АНУ-ын төрийн тэргүүнээр дахин сонгогдсон Дональд Трамп өнөөдөр Ерөнхийлөгчийн тангаргаа албан ёсоор өргөсөн. Тэгвэл тангараг өргөснөөсөө хойш Ерөнхийлөгч Д.Трамп өмнөх Ерөнхийлөгч Жо Байдены гаргасан 78 зарлигийг хүчингүй болгох тухай баримт бичгүүдэд гарын үсэг зурсан байна. Мөн өмнөх Ерөнхийлөгчийн шийдвэрийг цуцлахаар гадна хууль бус цагаачлалтай тэмцэх, АНУ-ыг Парисын уур амьсгалын хэлэлцээр болон ДЭМБ-ын бүрэлдэхүүнээс гаргах холбоотой бусад баримт бичигт гарын үсэг зуржээ.

Түүнчлэн АНУ-ын Ерөнхийлөгч Д.Трамп тангараг өргөснийхөө дараа мэдэгдэл хийж, ирэх дөрвөн жилийн хугацаанд түүний засаг захиргааны хэрэгжүүлэх бодлогыг танилцуулж, америкчуудад цөөнгүй амлалт өгсөн байна. Тухайлбал,

• “Америкийн алтан үе”-ийг эхлүүлэх
• Худалдааны харилцааг шинэчлэх
• Эрчим хүчний үнийг бууруулах
• Хилийн аюулгүй байдлыг чангатгах
• Засгийн газрын хөтөлбөрүүдийг өөрчлөх
• Сансар судлалын хөгжилд анхаарах
• Засгийн газарт бүтцийн шинэчлэл хийх
• Цагаачлалын бодлогыг чангатгах зэрэг амлалт өгчээ.

Мөн шинэ Ерөнхийлөгч “TikTok” платформын хоригийн хэрэгжүүлэх хугацааг 75 хоногоор хойшлуулах шийдвэр гаргасан аж.