Гаднын нөлөөнд хэт автсан, дотоодын нэгдэлгүй АН

Б. Бадралмаа:
Улс төр- Тэрслүү үг

2021-03-02, 975

- НАМ ДОТОРХ ФРАКЦЫН ТЭМЦЭЛ ХАТИГ БОЛТЛОО БУГЛАЖ, ХАРИУЦЛАГАТАЙ ЦАГ ҮЕД ЭВЛЭЛДЭН НЭГДЭХ ТЭНХЭЛГҮЙ БОЛТЛОО “ШАРХАДСАН”-

Ардчилсан намын тулга тойрсон явган хэрүүл иргэдийг залхааж, улс төрд гол тоглогчийн үүрэг гүйцэтгэдэг хоёр том намын нэг нь тоглоомоос бүр мөсөн гарахад тун ойрхон байна. Гэвч Ардчилсан намын гишүүд дэмжигчид намынхаа үнэт зүйл, үзэл бодолд дургүй болчихсондоо бус, харин алсын хараа, улс төрийн зангараггүй, сул дороо байдалд нь итгэл алдчихсан хэрэг. Угтаа бол өөр өөрийгөө даргаар өргөмжилсөн эцэс төгсгөлгүй тэмцэлдээн 30 жилийн түүхтэй улс төрийн томоохон хүчний нэр хүндийг шавар шавхайтай нь хутгачихаад буй.

Хэдий намын хоёр гишүүн тамга, тэмдэг дарга, цэргийнхээ суудлыг булаалдаж байгаа мэт харагдавч үнэн хэрэгтээ намын хуучин гишүүдийн эрх ашгийн төлөөх тэмцэл эд өрнөж буй. Тэд С.Эрдэнэ, Ц.Туваан гэх хоёр нэрээр халхавч хийж, ёстой л “Нэгийгээ үзэж, нэхий дээлээ уралцаж” байна гэхэд хилсдэхгүй. Өнгөрсөн хугацаанд нам доторх фракцын тэмцэл хатиг болтлоо буглаж, хариуцлагатай цаг үед эвлэлдэн нэгдэх тэнхэлгүй болтлоо “шархадсан” учир өнөөдрийг хүртэл учраа олохгүй олны доог тохуу болж байна. Харамсалтай нь, намын лидер гэгдэх хуучин улстөрчид намдаа шинэ салхи оруулах өчүүхэн төдий эрмэлзлэл байхгүй бололтой. Энэ нь ч УИХ-ын ээлжит сонгуулийн үеэр харагдаж, хэн мөнгөтэй тал зассанд давуу эрх олгосон. Эндээс хуучин гишүүдийн явцуу эрх ашиг шинэ залуу гишүүдээ улам бүр шахан хавчиж байгааг олон хүн сануулсан ч нүдэн балай чихэн дүлий байсаар өнөөдрийн байдалд хүргэлээ.

Нэг ёсондоо намын лидерүүд гэгдэх хөгшчүүл сандал суудлаасаа хөндийрч чадахгүй намынхаа хүчийг улам бүр туйлдуулсаар байна. Үүнийг нь учир мэдэх хүмүүс Ардчилсан намынхан “бүлэглэлийн хараалд” өртчихсөн гэж жиг жуг гэлцэх болжээ. Тэнд ардчилсан намын үзэл, баримтлал, үнэт зүйл огтоос хамаагүй. Даахгүй нохой булуу хураана гэгчээр юм юм руу үсчиж, дөвийлгөх оролдлогуудыг хийх болжээ.

Үүний нэг тод жишээ нь, намын үүсгэн байгуулагчдын нэг хотын дарга асан Э.Бат-Үүл нийслэлийн Ардчилсан намын даргад хүч үзнэ гэх цуу яриа дэгдээсэн. Үнэхээр ч сүүлийн үед Э.Бат-үүл намын даргын сунгаанд өрсөлдөнө. Ерөнхийлөгчийн сонгуульд дэвшинэ гэх явган яриаг мэр сэр цухуйлгах болсон.

Ардчилсан намынхан залуу улстөрчдөө хаалганы гадна түгжчихээд, хөгшин лидерүүд нь намаа удирдаж, хөдөлгөхгүй дотроо тэмцэлдэж байхад өрсөлдөгч нам нь 30 гаруйхан настай залуухан Ерөнхий сайдаараа гангарч байх жишээтэй. 100 жилийн түүхтэй ууган нам залуу үеэр цус сэлбэж, шинэ залуу улстөрчдийг шат дараатай бэлдэж байхад Ардчилсан намд залуу үе, залгамж халаа битгий хэл үнэт зүйл ч алга.

Шуудхан хэлэхэд, Ардчилсан нам хуучин гишүүдээс салах цаг хэдийнэ болж, цус сэлбэхгүй бол бууриа манасан хөгшин удирдагч нарын тулга тойрсон хэрүүл салахгүй нь.

Гаднын нөлөөнд хэт автсан, дотоодын нэгдэлгүй АН

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.