Засгийн газар 2022 оны төсвийн төслийг боловсруулж, өнөөдөр УИХ-д хуралд өргөн барьлаа. 2022 оны төсвийн төслийн талаар Сангийн сайд сэтгүүлчдэд мэдээлэл хийсэн юм. Тэгвэл ирэх оны төсвийн төслийг хэрхэн боловсруулсан талаарх товч мэдээллийг хүргэе.

Цар тахлын нөхцөл байдлаас шалтгаалж, 2021 онд манай улсын эдийн засаг 4.1 хувийн өсөлттэй гарсан. Тэгвэл ирэх онд эдийн засгийн өсөлтийг таван хувьд хүрнэ гэж тооцоолсон байна. 2022 оны төсвийг цар тахлын үед унасан эдийн засгаа сэргээх зорилготой боловсруулсан гэдгийг Сангийн сайд онцлов. Ингэхдээ хөгжлийн төслүүдийг эхлүүлж, экспортыг нэмэгдүүлэх, хөрөнгө оруулалтыг дэмжих замаар эдийн засгаа сэргээх юм байна.

Түүнчлэн ирэх жил урсгал зардлуудыг танаж, төсвийн орлогоо бүрдүүлэх төсөл боловсруулсан байна. Өнөөдрийн байдлаар төрийн албанд 192 мянга гаруй төрийн албан хаагч ажилладаг бөгөөд үүний 50 мянга нь үйлчилгээний албан хаагч гэсэн тоон судалгаа гарчээ. Ирэх жил үйлчилгээний алба хаагч нарын орон тоог цөөлж, хувийн хэвшлүүдтэй хамтран  ажиллах зорилго тавьсан байна. 2022 оны төсөвт 12.1 тэрбум төгрөгийг урсгал зардлаас хэмнэх боломжтой гэж тооцоолжээ. Тодруулбал,

• Төр захиргааны байгууллагуудад тавилга худалдан авах, зочин төлөөлөгч хүлээн авах, гадаад томилолт, сургалт семинар, уралдаан тэмцээн зохион байгуулах зардал олгохгүй
• Албан контор шинээр барихгүй, тусгай чиг үүргээс бусад байгууллага авто машин худалдаж авахгүй
• Сайд нэгээс илүүгүй зөвлөх туслахтай байх, төрийн нарийн бичгийн дарга нар дундаа нэг туслахтай байх,
• Төрийн захиргааны байгууллагууд авто машин хэрэглэхгүй, Зайлшгүй шаардлагатай бол хувийн хэвшлээс түрээсээр ашиглах
• Төсвийн хөрөнгөөр кино хийхгүй, ой тэмдэглэхгүй, ном хэвлүүлэхгүй, шагнал гардуулахгүй
• Төр автомашин худалдан авахгүй 
• Засгийн газрын агентлаг нэг дэд даргатай байна, дарга нь зөвлөхгүй  ажиллах зэрэг өөрчлөлтийг тусгасан байна. Мөн цахим гарын үсгийг нэвтрүүлж, түгжрэлийг 10-15 хувиар бууруулна гэж тооцоолжээ.

Мөн ирэх онд түүхийн эдийн үнэ харьцангуй тогтвортой байна гэж тооцоолж,  36.7 сая тонн нүүрс экспортлох зорилт тавьсан байна.