Дөнгөж амаржсан эмэгтэйг нярай хүүхэдтэй нь коронавирусийн халдвартай хэмээн өвлийн хүйтэнд өмссөн халаад, улавчтай нь, дэр тэврүүлэн ХӨСҮТ рүү тусгаарлахаар авч явсан харгис гэмээр үйлдэл гарлаа. Улсын онцгой комиссын дарга Я.Содбаатар уучлалт гуйж, хариуцлага тооцно гэх мэдэгдэл хийгээд таг болов. Харин Эрүүл мэндийн сайд Т.Мөнхсайхан “Өргөө” амаржих газрын удирдлагуудыг хална гэв. Өнөөдөр эрх баригч нар өөр нэг сенсац олж, асуудлыг нам дарахаар төлөвлөж суугаа биз. Гэхдээ иргэд хүнлэг бус, харгис үйлдлийн хажуугаар чимээгүй өнгөрөхгүй нь лавтай.

Харин УИХ-ын эмэгтэй гишүүд үүнд анхаарал хандуулж байгаа зүйл алга. Тэд бүгд л хүүхэд төрүүлж, ээжүүдийн зовлон, жаргалыг туулсан. Одоо л тэдний дуу хоолой иргэдэд хэрэгтэй байна. Гэтэл УИХ-ын гишүүн М.Оюунчимэгээс эхлээд намаа өмөөрч, үүрэг даалгавар авсан ажилчдыг буруутгаж байна. Тэрбээр "Энд нам хамаагүй. Тухайн эмнэлэгийн эмч, ажилчдын хариуцлагагүй үйлдэл" хэмээн намаа өмөөрч байгаа юм. УИХ-ын гишүүн Ч.Ундрам, Ц.Мөнхцэцэг, Б.Баярсайхан нар цахим хуудаснаа ”Хүний эрх зөрчигдөж байгаа” талаар бичсэнээс өөр дорвитой зүйл хийсэнгүй. Бусад эмэгтэй гишүүд ч энэ асуудлын хажуугаар чихээ дараа өнгөрч байгаа бололтой. Төрийн ордонд суулт зарлаад байгаа С.Одонтуяа гишүүн ч таг. Эрүүл мэндийн салбарыг удирдаж байсан Д.Сарангэрэл гишүүн хаачив. Хүн чанар, хүний мөс ярьдаг П.Анужин яагаад дуугарахгүй байна вэ.

Гэтэл Сүхбаатарын талбайд иргэд эрхийнхээ төлөө жагсаж эхэллээ. Тэд Улсын онцгой комиссын даргыг огцрохыг шаардаж байна. Харин эмэгтэй гишүүд “Асуулга явуулна” гээд өдөр өнгөрөх бололтой. Уг нь тэд одоо л Сүхбаатарын талбайд гарч ирээд иргэдтэйгээ нийлэн, ээжүүдийнхээ эрхийг хамгаалахаар жагсах хэрэгтэй байна. Гэтэл Төрийн ордонд бүгчихээд, цахим хуудаснаа сэтгэгдэл бичээд суухаасаа ичээч.