УИХ-ын гишүүн Б.Пүрэвдорж өнөөдөр мэдээлэл хийлээ. Тэрбээр энэ үеэр Засгийн газраас цар тахлын үед зарцуулсан 5.1 их наяд төгрөгийн тайланг танилцуулахыг шаардсан юм.

УИХ-ын гишүүн Б.Пүрэвдорж "2020 оны төсвийн орлогын талыг цар тахлын эсрэг арга хэмжээнд зарцуулсан. Уг 5.1 их наяд төгрөг зарцуулсны үр нөлөө гарсангүй. Иймд Засгийн газар 5.1 их наяд төгрөгийн тайлангаа тавьж байж 10 их наядын төлөвлөгөөгөө хэрэгжүүлэх ёстой. Эрх баригчдын зарцуулсан мөнгө гаргасан хөтөлбөрийнхөө талдаа хүрч байхад үлдсэн нь хаашаа орсон бэ.

5.1 их наядын төлөвлөгөөг гаргахдаа гурван зүйлд зарцуулна гэж Засгийн газар танилцуулсан. Нэгдүгээрт, иргэдийн эрүүл мэндийг цар тахлаас хамгаална. Хоёрдугаарт, эдийн засгаа хамгаалах, гуравдугаарт, аж ахуйн нэгжүүдийг эрсдэлд  оруулахаас хамгаална гэсэн. Өөрөөр хэлбэл, өнгөрсөн хугацаанд энэ гурван зорилт хэрэгжсэнгүй.

Өнөөдөр цар тахлыг дотооддоо алдчихсан олон хүн өвчилсөн байна. Мөн эдийн засаг 5.3 хувиар агшсан. Энэ сүүлийн хэдэн жил байгаагүй уналт. МҮХАҮТ-аас гаргасан судалгаагаар нийт аж ахуй нэгжийн 75 хувь нь үйл ажиллагаагаа тодорхой хувиар зогсоосон. Мөн 400 мянган ажилтан цалингаа авч чадаагүй байна. 5,1 их наяд төгрөгийг цар тахлын эсрэг зарцуулсан ч яагаад иргэн бүрт очсонгүй вэ гэж хүмүүс хардаж байна. Ингээд би Ерөнхий сайд асан У.Хүрэлсүхэд асуулга явуулсан.

Үүний хариуд маш богино тайлбар ирүүлсэн. "2020 онд 2.4 их наяд төгрөгийн дэмжлэг үзүүлээд байна" гэсэн. Үлдсэн 2.7 их наяд төгрөг хаачсан бэ.  Цар тахлын хүнд үед эрх баригчид хоёр тэрбум төгрөгийн хөшөө, 3.2 тэрбум төгрөгөөр усыг нь зөөдөг усан сан байгуулсан.

Чингис хаан музей 50 тэрбум төгрөгөөр барих ёстой байсан ч энэ онд 30 тэрбум төгрөгөөр өртөг зардал нь өсөж 82 тэрбум төгрөгөөр музей бариад явж байна. Ийм үр дүнгүй зарцуулалтыг Засгийн газар гаргаж байна.

Өнөөдөр халдвар авсан нэгийг эмчлэхэд хүн найман  сая төгрөгийн зардал гарч байгаа ч өдөрт хэдхэн витамин ууж байгаа гэх юм. Хамгийн наад захын хулгай бол N95 маск нэг ширхгийг 20 мянган төгрөгөөр авсан байна. Асар их хэмжээний хулгай хийж байна. Энэ хулгайлж авсан мөнгөнийхөө тал хувийг нь УИХ-ын сонгуульд зарцуулсан.   УИХ-ын дарга индэр дээрээс "мянгат малчин хоолны талон аваад байна" гэж хэлсэн. Тиймээс 5.1 их наяд төгрөгийн зарцуулалтаа тайлагна. Үүний дараа 10 их наядын хөтөлбөрийг хэрэгжүүл. Өнөөдөр хоёр их наяд төгрөгийг гурван хувийн хүүтэй аж ахуй нэгжид зээлнэ гэж байгаа.

Энэ зээлийг авахын тулд маш өндөр шалгууртай. Эсрэгээрээ зээл өгөхгүй гэсэн шалгууртай. Энэ шалгуурыг 2021 оны Ерөнхийлөгчийн сонгуульд танай компани санал өгөх юм бол хариуд нь зээл өгнө гэж байгаа. Мөн 500 мянган залуусын саналыг худалдаж авах зорилгоор хоёр сарын сургалт нэрээр нэг сая төгрөгийн цалинтай хөтөлбөрт хамруулах гэж байна. Ард иргэдийн татварын мөнгөөр 2020 оны сонгуулиа худалдаж авсан. 2021 оны сонгуулийг мөн 10 их наядаар худалдаж авах гэж байгаа бол андуурал шүү. Нэг зүйлийг хатуу хэлье. 5.1 их наяд төгрөгийн хүрээнд маш олон хөтөлбөрийг тендергүй худалдаж авсан. Цаашид эрх баригчдын хулгайлсан хөрөнгийг олон улсын эдийн засагчид, сэтгүүлчдийн байгууллагатай хамтарч илрүүлэх болно" гэлээ.