Үйлдвэржилтийн бодлогын байнгын хорооны хуралдаанаар УИХ-ын гишүүн Г.Тэмүүлэнгээс Шадар сайд С.Амарсайханд хандан тавьсан Газрын тос боловсруулах үйлдвэрийг дэмжих тухай хуулийн хэрэгжилт болон Дорноговь аймгийн Алтанширээ суманд баригдаж буй газрын тос боловсруулах үйлдвэрийн бүтээн байгуулалтын явцын талаарх асуултын хариуг сонсож байна.

 

Энэ үеэр “Монгол газрын тос боловсруулах үйлдвэр” ТӨХХК-ийн Гүйцэтгэх захирал Д.Алтанцэцэг "Газрын тос боловсруулах үйлдвэр анх техник эдийн засгийн үндэслэл боловсруулж, уул уурхайн хүнд үйлдвэрийн яамны эрдэс баялгийн мэргэжлийн зөвлөлөөр батлуулахад 2018 оны арванхоёрдугаар сард ашиглалтад орох байсан. Түүнээс хойш үйл ажиллагаагаа тасралтгүй явуулж ирсэн. Газрын тос боловсруулах үйлдвэр үндсэн 12 технологийн байгууламжтай. Энэ нь тус бүрдээ нэг үйлдвэр гэсэн үг. 2018 оны сүүлчээр 2023-2024 онд барилгын ажлыг дуусгана гэж тооцоолж байсан.  Гэсэн ч Монгол Улсаас энэ үйлдвэрт нийлүүлэх бараа материал, техник тоног төхөөрөмж  алга. Бетоноос бусад гол бүх материалыг гаднаас авч байна.

 

Газрын тос боловсруулах үйлдвэрийн барилга угсралтын ажлыг 2025 онд дуусгахаар ажиллаж байна. Цар тахлын хүнд цаг  үед энэхүү бүтээн байгуулалт явагдаж байна. Маш чухал ажил болох инженерийн ажил гурван жил үргэлжилсний эцэст дуусах шатандаа орсон. Лиценз технологийн ажлаас бусад нь дууссан. Инженерийн ажлыг хийхэд оролцсон АНУ-ын 13 компани, Энэтхэгийн найман компани бий. 

 

2020 оны хавраас эхлэн Монгол Улс  хөл хорио тогтоосон. Үүнээс шалтгаалж, инженерийн зураг төслийн ажил  хойшилсон. Бид үйлдвэрийн бүтээгдэхүүний гарцыг тодорхойлохдоо 2016-2019 оны хоорондох зах зээлийн судалгаанд тулгуурласан. Ингэхдээ 60 хувь нь дизель бүтээгдэхүүн. Бусад төрлийн шатахуун дундаас зөвхөн АИ-95 шатахуун үйлдвэрлэнэ. АИ-92, АИ-98  шатахуунаас татгалзсан.  АИ-98 зах зээлийн нэг хүрэхгүй хувийг эзэлдэг мөртлөө үйлдвэрлэхэд ажиллагаа ихтэй байсан. Үйлдвэр шингэрүүлсэн шатдаг хий, авто бензин, онгоцны түлш, дизель, зуухны түлш үйлдвэрлэнэ. Үйлдвэрээс гарах бүтээгдэхүүн зах зээлийн үнээс хамаагүй хямдхан байна" гэх мэдээллийг өглөө.