УИХ-ын дахь Ардчилсан намын бүлгийн дарга Д.Ганбат өнөөдөр нэр бүхий хоёр гишүүнийг бүлгийн гишүүнээс хасах шийдвэр гаргасан талаар танилцуулсан. Энэ талаар УИХ-ын гишүүн О.Цогтгэрэл, Н.Ганибал нар мэдээлэл хийлээ. 

УИХ-ын гишүүн О.Цогтгэрэл "С.Эрдэнэ, О.Баасанхүү гэдэг хүмүүс намын гишүүдийг намаас хаслаа гэдэг зүйл яриад байна. Ж.Батсуурь гишүүн Сүхбаатар аймагт 1990 оноос хойш ажиллаж, намаа ялалтад хүргэж байсан манлай болж буй гишүүн. УИХ-ын гишүүн Б.Бейсен ч мөн ялгаагүй дөрвөн удаа ИТХ-д сонгогдсон. Н.Ганибал, Ц.Туваан нарыг хөөсөн гэж байгаа. Энэ үйлдэл нь арваннэгдүгээр сарын 5-нд болох манай намын Эв нэгдлийн хурлыг хийлгэхгүй, хагалах зохион байгуулалттай үйл ажиллагаа. Энэ үйл хэрэгт манай намын Бүлгийн даргаар ажиллаж байгаа Д.Ганбат гишүүн оролцож байгаад харамсаж байна. 

Зарим хүн Л.Оюун-Эрдэнийн Засгийн газрыг огцруулах гарын үсгийг Д.Ганбат гишүүн манлайлж байсан Энэ ажлыг таслан зогсоох гэж Бүлгийн гишүүдийн олонх ийм үйлдэл хийлээ гэж гүтгэж байна. Засгийн газрыг огцруулах бичигт би хамгийн түрүүнд гарын үсэг зурж, гишүүд зурсан нь үнэн. Яг үнэндээ Ардын намын суганд хавчуулагдаж, энэ бичгийг авч очоод Л.Оюун-Эрдэнийн Засгийн газарт гурван суудал авна гэж ярьсан хүн нь Д.Ганбат гишүүн өөрөө. Л.Оюун-Эрдэнийн Засгийн газрыг огцруулах санааг худалдах гэж байгаагаа зогсоо гэж бид удаа дараа хэлсэн" гэлээ.