Сүүлийн үед МАН-ын урдаа барьдаг эмэгтэйчүүдийн нэг болоод буй Гадаад харилцааны сайд Б.Батцэцэг УИХ-ын сонгуульд I  тойргоос Их хуралд сонгогдож, Л.Оюун-Эрдэнийн Засгийн газарт улиран суугаад байна. Тэрбээр Баянхонгор аймгийн уугуул, Дархан хотын 13 дугаар дунд сургуулийг төгсөж, МУИС-д олон улсын харилцаа, Санхүү эдийн засгийн дээд сургуульд бизнесийн удирдлагаар суралцаж төгссөн. Мөн Голландын Маастрихтийн менежментийн их сургуулийг дүүргэсэн намтартай нэгэн.

          “Мөнхийн үсэг” компанийн гэх тодотголтой түүнийг Ерөнхийлөгч У.Хүрэлсүх улс төрд хөтлөн оруулсан. Тодруулбал, Ерөнхийлөгчийг 2010 онд МАН-ын Ерөнхий нарийн бичгийн даргаар ажиллаж байх хугацаанд Ерөнхий нарийн бичгийн даргын зөвлөхөөр томилогдож, улс төрийн замналаа эхлүүлсэн. Улмаар 2011 оноос Гадаад харилцааны яаманд хэлтсийн даргаар ажиллаж, дэд сайд болон дэвшиж, өдгөө Гадаад харилцааны сайд гэх “давхар дээл” өмсөөд байна.

           Гадаад харилцааны сайд Б.Батцэцэг хувийн компаниудаа төсвийн тендерээр “тэжээдэг”-ээрээ хэзээнээсээ л алдартай байсан. Түүнийг 2016-2020 онд Гадаад харилцааны дэд сайд байх хугацаанд хувийн компаниуд нь төсвийн 41 тендерт ялж байлаа.

           2020 онд Гадаад харилцааны сайд болж дэвшсэнээс нь хойш бүр ч нэмэгдсэн. Тодруулбал, түүний эзэмшлийн “Аз хур” ХХК нь 146 тендерт, “Мөнхийн үсэг” ХХК нь 122 тендерт, “Монголын үнэт цаас” ХХК нь 78 тендерт оролцсон бүртгэл байна. “Монголын үнэт цаас” ХХК нь 2023 онд л гэхэд архи, тамхины онцгой албан татварын тэмдэг хэвлэх 2.7 тэрбум төгрөгийн тендерийн хоёр багцыг хоёуланг нь авчээ. Мөн Б.Батцэцэгт “Эко цаас” ХХК, “Эко пак монгол” ХХК гэх компаниуд бий. Сонирхуулахад, 2016 оны УИХ-ын сонгуулиар “Эко пак монгол” ХХК нь санал тоолох хайрцагны нийлүүлэгчээр ганцаараа шалгарч байлаа. 

          Б.Батцэцэгийн дөрвөн компани ийнхүү төсвийн тендер тасралтгүй “түүхэд” нөхрийнх нь үүрэг оролцоо их бий. Тодруулбал, Б.Батцэцэгийн “Аз хур” ХХК, “Монголын үнэт цаас хэвлэл” ХХК, “Мөнхийн үсэг” ХХК-уудыг нь түүний нөхөр,  Улсын начин Довдонгийн Ганбат удирддаг. Харин гүйцэтгэх захирлаар нь Б.Батцэцэгийн дүү Б.Сэргэлэн ажилладаг бол төрсөн дүү Б.Лхагвадорж нь тус компанийн хувьцаа эзэмшигчдийн нэг. Д.Ганбатын хувьд төрд эхнэрээсээ ч дутахгүй нөлөөтэй, тэр тусмаа буддын шашнаар улстөрчдийг “баздаг” нэгэн. Тодруулбал, “Бандид ламтан сан” НҮТББ, “Бурхадын зүрхэн тарни” ХХК “Монголын бурхан шашинтны нийгэмлэг” НҮББ-т хувьцаа эзэмшдэг. Мөн Д.Ганбат сонгуулиас өмнө “Жавзандамба хутагт төв” ТББ-ын тэргүүнээр ажилладаг байв. Тус төрийн бус байгууллагын Удирдах зөвлөлд УИХ-ын гишүүн Ц.Цэрэнпунцаг, Хөгжлийн банкны найдваргүй зээлдэгч гэж танигдсан “Империал гоулд майнинг” ХХК-ийн эзэн Н.Батмагнай нар бүртгэлтэй байсан. “Жавзандамба хутагт төв” ТББ олны хэл аманд өртсөн “Богд зонхова” цогцолборыг төсвийн 32 тэрбум төгрөгөөр барих “хуйвалдаан”-ы гол зохион байгуулагч гэж хэвлэлүүдээр бичигдсэнийг санаж буй байх. Мөн Д.Ганбат УИХ-ын гишүүн Ц.Цэрэнпунцаг, Ш.Адьшаа нартай “Монголын бурхан шашинтны нийгэмлэг” ТББ-ыг эзэмшиж, удирддаг.

Түүнчлэн Д.Ганбат Монголын хэвлэлийн үйлдвэрүүд, хэвлэн нийтлэгчдийн холбооны удирдах зөвлөлийн даргаар бүртгэлтэй. Нэг ёсондоо Монголын хэвлэлийн зах зээлийг Д.Ганбат баздаг гэж болно. Монголын хэвлэлийн үйлдвэрүүд, хэвлэн нийтлэгчдийн удирдах зөвлөлийн эцсийн өмчлөгч нь Содномдаржаагийн Алтантуяа гэгч нь мөн л төрийн тендер түүдэг. Түүний нэр дээр бүртгэлтэй “Содпресс” ХХК нь 2019-2024 он  хүртэл 1.1 тэрбум гаруй төгрөгийн төрийн 21 тендерт шалгарсан түүх байна.

        Эндээс харахад Б.Батцэцэгийн эргэн тойрон дахь хэдхэн хүн хэвлэлийн зах зээлийг бүрэн атгаснаас гадна нөхрийнхөө нөлөөгөөр улс төрийн томчуудтай хэзээнээс холбоотой байсан гэдэг нь тодорхой харагдаж байна.

Сонирхуулахад, Гадаад харилцааны сайд М.Батцэцэгийн сонгуулийн гол хандивлагч нь хууль бус гүйцэтгэж ажиллагаа явуулж, төрийн нууцад халдсан хэмээн хуулийн байгууллагаас шалгаж буй “Эм си эс” групп аж. Тодруулбал, Б.Батцэцэгт MCS-ийн охин компани “Энержи Ресурс” ХХК-аас 30 сая төгрөг, “Таван толгой нисэх буудал” ХХК “Ухаа худаг ус хангамж” ХХК-аас 30 сая төгрөг, “Юнайтед Пауэр” ХХК-аас 30 сая төгрөг, “Таван толгой цахилгаан станц ус хангамж” ХХК-аас 30 сая төгрөг нийт 150 сая төгрөгийн хандив өгсөн байгаа юм.