“Ковид-19” цар тахлын эсрэг дархлаажуулалтыг дэлхий даяар идэвхтэй өрнүүлж байгаа. Монгол Улсад өнгөрсөн хоёрдугаар сарын 23-наас вакцинжуулалтыг эхэлсэн. Манай оронд Их Британийн Оксфордын их сургууль болон Шведийн “АстраЗенека” компанийн хамтран бүтээсэн астразенека, АНУ-ын “Пфайзер” компанийн вакцин, ОХУ-ын “Гамалея” төвийн спутник-в, БНХАУ-ын “Синофарм” үйлдвэрийн вероселл вакциныг дархлаажуулалтдаа ашиглаж байна.

Монгол Улсад дархлаажуулалт эхлэхтэй зэрэгцэж, өнгөрсөн хоёрдугаар сарын 23-нд Монгол Улсын Ерөнхий сайд Л.Оюун-Эрдэнэ коронавирусийн эсрэг асразенека вакцины эхний тунг тариулж байлаа. Түүнээс хойш гуравдугаар сарын 10-ны өдөр  УОК-ын дарга, Шадар сайд С.Амарсайхан, нийслэлийн Засаг дарга бөгөөд Улаанбаатар хотын захирагч Д.Сумъяабазар нар “Синофарм” үйлдвэрийн вероселл вакциныг тариулсан.

-Хамгийн сайн чанарын, ДЭМБ-д хүлээн зөвшөөрөгдсөн вакцинуудыг дэлхийн удирдагчид “таалж” байна-

           -АНУ-ын Ерөнхийлөгч Жо Байден өнгөрсөн 2020 оны арванхоёрдугаар сарын 22-нд коронавирусийн эсрэг пфайзер вакцины эхний тунг тариулж, ард иргэдээ уриалсан.

           -Герман Улсын Ерөнхийлөгч Франк-Вальтер Штайнмайер өнгөрсөн дөрөвдүгээр сарын 1-нд астразенека вакцины эхний тунд хамрагдсан.

           -Мексик Улсын Ерөнхийлөгч Андрес Мануэль Лопес Обрадор өнгөрсөн гуравдугаар сарын 30-нд Шведийн АстраЗенека компанийн вакцинжуулалтад хамрагдсан.

           -Аргентин Улсын Ерөнхийлөгч Алберто Фернандез өнгөрсөн нэгдүгээр сард ОХУ-ын “Гамалея” төвийн спутник-в вакцинд хамрагдсан ч дөрөвдүгээр сарын 5-нд PCR шинжилгээнийх нь хариу эерэг гарчээ.

           -Серби Улсын Ерөнхийлөгч Аленксандр Вучич бусад орны удирдагчаас өөр сонголт хийж, Хятадын “Синофарм” үйлдвэрийн вакцинд бүрэн хамрагдав.

           -Өнгөрсөн гуравдугаар сарын 19-нд Их Британийн Ерөнхий сайд Борис Жонсон астразенека вакциныг тариулсан.

           -Канад Улсын Ерөнхий сайд Жастин Трюдо өнгөрсөн дөрөвдүгээр сарын 23-нд астразенека вакцины эхний тунд хамрагдсан.

           -ОХУ-ын Ерөнхийлөгч Владимир Путин хэвлэл мэдээлэлд ил бус, нотлох баримтгүй вакцинжуулалтдаа хамрагдсан. Энэ тухайгаа тэрбээр дөрөвдүгээр сарын 14-нд өөрийн орныхоо спутник-в вакциныг тариулсан хэмээжээ.

           -Австрали Улсын Ерөнхий сайд Скотт Моррисон хоёрдугаар сарын 21-нд коронавирусийн эсрэг астразенека вакцины эхний тунгаа тариулсан.

           -Бразил Улсын Ерөнхийлөгч Жеир Болсонаро “Би аль ч “Ковид-19” цар тахлаас урьдчилан сэргийлэх вакцин тариулахгүй” тухайгаа иргэддээ мэдэгдэв.

           -Япон Улсын Ерөнхий сайд Ёшихидэ Сүга өнгөрсөн гуравдугаар сарын 16-нд ДЭМБ-ын анхны зөвшөөрлийг авсан, АНУ-ын пфайзер вакцинд хамрагдсан.

           -Английн хатан хаан II Элизабет коронавирусийн эсрэг вакцинжуулалтдаа хамрагдсан талаараа мэдэгдэж, ард иргэдээ ч уриалан дуудсан. Гэвч хатан хааны тариулсан вакцин нь одоог хүртэл тодорхойгүй байгаа юм.

           -Өмнөд Солонгос буюу БНСУ-ын Ерөнхийлөгч Мүүн Жэ Ин гуравдугаар сарын 23-нд астразенека вакцинд хамрагдсан.

           -Энэтхэг Улсын Ерөнхийлөгч Рам Натх өнгөрсөн гуравдугаар сарын 3-нд эх орондоо бүтээж, үйлдвэрлэсэн “Бхарат БиоНТех” үйлдвэрийн вакцинд хамрагдсан юм.

Дээрх баримтуудаас харахад дэлхийн хамгийн нөлөө бүхий орнуудын удирдагчид ДЭМБ-аас “Яаралтай тусламжийн үед ашиглах” зөвшөөрөл авсан, хүний биед өндөр эерэг хувь үзүүлж байгаа коронавирусийн вакциныг сонгожээ.