БНХАУ-аас манай орны дотоод асуудалд "хошуу" дүрж байдаг нь хэрээс хэтэрлээ. Гадаад хэргийн сайд нь хүртэл тусгай үүргийн онгоцоос гүйхээрээ гарч ирээд л улс төр чинь тогтворгүй, Засгийн газар чинь хүчгүй байна. Манайх улс төрд чинь туслаад өгье гэх нь холгүй "даварсан" мэдэгдэл хийж өгөөд явав аа, Ван И.

БНХАУ-ын Төрийн зөвлөлийн гишүүн бөгөөд Гадаад хэргийн сайд Ван И Монгол Улсад айлчилсан. Хоёр жилийн өмнө ирж, "пээдийж" байснаа бодвол энэ удаад илүү дорвитой мэдэгдэл хийж, чухал гэрээ, протоколыг албажуулжээ. 

                 Тухайлбал, Ван Игийн албан айлчлын хүрээнд Гашуунсухайт-Ганцмод боомтыг төмөр замаар холбох асуудлыг эцэслэн тохиролцож, хятадын талд урт хугацаанд нүүрс тогтвортой нийлүүлэх гэрээ байгуулахаар болов. Улмаар Монголоос БНХАУ-ын талд урт хугацаанд нүүрс тогтвортой нийлүүлэх гэрээ байгуулах шийдэлд хүрч, Ханги-Мандал боомтыг төмөр замаар холбох асуудлаарх манай талын хүсэлтийг хятадын тал анхааралдаа авч, үргэлжлүүлэн ажиллахаар болов. БНХАУ-ын Гадаад хэргийн сайд Ван Игийн айлчлалаас хамгийн том хүлээлттэй байсан Эрдэнэбүрэнгийн УЦС-ын асуудал албан айлчлалын гэрээ хэлцэлд яригдаж, уг төслийн бүтээн байгуулалтыг эрчимжүүлж, санхүүжилтийг нь шийдсэн.

БНХАУ-аас манай дотоодын хамаг л асуудалд "хошуу" дүрж явах. Хатуухан хэлэхэд, урд хөрш байхгүй л болчихвол урагшилж байгаа ажил нэг ч алга. Тэр болгонд БНХАУ-аас зээл, тусламж зэргээр төрийн түшээдийн "толгойг илсээр" байгаад сургачихжээ. Гэтэл сүүлдээ урд хөрш маань Монгол Улсын улс төрийн нөхцөл байдал, Засгийн газрын тогтвортой байх эсэх асуудлыг хөндөж, бүр туслаад, дэмжээд өгье гэж байх юм.

Өчигдөр БНХАУ-ын Гадаад хэргийн сайд Ван И айлчлалаа өндөрлүүлэхээс өмнө хийсэн мэдэгдэлдээ

“Монгол Улсад айлчилж байгаадаа таатай байгаагаа илэрхийлье. Өчигдөр нисэх онгоцноос буусны дараа Ерөнхий сайд Л.Оюун-Эрдэнэтэй уулзаж, өргөн агуулгаар хэд хэдэн чухал санал солилцож, хоёр улсын харилцааг өргөжүүлэхээр тохирсон.

                 Сүүлийн жилүүдэд  хоёр улсын удирдагчид Хятад, Монголын хоёр тал бие биеийн тусгаар тогтнол, бүрэн эрхт байдал нутаг дэвсгэрийн бүрэн бүтэн байдлыг харилцан хүндэтгэж, бие биеийн язгуур эрх ашгийг харилцан хүндэтгэж ирсэн. Хятадын Засгийн газар Хятад, Монголын харилцаанд өндөр ач холбогдол өгсөөр ирсэн. Гадаад харилцааны бодлогод Монголыг тэргүүн эгнээнд тавьдаг. Өчигдөр Ерөнхий сайд Л.Оюун-Эрдэнэ Хятадын Тайвань, Шинжаан, Төвөд зэрэг дотоодын хэрэгт хөндлөнгөөс оролцохыг эсэргүүцэж байгаагаа илэрхийлсэн. Үүнийг бид сайшааж байна. Мөн цаашид Монгол Улсын улс төр тогтвортой байх, Засгийн газрын  хөгжилд дэмжлэг үзүүлэхэд бэлэн байна. “Шинэ сэргэлтийн бодлого” 2025 он хүртэл хэрэгжих хүрээнд танай найдвартай урт хугацааны түнш байх болно” гэлээ. Өөрөөр хэлбэл, Ван И "Танай улс төр тогтвортой биш байна. Засгийн газар чинь хүчгүй байна. Бид нар туслаад өгье. Сайн "ах" чинь болъё" гэх санааг хэлж байх.

Ван И "бэрс" айлчлынхаа хүрээнд эдийн засгийн хамтын ажиллагаа, хоорондоо нээх боломжит бүхий л боомтуудыг нээн, төмөр зам, авто зам зэрэг экспортын хамтын ажиллагааг эрчимжүүлэх, бүр манай нийслэл хотын гэр хорооллыг орон сууцжуулах, бохир ус цэвэршүүлэх, мах, махан бүтээгдэхүүн боловсруулах үйлдвэр зэрэг төслийг хөндөж, хэлэлцсэн олон хүний сэтгэлийг хөөргөж, итгэлийг нь төрүүлжээ. Гэсэн ч албан айлчлалынхаа эхэнд "Хятад, Монгол хоёр улс бие биеийнхээ тусгаар тогтнол, бүрэн эрхт байдал, газар нутгийн бүрэн бүтэн байдлыг харилцан хүндэтгэхээ дахин бататгав" хэмээж байсан БНХАУ-ын Гадаад хэргийн сайд Ван И хэлсэн үгээ зөрж, манай орны дотоод асуудал, улс төрийн тогтвортой байдалд "санаа зовних" нь юуны учир вэ. Аль эсвэл үнэхээр л БНХАУ манай орны улс төрийн хүч, Засгийн газрын байр суурийг мэдэж, шийдэхээр хэмжээнд дотоод асуудалд маань оролцдог болчихсон ч юм билүү.