Улстөрчид албан тушаал, эрх мэдлийн  өмнө бөхийж, ямар ч төлөөсөөр хамаагүй шуналын хүслээ дарж, өндөр албан тушаалд хүрдэг тохиолдол цөөнгүй. Нэг урвасан хүн дахиад ч урвана гэдэг үг бий. Эрх мэдэл, албан тушаалын төлөө намаа сольж, туйлбаргүй загнаж байсан улстөрчдийг эргэн сануулъя.

Ч.Улаан Д.Тэрбишдагва нар МАН-аас МАХН-д МАХН-аас МАН-д ирсэн нь

Ерөнхийлөгч асан Н.Энхбаярыг дагалдаж явсаар төрд том алба хашсан хүмүүсээр УИХ-ын гишүүн  асан Ч.Улаан, Д.Тэрбишдагва нарыг нэрлэж болно. МАХН буюу одоогийн МАН-ын удирдлагуудын дунд намын нэрний маргаан үүсэж, туурга тусгаарлахад тэд Н.Энхбаярт дагаар орсон билээ. Түүгээр ч зогсохгүй,  МАХН-аас нэр дэвшиж, УИХ-д сонгогдсон, бүр Д.Тэрбишдагва  Шадар сайдаар хүртэл ажиллаж байв. Гэвч өөрсдөө албан тушаалд хүрэхэд нь Н.Энхбаярын “уналтын цэг” эхэлж, тэд 2012 онд намын иргэншлээ сольж, МАН-д ирсэн  түүхтэй. Үүнийхээ ачаар хэн, хэн нь албан тушаал, эрх мэдлийн бялуунаас хангалттай хүртээд авсан.

Х.Болорчулуун  Ц.Даваасүрэн нар МАН-д буцаж ирсэн

Тэд анхнаасаа МАН-ын угшилтай байв. Намаас нь УИХ-ын 2012 оны сонгуульд нэр дэвшүүлэхгүй гэсний төлөө тэд бие даан нэр дэвшиж сонгогдсон байдаг. Тэд 2012 УИХ-д бие даагчдын бүлэг гэдгийг одоогийн УИХ-ын гишүүн С.Ганбаатартай нийлж, байгуулсан удаатай. Ц.Даваасүрэн намаас гарахдаа нэлээд хэл ам дагуулж байсан. МАН доторх уур амьсгалыг эвдээд зогсохгүй, даргынхаа өөдөөс тэрсэлдэж, өширхсөндөө бие даасан гэж хэлж болно. Өөрөөр хэлбэл, “У.Хүрэлсүх намайг ална гэсэн” гэх ярилцлагыг өдөр тутмын сонинд өгч байлаа. Намдаа нүд үзүүрлэгдэж байсан ч удалгүй намын иргэншлээ сэргээж байв. 2016 оны парламентад У.Хүрэлсүхийн Засгийн газарт багтаж, Эрчим хүчний салбарыг толгойлж байлаа. Х.Болорчулуун ч мөн намаасаа гарч бие даан нэр дэвшиж, төд удалгүй дахин намдаа ирж байсан билээ. Иймд гаргасных нь шан ердөө л албан тушаал гэдгийг хэн хүнгүй мэдэх билээ.

О.Баасанхүү А.Сүхбат нарын улстөрийн карьер өндөрлөв

МАХН-ын дарга Н.Энхбаярт шадарлаж, өмгөөлөгчөөс нь эхлээд хамгаалагч, төлөөлөгч хүртлээ зүтгэсэн хүн бол О.Баасанхүү. Жирийн өмгөөлөгчийг улс төрд бэлтгэж, өөрийнхөө төлөөлөл болох хүртлээ тэд эв найрамдалтай байв. Түүний хувьд МАХН болон Н.Энхбаяр гэх нэрийн хуудсаар дамжин, парламентад хоёр удаа сонгогдсон. Өнгөрсөн найман жилийн хугацаанд сайн, муу, саар бүхнийг дуулсан ч О.Баасанхүүгийн хувьд намаа ч, даргаа ч сольсон нь ялагдал хүлээх шалтгаан болсон. Үүнд МАХН-ыг өөрийн эрхшээлдээ авч, хэдэн гишүүдээ талцуулж, Н.Энхбаярынхаа эсрэг бослого өдөөсөн гээд тарьсан хэрэг нь багадахгүй. Үүнийхээ гороор найман удаа МАХН-аас хөөгдсөн байдаг. Энэхүү үйлдэлд шархалсан О.Баасанхүү УИХ-ын найм дахь удаагийн парламентад АН-аас нэр дэвшиж, ялагдал хүлээснээр улс төрийн карьер нь дууссан юм. Харин бөхийн дэвжээнээс сүр дуулиантай зодог тайлсан аварга А.Сүхбат 2013 онд АН-д элсэж, гишүүний үнэмлэхээ авч байлаа. Түүнээс төд удалгүй МАН-д элссэн удаатай. МАН-д элсэх болсон шалтгаан нь УИХ-д нэр дэвших мандат өвөртлөхийн тулд билээ. Намаа солиод УИХ-д сонгогдсон нь үнэн. Гэвч тус намынхан түүнийг ахин сонгоогүй билээ.

Ж.Батзандан Л.Болд нарын урвалт ялагдлаар төгсжээ

Тэд АН-ын нэрээр нийгэм болоод улс төрд танигдсан. АН-ын унах, босох үед нь хамт байж, түшилцсэн гэхээс илүүтэй тэд нам болоод даргынхаа эсрэг бодлого боловсруулж явсан улс. Энэ нь эцэстээ намаа солихоос аргагүй шалтгаан болсон бөгөөд ШИНЭН хэмээх нам байгуулж, туурга тусгаарласан. Тэд хамтдаа нийгэм, улс төрийг шинэчлэхээр зорилго шулуудан, гар нийлсэн ч өөрсдийгөө ч өөрчилж чадалгүй ялагдсан. Гэхдээ замын дундаас Л.Болд АН-даа буцаж ирээд зогсохгүй даргаар ажиллах амбицтай байгаа. Харин иргэний хөдөлгөөний нам, АН, ШИНЭ гэх мэтээр дэндүү олон буурь сэлгэсэн Ж.Батзандан харин юу төлөвлөж суугаа бол.

Э.Магнайбаяр хамгийн залуу “урвагч” болов

МАХН-ын гэх Э.Магнайбаярын хувьд орон нутгийн сонгуульд МАХН, АН, ШИНЭН-тэй эвсэн орж, Баянгол дүүрэгт ялалт байгуулсан байдаг. Олонхийн дэмжлэг авсан залуухан улстөрч ялалтын баярын дараахан МАН-ыг сонгосон нь иргэдийн эсэргүүцэлтэй тулж, өндөг, гурилаар шидүүлж, олонд адлагдаж яваа. Өөрөөр хэлбэл, санал нь тэнцсэн Баянголд аль нам засаглах вэ гэдгийг шийдвэрлэх эгзэгтэй мөчид тэр намаа сольсон нь хамгийн залуухан урвагчаар нэрлэгдэж хэд хүргээд байгаа.Түүнийг эргүүлэн татах хүртэл АН-ын төлөөлөгч нар хуралдаа суухгүй гэдгээ мэдэгдээд байгаа билээ.

Энэ мэтээр цөөнгүй улстөрч жилээс жилд эрх мэдэл, албан тушаалын төлөө арга ядахдаа нам, эвсэлээ сольж нэгээс нөгөө рүү урвадаг. Энэ үзэгдэл олон жилийн өмнө ч байсан одоо ч газар авсан хэвээр. Гэхдээ ийм ёс зүйгүй улстөрчдөд хэн, ямар хариуцлага тооцох ёстой вэ. Эсвэл урваач, шарваачдыг өндөглүүлсээр л байх уу.