Эмнэлгийн ачаалал, эмийн эрэлт эрс нэмэгдэж, өрх бүрийн нэг гишүүн ханиадтай байна гэхэд хол зөрөхгүй болж. Багтаж шингэх зайгүй болтлоо дүүрсэн эмнэлэгт үзүүлэхээр очсон иргэд хоёр, гурван цаг оочирлоод тууралттай, ханиалгасан хүүхдүүд орж ирээд байсан болохоор “Өвчнөө үзүүлэх биш нэмж өвдөөд гарахаар нөхцөл байдалтай байна” гээд өрхийн эмнэлгийн эмчдээ үзүүлж чадахгүй хувийн эмнэлэгт өндөр үнээр үзүүлэх болжээ. Тиймээс энэ нөхцөл байдалтай холбогдуулан бид эм зүйч нараас ханиадны эмийн үнийн талаар сурвалжиллаа.

НЭГ ХҮҮХДИЙН ТАВ ХОНОГ УУХ ЭМ БАГАДАА 150 МЯНГА БОЛЖ БАЙНА

     Эмч болон эм зүйч нар “Yuhan n flu” эмийг зөвлөж байна. Энэхүү эмийг томуугийн А болон В вирусийн халдварын шинж тэмдэг 48 цагаас ихгүй хугацаанд илэрч байгаа том хүн өдөрт хоёр удаа 12 цагийн зайтай, хүүхэд өдөрт нэг удаа уух юм. Таван хоногийн хэрэглээ нь том хүн 43 мянга, хүүхэд 26 мянган төгрөг болж байна. Үүн дээр антибиотик, дархлаа дэмжих эм мөн нэмэлт эмүүдээ авахаар нэг хүүхдийн эм багадаа 150 мянган төгрөг болох ч тэр бүр эм нь үйлчлэхгүй байгаа хэмээн олон ээжүүд нийгмийн сүлжээнд нийтэлсээр байна.

ЭЦЭГ ЭХЧҮҮД ЦАЛИНГАА ХАНИАДНЫ ЭМЭНД ЗАРЦУУЛЖ БАЙНА

       Тухайлбал, хувийн хэвшилд ажилладаг Д.Анударийнх ам бүл тавуул. 3-10 насны гурван хүүхэдтэй. Хамгийн бага нь цэцэрлэгийн дунд бүлгийн хүүхэд бөгөөд сүүлийн сар ханиад, томуунд хамгийн их өртөж байгаа аж. Арван  нэгдүгээр сарын эхээр гурван хүүхэд нь ээлж дараалан халуурч, ханиалгаж, эмнэлэгт үзүүлэхэд бичиж өгсөн эмийн нийт үнэ 220 мянган төгрөг болсон байна. Эмчилгээгээ долоо хоног хийж арай гэж дээрдээд сургуулийн хичээл, цэцэрлэгт нь явуулсан ч 10 хонолгүй дахиад халуурч, өмнөх эмчилгээ давтагдсан. Ингэснээр ердөө нэг сарын дотор нийтдээ 400 мянган төгрөгийг зөвхөн ханиадны эмээс гадна дархлаа дэмжих нэмэлтүүдэд зарцуулжээ. Өрхийн орлого нь 2 сая орчим. Гэтэл байрны зээл, хоол хүнс, утас, хүүхдүүдийн сургалтын зардал, дулаан, тогны төлбөрүүд нийлээд 1.4 саяыг нь аваад явдаг. Үлдсэн 600 мянган төгрөгөөрөө амьдрал зохицуулах гэж байхад ханиадны давтагдсан эмчилгээ тэднийг бүр илүү хүндрүүлээд байна. Товчхондоо, энэ сар тэдний өрх нийт орлогынхоо бараг 70 хувийг эрүүл мэнддээ зарцуулаад байгаа юм.

ХАРИУЦЛАГАТАЙ БАЙЖ ХАНИАД, ТОМУУ, ТОМУУ ТӨСТ ӨВЧНӨӨС СЭРГИЙЛЦГЭЭЕ

       H2N3 вирусийн онцлог нь энгийн томуутай адил хүүхдэд халуурах, ханиах шинж илрэхгүй байх атлаа бие сулрах, халууны хордлогод орох, цөөн хугацаанд хатгаа болох эрсдэл өндөр байгаагаар илэрч байна. Иймд та бүхэн өөрийн болон хайртай үрсүүдийнхээ эрүүл мэндэд анхаарч, дараах зөвлөмжийг хэрэгжүүлэн томуу, томуу төст өвчнөөс урьдчилан сэргийлээрэй

• Гараа савандаж тогтмол угаах
• Ханиаж найтаах үед ам, хамраа дарах
• Ханиадтай хүнтэй ойрын хавьтал болохоос зайлсхийх
• Хүүхэд, жирэмсэн болон өндөр эрсдэлт бүлгийн хүмүүс дархлаагаа дэмжих
• Халдварын шинж илэрвэл эмнэлгийн байгууллагад яаралтай хандах
• Гадуур явахдаа маск зүүх, хүн ихээр цуглардаг газраар явахаа хязгаарлах
• Өрөө тасалгааг тогтмол агааржуулах, гадаргууг ариутгах