Үндсэн хуулийн нэмэлт өөрчлөлтийн дагуу одоогийн Ерөнхийлөгч Х.Баттулгын бүрэн эрхийг хоёр жилээр сунгаж, 2023 онд Ерөнхийлөгчийн сонгуулиа хийнэ гэх мэдээллийг эрх баригч нам няцааж, Ерөнхийлөгчийн сонгуулийн товоо зургадугаар сарын 9-нд зарлачихлаа. Ирэх долоо хоногоос Ерөнхийлөгчийн сонгуулийн ажил жинхэнэ утгаараа эхлэх нь. 

Тэгэхээр энэ удаагийн сонгуульд хэн, хэн албан ёсоор нэр дэвших вэ гэдэг иргэдийн дунд хүлээлт үүсгэж байгаа юм. Одоогоор Ардчилсан намаас УИХ-ын гишүүн асан Ц.Оюунгэрэл, Монгол Ардын намаас УИХ-ын гишүүн Сү.Батболд нарын нэр дуулдаж байна. Харин Ерөнхий сайд У.Хүрэлсүх нэр дэвшихгүй гэх мэдээлэл байгаа бол одоогийн Ерөнхийлөгч Х.Баттулга дахин нэр дэвших боломжгүй гэх маргаан гараад буй юм. Гэхдээ аль алин нь сонгуулийн өмнө нэр дэвшихээр гараад ирж мэдэх л хүмүүс. 

МАН, АН-аас гадна УИХ-д суудалтай нам, эвслүүд Ерөнхийлөгчийн сонгуульд 50-аас дээш настай Монгол Улсын нэг иргэнийг нэр дэвшүүлэх эрхтэй. Тэгэхээр МАХН, ИЗНН, МУНН-ын “Та бидний эвсэл”-ээс С.Ганбаатар, Хөдөлмөрийн Үндэсний нам, Монголын Социал демократ намын “Зөв хүн электрот эвсэл”-ээс Т.Доржханд нар УИХ-д сонгогдсон учраас эдгээр нам Ерөнхийлөгчийн сонгуульд хүнээ сойх боломжтой гэсэн үг.

УИХ-ын гишүүн С.Ганбаатарын хувьд 2017 оны Ерөнхийлөгчийн сонгуульд нэр дэвшиж байсан бөгөөд энэ удаад дахин өрсөлдөх санаатай байгаагаа удаа дараа илэрхийлж байсан. Тэгэхээр МАХН-ын дарга Н.Энхбаяр эвсэж орсон хоёр намтайгаа энэ удаагийн сонгуульд С.Ганбаатарыг сойх магадлал өндөр. Нөгөө талаараа МАХН-ын дарга Н.Энхбаяр эрх баригч МАН-ын дарга У.Хүрэлсүхэд “бууж өгөх” тохироо хийсэн байхыг ч үгүйсгэхгүй. Учир нь, МАХН-ын дарга Н.Энхбаяр өнөөдрийг хүртэл чимээгүй суух хүн биш юм. 

Харин УИХ-ын гишүүн Т.Доржхандын хувьд Хөдөлмөрийн Үндэсний намын даргаар саяхан сонгогдсон. Түүнд эрх баригч МАН-ын дарга У.Хүрэлсүх, Сангийн сайд Ч.Хүрэлбаатараас эхлээд МАН-ын нөлөө бүхий гишүүд баяр хүргэсэн нь цаанаа учиртай. 

Тиймээс Т.Доржханд тэргүүтэй ХҮН-ынхан энэ удаагийн сонгуульд эрх баригч МАН-ыг дэмжиж орох нь тодорхой байна. Учир нь, Хөдөлмөрийн Үндэсний нам, тэр дундаа УИХ-ын гишүүн Т.Доржханд одоогийн Ерөнхийлөгч Х.Баттулгад “өстэй”. Саяхан Ерөнхийлөгч Х.Баттулга болон нэр бүхий хүмүүсийг “Нэр дэвших боломжгүй” хэмээн зарлаж, Үндсэн хуулийн цэцэд хандана гэдгээ мэдэгдэж байсан. Нөгөө талаар “Зөв хүн электрот эвсэл”-ээс энэ удаагийн сонгуульд нэр дэвшүүлэх хүн яригдахгүй байгаа нь ингэж харахад хүргэж байгаа юм. 

Түүнчлэн УИХ-д суудалгүй ч улс төрийн идэвхтэй үйл ажиллагаа явуулдаг жижиг нам олон бий. Тэд энэ удаагийн сонгуульд мөн л эрх баригч намд “дагаар орж”, сонгуулийн штабыг нь дэмжиж ажиллана гэх мэдээлэл байна. Мөн УИХ-ын гишүүн асан Ж.Батзандангийн ШИНЭ нам хүртэл МАН-ын талд оржээ. Учир нь, Ж.Батзандан Австрали Улсад суух элчин сайдын зөвлөхөөр явах тохироо хийгээд “амаа үдүүлчихсэн” байгаа аж. 

Харин Ардчилсан намын хувьд дотоод маргаанаа шийдэж чадахгүй байгаа. Энэ байдлаараа намын даргын суудлаа булаацалдсаар Ерөнхийлөгчийн сонгуультай золгож мэдэхээр байгаа юм. Ардчилсан намын хуучин дарга С.Эрдэнийг МАН-ын захиалгаар ажилладаг болсон хэмээн намын нөхөд нь шүүмжилж буй. Харин  намын даргын үүргийг түр орлон гүйцэтгэгч Ц.Тувааны хувьд Ерөнхийлөгч Х.Баттулгад “урвасан” гэх мэдээлэл бий. Тэгэхээр өнөөдрийг хүртэл дотоод асуудлаа шийдэж, нэгдэж чадахгүй байгаа Ардчилсан намынхан Ардын намын эсрэг өрсөлдөж чадахааргүй харагдаж байна.