УИХ-ын гишүүн П.Анужин, Д.Өнөрболор, Х.Ганхуяг, Х.Булгантуяа нар Хөрөнгө оруулалтын тухай хуульд нэмэлт, өөрчлөлт оруулах хуулийн төсөл өргөн барьж, өнгөрсөн пүрэв гарагт УИХ-аар хэлэлцүүлсэн. Дээрх хуулийн төслийн 12.1.6-т тусгасан “гадаадын хөрөнгө оруулагч, түүний гэр бүл Монгол Улсад хувийн хэргээр оршин суух хүсэлт гаргасан тохиолдолд 50 мянган америк доллар буюу түүнтэй тэнцэх хэмжээний төгрөгөөс дээш хөрөнгийг Монгол Улсад хөрөнгө оруулалт хийснийг үндэслэн оршин суух эрх олгох” гэсэн заалт нь олны шүүмжлэлд өртөж, маргаан дагуулаад буй. 

    Улмаар хуулийн төсөл өргөн мэдүүлсэн П.Анужин, Д.Өнөрболор нарын гишүүд хуулийн төсөлд гарын үсэг зураагүй, анх боловсруулахад ийм заалт байгаагүй гэдэг байр суурийг илэрхийлээд буй. Тэгвэл УИХ-ын гишүүн П.Анужин хуулийн төслийг эргүүлэн татах санал гаргаснаа мэдэгджээ. Тэрбээр "Хууль санаачлагч, боловсруулагч Х.Ганхуяг гишүүн, хуулийн үзэл баримтлал, санаачлагчдын ярилцаж тохиролцсоноос өөр агуулга бүхий заалт оруулсан тул, хуулийн төслийг татан авах саналаа хүргүүллээ. Гэвч, хууль санаачлагчдийн олонхын саналаар төсөл эргүүлэн татагддаг тул бусад гишүүдийн саналыг харах үлдлээ" гэжээ.