Ардын намын дарга нарт ДАХИАД ОЛДОХГҮЙ 100 жилийн ой

Б. Бадралмаа:
Улс төр- Тэрслүү үг

2021-06-15, 1486

Монгол Ардын намынхан 100 жилийнхээ ойг сүр дуулиантай тэмдэглэх гэж мөн ч их хөрөнгө, цаг зав зарцуулж байна даа. Гэвч нүсэр их баяр тэмдэглэхэд цар тахал том саад тушаа болж, эрх баригч намынхан яаж ч чадахгүй толгойгоо маажиж сууна.

Уг нь тэд тэгш ойн баяраа нижгэр тэмдэглэх гэж хэдэн жилийн өмнөөс бэлдэж, бүх эрх мэдлийг гартаа оруулах аргаа зохиочихсон байв. Иймдээ ч цар тахлыг хойш тавьж наадам хийхээр улайрч байгаа гэхэд хилсдэхгүй.

Үндсэн хуульд нэмэлт, өөрчлөлт оруулж, төрийн эрхийг дангаараа барих улс төрийн том хэмжээний өөрчлөлт хийчихээд түүн дээрээ тоглолт хийж, намаасаа Ерөнхийлөгчтэй болсон. Өнгөрсөн 30 жилийн хугацаанд сөрөг хүчний үүрэг гүйцэтгэж байсан Ардчилсан намыг ч улс төрийн тавцангаас “хөөж” 100 жилийн ойгоороо дураараа дургиж дунд чөмгөөрөө наргих бүх төлөвлөгөөгөө боловсруулчихсан байв. Мөнхийн дайсан мэтээр биенээ чичилж байсан МАХН-тай ах дүүгийн барилдлагатай болж, сонгуульдаа нэгдэж оролцсон нь ч 100 жилийн ойн бас нэгэн бэлэг байв. Одоо тэд ойн баяраа хамт тэмдэглэхээр хөл хөөр болж, бие биедээ ихэд саймширч байгаа сурагтай. Наадам хийх сургаар бөхчүүд бэлтгэлдээ гарч, уяачид аль эрт морьдоо сойгоод эхэлсэн. Харваачид ч бэлтгэлээ хийж, монголдоо шилдэгт тооцогдох гурван найруулагчаар наадмын нээлтээ хийлгэхээр тоглолтын бэлтгэлдээ ороод буй.

Харамсалтай нь, дэлхий нийтийг хамарсан “Ковид-19” гэх аюулт өвчин яг МАН-ын ойн баяртай давхцаж, Монгол Улсын Үндэсний аюулгүй байдалд заналхийлэх хэмжээнд хүрчихлээ. Коронавирусийн халдвар авсан хүмүүсийн тоо өдөрт 1000 хол давж, эмнэлгүүд ачааллаа дийлэхээ больжээ.

Гэтэл эрх баригч намынхан олон жилийн төлөвлөгөөгөө нураачихгүй гэж байдгаараа хичээж ойгоо тэмдэглэхээ зэхэж байгаа ч хөдлөх аргагүй хүнд байдалд хүрчихсэн байна. Хэдий тэд наадам хүртэл хөл хорио тогтоохгүй гэж ам гарсан ч эмнэлгийн орон дээр өвчинтэйгөө тэмцэх иргэд олширч, амьсгалын аппарат нь ч хүрэлцэхгүй тарчилж байгаа нөхцөл байдал нь найр наадмаа хойшлуулахаас аргагүйд хүргэжээ.

Уг нь энэ жил Ардын намын дарга нарт ахиад олдохгүй 100 жилийн тэгш ойн баяр тохиож байгаа. Өнгөрсөн жил үзэгчгүй наадам зохион байгуулж, энэ жилийнхээ наадмын бэлтгэлийг нүсэр хийхээр бэлтгэл хангасан. Тэр бүү хэл У.Хүрэлсүх Ерөнхийлөгч наадмаар өмсөх дээлийнхээ загварыг гаргаж, оёулж эхэлсэн гэдэг.

Одоо тэд 100 жилийн ойгоо тэмдэглэх үү үгүй юү гэдэг дээрээ тулчихаад байж суух аргаа олж ядаж байгаа сурагтай. Үнэмлэхүй олонхоороо төрийн эрхийг барьж байгаа цагтаа 100 жилийнхээ тэгш ойг хийсэн шиг хийхээр төлөвлөж байтал ийн байдал буруугаар эргэлээ.

Улсын наадмаар 10 тэрбум төгрөгийн хөрөнгө төсөвлөж, нижгэр баяр хийх нь гэж, нарийн төлөвлөгөө боловсруулсан нь талаар болох гэж буйд ихэд сэтгэл дундуур байгаа гэнэ. Цаашид нөхцөл байдал хүндрэх шинжтэй байгааг эрүүл мэндийн байгууллагаас удаа дараа анхааруулж байгаа учир тэд ийн хөдөлж чадахгүй “дөнгөнд” оржээ.

Уг нь Засгийн газраас “Үндэсний баяр наадмаа явуулдгаараа явуулж, хийдгээрээ хийнэ” гэсэн байр суурин дээр бат зогсож байсан бол өнөөдөр сайд нар тодорхой хариу өгч чадахгүй асуудлаас бултах дээрээ ч тулаад байгаа гэнэ.

Үндсэндээ энэ бүх ажил нь дуусах шатандаа орж, нижгэр баяр хийдгийн даваан дээр “Ковид-19”-ийг хяналтаасаа алдаж, улсаараа нэг тараачихсан. Амьсгалын аппаратад орчихгүй л бол өөрийгөө гэртээ тусгаарлаад амиа бодохоос өөр аргагүй нөхцөлд хүрчихсэн байтал “Баяр наадмаа тэмдэглэнэ” гэж тас гүрийж байгаа нь нууц биш юм.

Ардын намын дарга нарт ДАХИАД ОЛДОХГҮЙ 100 жилийн ой

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2

Сэтгэгдэл үлдээсэн: 2021-06-15 15:50:09

зочин: Наадмын талаар энэ үед ярихын ч хэрэггүй л баймаар. Хүн амаа ковидоор хиаруулъя гэвэл л наадам хэрэгтэй байх. Хойшлуулах юмуу цуцалсан ч болно. Юун наргиан цэнгээн бэ? Эрүүл саруул явах нь л хэрэгтэй шүү. Эрүүл явбал наадамлаж, улс орны маань амьдрал цэцэглэнэ дээ. Хавтгайраад байгаа өвчлөл дийлдэхээ боливол, ер нь ч хавтгайраад дийлдэхээ больсон доо, үүнийг ухаалагаар бодоод зөв шийдвэр гаргаж олныг хамаарсан найр наадам хийхээ болих санаатай удирдагчид байна уу?
Сэтгэгдэл үлдээсэн: 2021-06-15 08:58:30

ЗОЧИН: ЭНЭ БАЛАЙ НАМЫГ АЛЬ ЕРЭН ОНД ТАРААХ БАЙСАН ЮМ ТЭГВЭЛ ЭНЭ ГУЧИН ЖИЛ ИХ ЮМ ХИЙХ БАЙЛАА. ОДОО НААД ОЛИГАРХИ ГЭМТ ХЭРГИЙН БҮЛЭГЛЭЛЭЭС ХОРИЙГ НЬ БУУДАЖ БАЙЖ Л ЭМХ ЦЭГЦЭНДЭЭ ОРНО ДОО. сингапурийн Ли гийн хэлсэн чи миний найз гэхдэээ би эх орондоо илүү хайртай гээд хорийг нь пан гэсэн гээ биз дээ.