Баянзүрх дүүрэгт оршин суух хаягтай М нь 2013 оны аравдугаар сарын 31-нд гэрээсээ гараад сураггүй болсон. Энэ талаар ар гэрийн хэн нь цагдаагийн байгууллагад тэмдэглүүлснээр хэрэг нээн, шалгасан ч олж чадаагүй юм. Харин үүнээс хойш долоон жилийн дараа М-ын амийг Г гэгч нь хөнөөсөн болох нь тогтоогдсон байдаг. Сэжигтэн цогцсыг хашаандаа байрлах гүний худагт хийж булсныг Эрүүгийн цагдаагийн албанаас илрүүлэн шалгаж байгаа. Эл хэргийн талаар бид өмнө нь сурвалжлан хүргэсэн билээ. Энэ удаад сэжигтэн Ц.Г-ын дүү Ц.Цэрэндуламаас зарим зүйлийг тодрууллаа.

-Та хэргийн талаар яаж мэдсэн бэ. Ахтайгаа хамгийн сүүлд хэзээ уулзсан бэ?
-Ах бид хоёр 2013 оноос хойш холбоо тасарсан. Хаана, юу хийж яваа нь мэдэгдэхгүй гурван жил орчим алгаболсон. Харин 2016 онд манай гэрт ирэхдээ ядарч яваа бололтой, хүн харах аргагүй болтлоо дордчихсон ирсэн. Түүнээс хойш дотно харилцаатай байсан. Гэхдээ бид хамт амьдардаггүй байсан юм. Хааяа л манай зуслан дээрирдэг. Бид уулзаагүй удаж байна. Телевизээр л ийм хэрэг болсон гэдгийг мэдсэн.

-Тэгэхээр ахыгаа саатуулагдсанаас хойш уулзаагүй гэсэн үгүү?
-Тиймээ. Хэрэг нь Баянзүрх дүүргийн III хэлтэсрүү шилжсэн гэсэн. Ажлын өдөр эхлэхээр тэндээс нэг албан бичиг аваад уулзах боломжтой юм билээ. Очиж уулзах гээд төлөвлөчихсөн байгаа. Хэргийн талаар юу ч сонсож байгаагүй. Өөрөө хэргээ хүлээсэн эсэхийг нь ч мэдэхгүй.

-Хашаандаа худаг байдаг гэдгийг мэддэг байсан уу. Тэр хашаа нь одоо таны нэр дээр байдаг юм билээ?
-Өмнө нь манай ах амьдардаг байсан. 2013 оноос хойш тэр хашаанд хэн ч амьдраагүй байж байгаад сүүлийн нэг жил айлд түрээслүүлсэн. Түүнээс хүмүүсийн яриад байгаа шиг хашаагаа зарж, нэрээ хүртэл сольсон зүйл байхгүй. Миний хувьд хэдэн жилийн өмнө л тэр хашаанд очиж байсан. Хашаан дотор цогцос бүү хэл худаг байсан гэдгийг ч мэдээгүй, анзаараагүй.