоо хамгаалуулах гэж сонгодог. Иймд шаардлага тавихаас өөр арга байхгүй. Монгол төрийн алба сүүлийн 10 жилийн дотор чадвар нь доройтож байна. Улс төрийн албан тушаалтнууд нь зарчимгүй, ёсзүйгүй, мэдлэг боловсролоороо ч тэнцэхгүй байна. Иймд бодлогын гажуудал, тогтолцооны алдаанд өөрчлөлт хийх ёстой гэж харж байна" гэв.