Ерөнхийлөгч У.Хүрэлсүхийн санаачлагаар тэрбум мод тарих үндэсний хөдөлгөөн өнөөдрөөс албан ёсоор эхэлж байна. Тэрбум мод тарих үйл ажиллагааг нээж, анхны модны суулгацыг Ерөнхийлөгч У.Хүрэлсүх өөрөө тарилаа.

Энэ үеэр тэрбээр "Өнөөдрөөс мод тарих бус тарьж ургуулна гэж хэлж заншъя. Бид мод зүгээр тарихгүй ургуулах болно гэдгээ хэлмээр байна. Эрдэнэт үйлдвэр 100 сая мод тарих сайхан мэдээ бидэнд дуулгасан. Энэ мэтчилэн олон байгуулага, хамт олон  биднийг дэмжиж ажиллахаа илэрхийлээд байна. 

Аж ахуйн нэгж, үйлдвэрүүдийг мод тарих үйл ажиллагаанд дэмжиж оролцохыг уриалж байна. Энэ өвөл бид мод тарих үйл явцыг бэлтгэнэ. Монгол Улсын нийт газар нутгийн 75 хувь нь цөлжилтөд нэн хүчтэй өртөж, бэлчээрийн доройтолд орсон. Энэ бүх газрыг сэргээх хэрэгтэй маш олон ажил биднийг хүлээж байна. Бид найман настнаас 80 настан хүртлээ байгаль эхээ хамгаалдаг, арчилдаг ард түмэн болно. Бүс нутаг сумдын хүрээнд  цэцэрлэгт хүрээлэн байгуулах үйл ажиллагааг хэрэгжүүлнэ. Модоо тэрбум тэрбумаар нь тарьж улсаа ногоон улс болгох зорилт тавьсан’’ гэлээ.