УИХ-ЫН ГИШҮҮН С.ГАНБААТАРЫН ХӨДӨӨ ХӨЛӨГЛӨЖ, ХОТОД НУУДАГ LC-300 АВТОМАШИН АТГ-ЫН ХАРААНД ӨРТЖЭЭ

2025-08-28, 212

АТГ-аас УИХ-ын гишүүн С.Ганбаатарыг авлигын хэргээр яллагдагчаар татах саналаа прокурорт хүргүүлээд буй. Саяхан С.Ганбаатар АТГ-ын хаалга татах болсон асуудлаараа тайлбар хийхдээ “Хууль хяналтынхан намайг хэдэн сар шалгаж байна. Надаас юу ч гарч ирэхгүй. Яах вэ, намайг “Land cruiser 300” унаад явж байна, хахуулиар авсан байх гээд шалгаж байгаа юм байна лээ. Би тэр машинаар тойргийнхоо сумдаар явахын тулд найзаасаа түрээсэлсэн. Минийх биш” гэж мэдэгдсэн. Ямартай ч АТГ-т шалгагдаж буй С.Ганбаатарын авлигын хэргүүд дотор “Land cruiser 300” автомашины асуудал байгаа гэсэн үг.

Тэгвэл АН-ынхан дотор С.Ганбаатарыг тэр “Land cruiser 300” автомашиныг “Мон-Лаа” ХХК-аас бэлгэнд буюу хахуульд авсан гэх шуум гараад эхэлжээ. Шалгаж үзвэл, “Мон-Лаа” ХХК-ийн захирал Х.Энхсайхан нь Баянхонгорын уугуул, С.Ганбаатарын багын найз. Бас Х.Энхсайхан нь С.Ганбаатарын туслахуудтай хоёр компани, нэг сан хамтран эзэмшдэг. Тэгээд болоогүй, С.Ганбаатарын туслахууд нь 2010 оноос хойш “Мон-Лаа” ХХК-аас цалинжиж, нийгмийн даатгалын шимтгэл төлж ирсэн гэх мэдээлэл ч байна. Гол нь, УИХ-ын гишүүн С.Ганбаатар багын найз Х.Энхсайханыхаа “Мон-Лаа” ХХК-д Хөгжлийн банкнаас 5.6 тэрбум төгрөгийн зээл авч өгсөн, авсан зээлээ төлөхгүй 10-аад жил гүрийхэд нь ч тусалсан бөгөөд энэ онд “Эрдэнэс тавантолгой” ХК-ийн туслан гүйцэтгэгч болоход нь ч тусалжээ. Өөрөөр бол, УИХ-ын гишүүн С.Ганбаатар багын найз Х.Энхсайханаасаа “Land cruiser 300” шагналд авах хэмжээний хангалттай “гавьяа” байгуулсан нэгэн аж.

УИХ-ЫН ГИШҮҮН С.ГАНБААТАР, “МОН-ЛАА” ХХК-ИЙН ЗАХИРАЛ Х.ЭНХСАЙХАН ХОЁР ХАМТАРЧ ХӨГЖЛИЙН БАНКНААС 5.6 ТЭРБУМ ТӨГРӨГИЙН ЗЭЭЛ АВААД ЧАНАРГҮЙ ЗЭЭЛИЙН АНГИЛАЛД ОРУУЛСАН

УИХ-ын гишүүн С.Ганбаатарын багын найз, Баянхонгор аймгийн уугуул Х.Энхсайханы “Мон-Лаа” ХХК нь 2014 оны наймдугаар сард Хөгжлийн банкнаас 5.6 тэрбум төгрөгийн зээл авсан. Энэ зээлээ 2017 оны арванхоёрдугаар сард төлж дуусгах ёстой байсан ч нэг ч төгрөг эргүүлж төлөөгүй. Өнөөх 5.6 тэрбум төгрөгийн зээл нь хүү, торгуультайгаа 7.5 тэрбум төгрөг болж, чанаргүй зээлийн ангилалд шилжсэн. Ингээд Хөгжлийн банкны хулгайн Түр хорооны сонсголд “Мон-Лаа” ХХК-ийг дуудсан. Гэвч “Мон-Лаа” ХХК-ийн захирал Х.Энхжаргал ирээгүй.

Гол нь, Хөгжлийн банкны хулгайн Түр хорооны сонсголын үеэр “Мон-Лаа” ХХК-аар 5.6 тэрбум төгрөгийн зээл авхуулсан гол хүн нь УИХ-ын гишүүн С.Ганбаатар гэх баримтууд гарч ирсэн. Тодруулбал, Шадар сайд Т.Доржханд “Мон-Лаа” ХХК-ийн 5.6 тэрбум төгрөгийн зээлийн асуудлаар гэрчийн суудлаас мэдүүлэг өгсөн. Ингэхдээ Т.Доржханд “Би “Монлаа” ХХК-ийн захирал Х.Энхсайхан гэдэг хүнтэй нэг удаа уулзаж байсан нь үнэн. УИХ-ын гишүүн С.Ганбаатар “Чи Сангийн яаманд ажиллаж байсан юм чинь Хөгжлийн банкнаас “Монлаа” ХХК-д зээл гаргуулахад туслаач. Миний багын найзын маань компани байгаа юм” гэж гуйсан. Тухайн үед ХҮН намын шугамаар С.Ганбаатар бид ойр дотно харилцаатай байсан. Тэгээд би С.Ганбаатарын гуйлтаар Сүхбаатарын талбайн баруун талын МҮЭХ-ны барилгад байрлах “Монлаа” ХХК-ийн оффист Х.Энхсайхантай уулзсан. Тэр үед Х.Энхсайхан “Уг нь бид хоёр Хөгжлийн банкнаас зээл авахаар зохицуулчихсан байсан юм. Гэтэл удаад байна. Энэ мөнгийг л авчихвал бид хоёр гоё болох гээд байна” гэж хэлж байсан. Түүнээс хойш юу болсныг мэдэхгүй, би тэр хоёрт туслаагүй. Би яг энэ тайлбараа хууль хяналтын байгууллагад нотлоход бэлэн” хэмээн мэдүүлсэн байдаг. Өөрөөр хэлбэл, Шадар сайд Т.Доржханд “С.Ганбаатар, Х.Энхсайхан хоёр хамтарч Хөгжлийн банкнаас “Монлаа” ХХК-аар 5.6 тэрбум төгрөгийн зээл авсан” гэж мэдүүлсэн байдаг.

“Мон-Лаа” ХХК-ийн 5.6 тэрбум төгрөгийн зээлийн ардах С.Ганбаатар, Х.Энхсайхан хоёрыг луйврыг Шадар сайд Т.Доржханд ийнхүү гэрчилсэн ч С.Ганбаатар газар авхуулахгүй нам дарж чадсан. Ингэснээр Хөгжлийн банкны хэргээс С.Ганбаатар, Х.Энхсайхан хоёрын хэн хэн хариуцлага хүлээхгүй мултарсан байдаг.

С.ГАНБААТАРЫН БАГЫН НАЙЗ Х.ЭНХСАЙХАН “ЭРДЭНЭС ТАВАНТОЛГОЙ” ХК-ИЙН НҮҮРС ОЛБОРЛОЛТЫН ТУСЛАН ГҮЙЦЭТГЭГЧ БОЛЖЭЭ

УИХ-ын гишүүн С.Ганбаатарын багын найз, “Мон-лаа” ХХК-ийн захирал Х.Энхсайхан өнгөрсөн хавраас “Эрдэнэс тавантолгой” ХК-ийн хөрс хуулалт, нүүрс олборлолтын ажилд оролцож, мөнгийг шуудайлж байгаа. Бас л УИХ-ын гишүүн С.Ганбаатарын оролцоотой Тодруулбал, Х.Энхсайханы “Ар Өү Эм мульти майниг сольюшинс” ХХК нь өнгөрсөн хавраас “Эрдэнэс тавантолгой” ХК-ийн Цанхийн баруун уурхайн хөрс хуулалт, олборлолтыг 650 тэрбум төгрөгөөр гүйцэтгэж буй “Овоот толгой ресурс” ХХК-ийн туслан гүйцэтгэгчээр ажиллаж эхэлсэн. Яаж гэхээр, “Овоот толгой ресурс” ХХК нь олон жил Х.Баттулгаас хормойдсон М.Батгэрэл, О.Энхмандах гэх хуурай дүү нарынх нь компани. Харин УИХ-ын гишүүн С.Ганбаатарын хувьд, 2022 онд Х.Баттулгын МоАХ-ны дэд тэргүүн болж, тэр цагаас салж хагацхаа больсон. 2023 онд Х.Баттулга, С.Ганбаатар хоёр “Хөх туг” хэмээх хөдөлгөөн өрнүүлж, 21 аймгийг бүтэн тойрсон. Өнгөрөгч 2024 оны УИХ-ын сонгуулиар Х.Баттулга, С.Ганбаатар хоёр хэрхэн хоршсоныг санаж буй байх. Тиймдээ ч, УИХ-ын гишүүн С.Ганбаатар багын найз Х.Энхсайханыхаа “Ар Өү Эм мульти майниг сольюшинс” ХХК-ийг “Эрдэнэс тавантолгой” ХК-ийн Цанхийн баруун уурхайн хөрс хуулалт, олборлолтыг 650 тэрбум төгрөгөөр гүйцэтгэж буй Х.Баттулгын хуурай дүү нарын “Овоот толгой ресурс” ХХК-ийн туслан гүйцэтгэгч болгосон гэсэн үг.

С.ГАНБААТАР БАГЫН НАЙЗ Х.ЭНХСАЙХАНТАЙГАА ТУСЛАХУУДААРАА ДАМЖУУЛЖ ХАЛААС НЭГТГЭДЭГ

УИХ-ын гишүүн С.Ганбаатар, “Мон-Лаа” ХХК-ийн захирал Х.Энхсайхан хоёрт Баянхонгорын уугуул, багын найзууд гэдгээс гадна халаасаа холбосон түмэн сэжүүр бий.

Жишээ нь,

“Мон-Лаа” ХХК-ийн эзэн Х.Энхсайхан нь С.Ганбаатарын туслах С.Зоригтбаатартай “Хас ньюс” ХХК-ийг 2008 онд байгуулсан.

“Мон-Лаа” ХХК-ийн эзэн Х.Энхсайхан С.Ганбаатарын туслах С.Зоригтбаатар, Н.Наранбаяр хоёртой “Ардчилал хөгжлийн монлаа сан”-г 2009 онд хамтран байгуулсан.

“Мон-Лаа” ХХК-ийн эзэн Х.Энхсайхан С.Ганбаатарын туслах С.Зоригтбаатар, Н.Наранбаяр хоёртой “Чандганы модот ой” Х-г 2011 онд хамтран байгуулсан.

“Мон-Лаа” ХХК-ийн эзэн Х.Энхсайханы хүү Э.Эрхэмсайхан нь 2012 оны УИХ-ын сонгуулиар С.Ганбаатарыг анх удаа УИХ-ын гишүүн болоход санхүүжилтийг нь босгосон.

“Мон-Лаа” ХХК-ийн эзэн Х.Энхсайхан нь С.Ганбаатарын туслахуудын цалин, нийгмийн даатгалын шимтгэлийг өөрийн компаниудын нэр дээрээс төлдөг гэх мэдээлэл бий. Жишээ нь, дээр дурдсан Хөгжлийн банкны хулгайн Түр хорооны сонсголын үеэр С.Ганбаатарын туслах С.Зоригтбаатар нь 2010 оноос хойш Х.Энхсайханы “Мон-Лаа” ХХК-аас нийгмийн даатгалын шимтгэл төлж байгаа илэрсэн. Мөн С.Ганбаатарын өөр нэг туслах О.Бямбадэлгэр өдгөө “Мон-Лаа” ХХК-ийн Дорноговь дахь уурхайг хариуцан ажиллаж байгаа.Товчхондоо, хэзээнээс хашир С.Ганбаатар багын найз Х.Энхсайхантайгаа өөрийн нэрээр хамтарсан компани байгуулдаггүй, туслахуудаараа дамжуулж халаасаа нэгтгэдэг гэсэн үг.

УИХ-ЫН ГИШҮҮН С.ГАНБААТАРЫН ХӨДӨӨ ХӨЛӨГЛӨЖ, ХОТОД НУУДАГ LC-300 АВТОМАШИН АТГ-ЫН ХАРААНД ӨРТЖЭЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.