-Иргэнд үйлдчилдэг ЭРҮҮГИЙН ТУХАЙ ХУУЛЬ, ЗӨРЛИЙН ХУУЛЬ, КОВИДЫН ХУУЛЬ эрхэм гишүүнд үйлчлэхгүй-

                  Монгол Улсын иргэн Д.Мөнхбат хоёр жилийн өмнө эх орондоо ирж байлаа. Харийн оронд ажиллаж, аав, ээж, ах дүүстээ яаран байж ирсэн тэр ард иргэдийн эрүүл мэндэд занилхийлсэн, халдварт өвчин тархах нөхцөл байдал үүсгэсэн, худал мэдээлэл тараасан “ялтан” болж хувираад хоёр оны нүүр үзлээ. Учир нь, тэр эх орондоо ирээд гурван удаа шинжилгээ өгч, эрүүл гэсэн бичигтэй 21 хоног “Энхсаран” сувилалд тусгаарлагдаж, 22 дох хоногтоо халдвартай нь батлагдсан юм. Эцэст нь, тэр энэ бүгдийг хүлээн зөвшөөрөхгүй байсан учир тусгаарлалтын хугацаа дууссан гэж үзээд, өрөөнөөсөө гарч, шууд дамжуулалт хийж, бодит нөхцөл байдлын талаар мэдээлэл өгсөн юм.

“ЭНХСАРАН” СУВИЛЛЫН ТАЛААР БОДИТ ҮНЭНИЙГ МЭДЭЭЛСЭН Д.МӨНХБАТ ЭРҮҮГИЙН ЯЛТАН БОЛОХ НЬ

                  Тэрбээр “Энхсаран” сувиллаас халдвар авсан хүний олонхийг нь халуун усны газраас авсан гэж бодож байгаа. Харин би болон надтай хамт байсан хүн халуун усны газраар үйлчлүүлээгүй, өрөөндөө шүршүүртэй байсан. Бид “Энхсаран” сувиллын ажилчдаас халдвар авсан байх магадлал маш өндөр байгаа юм. Одоо ХӨСҮТ-д “Энхсаран” сувиллын хэд хэдэн ажилтан коронавирусийн халдвар авсан гээд бидэнтэй хамт эмчлүүлж байгаа. Тэгэхээр халдвар халуун усны газарт эхэлж тархаад, тус газрын ажилчид түүнээсээ халдвар аваад, тусгаарлалтад байсан хүмүүст тараасан байх магадлалтай. Би гэхэд л хоол тараадаг хүнээс халдвар авсан байх гэж бодож байгаа. УОК хариуцлага алдаж, эрүүл иргэдээ хохироосон гэдгээ хүлээн зөвшөөрч, уучлал хүсэх ёстой” хэмээн тусгаарлах байрны ноцтой баримтыг олон нийтэд мэдээлсэн юм.

Өөрөөр хэлбэл, “Энхсаран” сувиллын нөхцөл байдлын талаар шүгэл үлээсэн анхны хүн нь тэр. Иргэн Д.Мөнхбатыг энэ бүгдийг бичиж, ярьж, шууд дамжуулалт хийсний дараа “Халдварт өвчний талаар ард иргэдэд худал мэдээлэл тараасан” хэмээн Зөрчлийн тухай хуулиар 500 мянган төгрөгөөр торгосон байдаг. Харин Хан-Уул дүүргийн Прокурорын газраас 2021 оны гуравдугаар сарын 24-ний өдөр Д.Мөнхбатыг Эрүүгийн хуулийн 15.6.1 дэх хэсэг “Бусдын амь насанд аюул учруулж болзошгүй халдварт өвчин бусдад халдаах, эсхүл тархах нөхцөл бүрдүүлсэн” гэх зүйл ангиар Эрүүгийн хэрэг үүсгэж, яллагдагчаар татаад байгаа. Хариуцлагагүй шийдвэрийн улмаас иргэдийн амь нас, эрүүл мэнд хохирч болох байсан эрсдэлт нөхцөл байдлаас сэргийлэх зорилгоор шударга шүүмжлэл өрнүүлсэн түүний мэдээллүүд иргэдийг төөрөгдүүлсэн, өдөөн турхирсан хэв шинжтэй байсан гэж үзсэн билээ. Өнөөдөр түүнийг Хан-Уул дүүргийн Прокурорын газраас дахин дуудаж, яллах дүгнэлтээ танилцуулах гэж байгаа гэнэ.

ОМИКРОН ХУВИЛБАР ТАРХСАН БАЙСНЫГ НУУСАН БАЙЖ БОЛЗОШГҮЙ, ХАЛДВАРТ ӨВЧНИЙ ТАЛААР ХУДАЛ МЭДЭЭЛЭЛ ТАРААСАН УИХ-ЫН ГИШҮҮН М.ОЮУНЧИМЭГ ЖИРГЭЭЧИН БОЛОВ

            Тэгвэл омикрон хувилбар илэрснийг нуун дарагдуулж, иргэдийн амь насанд занилхийлсэн, халдварт өвчнийг бусаддаа үгсэн хуувилдаж, нуусан байж болзошгүй УИХ-ын гишүүн М.Оюунчимэгийг иргэн Д.Мөнхбатыг яллаж буй Эрүүгийн хуулийн 15.6.1 дэх хэсэг “Бусдын амь насанд аюул учруулж болзошгүй халдварт өвчин бусдад халдаах, эсхүл тархах нөхцөл бүрдүүлсэн” гэх зүйл ангиар Эрүүгийн хэрэг үүсгэх ёстой бус уу. Эсвэл халдварт өвчний талаар худал мэдээлэл тараасан гэх үндэслэлээр Зөрчлийн тухай хуулийн дагуу шалгах ёстой баймаар. Учир нь, УИХ-ын гишүүн М.Оюунчимэг “Монголын Засгийн газар өнгөрсөн сард омикрон тархсан байсныг нуусан” гэх утга бүхий жиргээг твиттер хуудастаа оруулсан байдаг.

 Тодруулбал, тэрбээр “Угаасаа л шинэ жилийн өмнө тархсан байсан л даа. Гэнэт тархсан мэт ярихаа болих хэрэгтэй. Зүгээр л тайван бэлэн байдлаа хангацгаая. Гол нь амны хаалтаа тогтмол зүүж, олон нийтийн газар, шоу цэнгээнээс хол байцгаая. Зайгаа барьцгаая. УОК, ЭМЯ сүржигнэх хэрэггүй” гэж бичсэн билээ. Бид түүний энэ мэдээллийг нягталж үзэх үүднээс өөртэй нь холбогдож, тодруулсан байдаг. Тэрбээр “Омикрон оны өмнө илрээгүй. Албан ёсны мэдээлэл биш. Томуу, томуу төст өвчний шинж тэмдэг нэмэгдсэн байна гэж албаныхан хэлээд байсан” гэсэн билээ.

                  УИХ-ын гишүүн М.Оюунчимэг, иргэн Д.Мөнхбат хоёрын мэдээлсэн мэдээлэл нь яг адилхан. Гэсэн атал энгийн иргэн нь ялтан, эрхэм гишүүн нь дуртай үедээ дуртай мэдээлдэг хуулиар хамгаалагдсан жиргээчин болов. Хууль хэнийг ч ялгадаггүй тэгш үйлчилдэг байх ёстой.