Их Британид бүртгэлтэй, Англи-Шведийн хамтарсан “AstraZeneca” компани Оксфордын их сургуультай хамтран коронавирусийн эсрэг вакциныг клиник шатанд туршиж буй. Вакцины туршилтад оролцсон сайн дурын нэг гишүүн олон склероз буюу тархи, нугасны зөөлөн эдийн гэмтэлтэй болсон нь оношлогдсон тухайэнэ сарын эхээр компанийн тайланд дурдсан бол Оксфордын их сургуулийн цахим хуудсанд энэ тухай “Мэдрэлийн өвчний шинж тэмдэг илэрсэн” гэж онцолжээ. Үүний дараа мөн туршилтад оролцсон бас нэгэн хүнээс мэдрэлийн эмгэгийн шинж тэмдэг илэрсэн гэх мэдээлэл гарав. 

АНУ-ын эрүүл мэндийн байгууллага, хяналтын алба нэгж энэхүү вакцины туршилтыг үргэлжлүүлэх асуудлыг хэлэлцэх зуур  туршилтын тунг тариулсан хоёр хүнээс  мэдрэлийн гаралтай өвчин оношлогдсон нь тохиолдол уу, эсвэл вакцины сөрөг нөлөө юү гэдэг асуултад хариу эрж байна. Үүний сацуу Йелийн их сургуулийн анагаах ухааны профессор Харлан Крумгольц “АстраЗенека”-гаас гаргасан тайлан болон Оксфордын их сургуулийн мэдээллийг харьцуулсны дүнд мэдээллүүд хоорондоо зөрүүтэй байгааг онцолсон юм. 

Тохиолдол уу 

“АстраЗенека” вакцины туршилтыг Их Британид үргэлжлүүлэн явуулж байгаа бөгөөд АНУ-д удахгүй сэргээнэ гэж компанийн удирдлага мэдэгдэж байна. АНУ-ын Хүнсний бүтээгдэхүүн, эм бэлдмэлийн хяналтын газар энэ талаар ямар нэгэн тайлбар хийгээгүй. Юутай ч вакцины туршилтад оролцсон бусад хүнд төстэй шинж тэмдэг илэрсэн, эсэхэд нарийн хяналт тавих шаардлагатайг эмч, судлаачид онцолж байгаа юм. Оксфордын их сургуулийн цахим хуудсанд мэдээлснээр, энэ сарын 12-ны байдлаар тус вакцины туршилтад 18 мянган хүн хамрагдсан бөгөөд ийм далайцтай, олон хүн оролцсон туршилтын явцад зарим нэг оролцогчдоос сөрөг нөлөө илрэх боломжтой гэнэ. Харин аюулгүй байдлын үүднээс тохиолдол бүрийг нарийвчлан судлах ёстой гэж тус сургуулийн мэдээлэлд онцолжээ.

Зөрүүтэй мэдээллүүд

“АстраЗенека”-гийн вакцины туршилтад оролцсон хоёр хүнд мэдрэлийн өвчин илэрсэн тухай мэдээлэл энэ сарын эхээр гарсан. Гэхдээ туршилтад оролцогчдод илгээсэн мэдээлэл бүхий захидалд чухам хэдэн хүнд ийм өвчин илэрснийг тодорхой дурдаагүй. Энэ талаар CNN  дээрх байгууллагуудаас тодруулахад ч хариулахаас татгалзсан. Судлаачдын таамаглаж буйгаар, өнгөрсөн долоон сард өвчний шинж тэмдэг илэрсэн байх магадлалтай. Өнгөрсөн долдугаар сард аюулгүй байдлын үүднээс вакцины туршилтыг түр “завсарласан” гэх мэдээлэл ч байна.

Гэтэл өвчтөний биеийн байдал, оношийн талаар энэ сарын 9 хүртэл “таг чиг” байсан нь хачирхалтай. Түүнчлэн туршилтад оролцогчдод илгээсэн захидлын хамгийн эхний хувилбарт туршилтад оролцсон хүнд нугасны үрэвсэл илэрсэн гэж бичсэн байжээ. Энэ мэт зөрүүтэй, тодорхой бус мэдээллийг өгч байсан нь эрдэмтэд, бусад судлаачийн анхаарлыг татаж байна. Вакцин зохион бүтээгчид туршилтад оролцогчдын аюулгүй байдал, хувийн мэдээллийг хамгаалах зорилгоор зарим нэг дэлгэрэнгүй мэдээллийг өгч чадахгүй гэсэн тайлбар хийсэн.

“Завсарлага”

Энэ сарын 8-нд “АстраЗенека” компани, Оксфордын их сургууль туршилтад орсон хоёр хүнд “үл мэдэгдэх өвчин” илэрсэн тул туршилтыг дэлхий даяар зогсоож буйгаа мэдэгдсэн юм. Үүнээс дөрөв хоногийн дараа Их Британид туршилтыг сэргээсэн бөгөөд Эмнэлгийн хэрэгсэл, эм бэлдмэлийн хяналтын агентлаг мэдээллийг нягталж шалгасан гэж мэдэгдсэн. Үүний сацуу дээрх хоёр хүнд илэрсэн өвчин коронавирусийн вакцинтай хамааралгүй гэдгийг батлах, тайлбарлахыг судлаачид шаардсаар байна. 
Эх сурвалж: CNN, Euronews