УИХ-ын чуулганы нэгдсэн хуралдаан эхэллээ. Хуралдаанаар Хөрөнгө оруулалтын тухай хуульд өөрчлөлт оруулах тухай, Хуулийн этгээдийн Улсын бүртгэлийн тухай хуульд өөрчлөлт оруулах тухай хуулийн төслийн анхны хэлэлцүүлгийг хийж байна. Хуулийн төслийн танилцуулгыг хууль санаачлагч Х.Ганхуяг танилцуулсан. 

Хуулийн төсөлтэй холбоотой гишүүд асуулт асууж, хариулт авч байна.

УИХ-ЫН ГИШҮҮН Ж.СҮХБААТАР: Гаднын хөрөнгө оруулалтыг 50 мянган ам.доллар болгож багасгасан байна. Ийм болговол манай улсад орж ирэх үр өгөөж нь юу байна вэ. Энэ асуудлыг хөрөнгө оруулалт эдийн засгийн талаас нь хараад байх шиг байна. Энэ бол бага хөрөнгө оруулалт шүү дээ. Цаашид хууль бусаар оршин суугаа иргэдийг хөрөнгө оруулагч гээд амьдруулна гэсэн үг юм уу.

УИХ-ЫН ГИШҮҮН Х.ГАНХУЯГ: 2013 онд Хөрөнгө оруулалтын тухай хуулийг баталсан. Энэ хуульд гадаад, дотоод гэж хөрөнгө оруулагчийг ялгахгүй гэж заасан. Гэтэл гаднын хөрөнгө оруулагчид 100 мянган ам.долларын босго тавьчихсан юм. 2013 оноос хойш гаднын хөрөнгө оруулалт бүхий компани багасан. Монгол Улсад хөрөнгө оруулалтын хэмжээгээр нэгдүгээрт Канад Улс, хоёрдугаарт БНХАУ жагсаж байна. Монголд үйл ажиллагаа явуулж буй гадаадын хөрөнгө оруулагч нараас гомдол ирэх тохиолдол байдаг. Мөн 100 мянган ам.долларыг түр дансанд байршуулдаг. Энэ нь ФАТФ-ын саарал жагсаалтад ороход нөлөөлж байгаа. Өнгөрсөн 2020 онд Монголд гадаадын хөрөнгө оруулалтай 70 компани байгуулсан. Энэ бол маш бага тоо. Хөрөнгө оруулагч болгон 100 мянган ам.доллар байршуулах ёстой болдог. Энэ нь эргээд асуудал үүсгэж байна. Дээр нь монгол залуус гаднын хөрөнгө оруулагчтай хамтарч ажиллах гэхээр мөнгө төлөх болчихоод байдаг. Энэ нь хүндрэл үүсгэж байна. Цаашдаа старт-апууд хөгжих, хөрөнгө оруулалт авахад хүндрэл үүсгэдэг.