Тулгар төрийн 2233 жил, Их Монгол Улс байгуулагдсаны 818 жил, Ардын хувьсгалын 103 жилийн ойн баяр наадам үргэлжилж байна. Энэ удаагийн үндэсний их баяр наадам өнгөрсөн жилүүдийг бодвол цар тахалгүй, эдийн засгийн хүнд дарамтгүй, үер усны аюулгүй болж байгаа бөгөөд үүнийгээ даган гаднаас ирэх жуулчдын тоо эргэн сэргэжээ. Тухайлбал, Монголд анх удаа ирж буй жуулчид эрс тэс уур амьсгал, соёл уламжлал, үндэсний хоолноос гадна монгол хүмүүсийн тухай онцлон ярьж байна. Ингээд уншигч танд үндэсний их баяр наадам үзэж, сонирхохоор ирсэн жуулчдын сэтгэгдлийг хүргэе.

Бельгиэс ирсэн МАРК: Монголд ирэх хүртлээ ийм аюулгүй, хүмүүс нь тийм нөхөрсөг гэдгийг мэддэггүй байсан

      Монгол ирээд тав хонож байна. Монголчууд үнэхээр нөхөрсөг санагдсан. Соёл уламжлал, үндэсний хоол гээд сайхан байсан. Одоо наадам үзэх гээд ирсэн байна. Удахгүй орон нутаг руу, говь руу яваад, буцаж Улаанбаатарт ирээд нутаг буцна.

       Надад Монгол үнэхээр аюулгүй орон шиг санагдсан. Гадуур явахад их олон цагдаа байгаа харагдах ч Европынхоос өөр. Европт цагдаа нар бүгдээрээ буу, зэвсэг авч яваа харагддаг шүү дээ. Харин монгол цагдаа нар ямар нэгэн зэвсэггүй явж, бусдад нөхөрсөг хандаж, тусалж байсан. Бас би саяхан бөх үзэж байгаад цэнгэлдэх дотор шүхрээ орхичихсон юм. Харин буцаад очтол шүхэр маань яг байсан газраа байсан. Тиймээс л надад Монгол үнэхээр аюулгүй орон шиг санагдаж байна. Түүнээс биш энд ирэх хүртлээ ийм аюулгүй, хүмүүс нь ийм нөхөрсөг гэдгийг мэддэггүй байсан. 

       Монголд ирэх болсон өөр нэгэн шалтгаан маань Чингис хааны хөшөөг харах. Би хүн төрөлхтөн өнөөг хүртэл юу туулж ирснийг мэдэхийн тулд түүхийн ном их уншдаг, унших дуртай. Тиймээс Монголд түүх мэдэх гэж ирсэн. Бид монгол хөтөчтэй яваа. Хөтөч маань бидэнд түүх, соёлынхоо талаар тайлбарлаж өгсөн. Буцах болтол бага хугацаа байгааг мэдэж байна. Гэхдээ энэ хугацаанд мэдэхийг хүссэн түүхийнхээ талаар сайн сурч чадна гэж найдаж байна. Монголд ирсэндээ үнэхээр баяртай байна.

Их Британиас ирсэн ЖЭЙМС: Улаанбаатарын замын хөдөлгөөнд оролцох хүндрэлтэй байгаагаас бусдаар үнэхээр гайхалтай байна

     Монголд ирээд хоёр долоо хонож байна. Энд ирснээсээ хойш төв, говь руу явж ирээд, өчигдөр наадмын бяцхан үйл ажиллагаанд оролцож үзсэн. Харин өнөөдөр наадмын үндсэн үйл ажиллагааг үзэхээр ирээд байна. Үнэхээр гайхалтай.

       Монголын хөдөө үнэхээр үзэсгэлэнтэй байсан. Хүмүүс нь ч мөн адил нөхөрсөг, уриалгахан хүлээж авч байсан нь үнэхээр сайхан байлаа.

       Гайхалтай, өнгөлөг, үнэхээр зугаатай байлаа. Саяхан бороо орлоо. Бороо зогсохыг хүлээх жаахан хүндрэлтэй байсан. Бас Улаанбаатарын замын хөдөлгөөн хаашаа ч явсан түгжирч, их хугацаа зарцуулж байсан нь хэцүү байсан.

АНУ-аас ирсэн ЖАМБОРЫН ГЭР БҮЛ: Охидод маань монгол гэрт амьдрах үнэхээр таалагдсан гэсэн

       Үнэхээр гайхалтай байлаа. Монгол үнэхээр сайхан байна. Хүмүүс нь, үнэхээр монгол хүмүүс хамгийн сайхан санагдсан. Монголчууд үнэхээр нээлттэй хүлээж авч, нөхөрсөг байж, өөрсдийн соёлоо бидэнд тайлбарлах гэж хичээж байгаад үнэхээр их талархаж байна. 

       Бид Чингис хааныг их эртнээс мэднэ шүү дээ. Чингис хааны тухай олон ч зүйл мэднэ. Гэхдээ өнөөдрийн Монгол Улс ямар байгааг мэддэггүй байлаа. Хүн амын тал хувь нь Улаанбаатар хотод амьдардагийг мэдсэн. Тэгээд энэ хотод хэр олон хүн амьдардаг, орон нутаг нь хэр сэлүүхэн байгааг үзэх сонирхол төрсөн. Бидний хэрхэн амьдардгаас тэс өөр шүү дээ. Тиймээс л Монголыг үзэх хүсэл эрхгүй төрсөн.

       Бид саяхан нүүрэн дээрээ зураг зурууллаа. Охид маань Монголд амьдрах үнэхээр хөгжилтэй гэж байгаа. Ялангуяа монгол гэрт амьдрах үнэхээр таалагдсан гэсэн. Тийм болохоор Монголд байх төлөвлөгөөгөө бага зэрэг сунгаж, гэр бүлээрээ аялахаар төлөвлөж байна.