Хууль зүй, дотоод хэргийн яамны сайд Х.Нямбаатар Замын-Үүд-Эрээн боомтын талаар мэдээлэл хийлээ. Тэрбээр "Эрээнд коронавирусийн халдвар гарсан учраас тодорхой хугацаагаар Замын-Үүд, Эрээний боомтыг хаасан. Энэ асуудлаар Гадаад харилцааны яам холбогдох шугамаар харилцаж байгаа. БНХАУ-ын Эрээн боомт бол манай улсын экспортын хамгийн том гарц. Одоогоор манайхаас ямар нэгэн дүрэм зөрчсөн тохиолдол гараагүй. Энэ бол тухайн улсын дотоодын асуудал учир манай улсад тодорхой хариу өгөх байх.

Урьдчилсан байдлаар бидний олж сонссон мэдээлэл бол дотоодод нь халдвар гарсан гэсэн мэдээлэл бий. Боомт нэгэнт хаагдсан учраас ачаа тээвэрлэлт, экспорт, импорт зогссон. Энэ хүрээнд түргэн муудах зэрэг хүнсний бараа бүтээгдэхүүнд эрсдэл учрахыг тооцож байна. Мөн Монгол Улсын Ерөнхий сайд, Хятад Улсын Ерөнхий сайдтай уулзалт хийсэн. Ингэхдээ энэ асуудалд хоёр талаасаа хүчин чармайлт гаргаж ажиллахыг ярьж байгаа.  Ер нь гадаад яамны шугамаар тодорхой мэдээлэл ирнэ" гэлээ.