Шинэ Засгийн газар ажлаа хүлээж авснаас хойш сар гаруйн хугацаа өнгөрлөө. Л.Оюун-Эрдэнийн танхимын 16 сайдын найм нь шинээр томилогдсон бол найм нь өмнөх Засгийн газарт ажиллаж байсан туршлагатай. Харин шинээр томилогдсон сайд нарын дунд УИХ-ын гишүүнээр сонгогдсон давхар дээлтэй сайд ч бий, анх удаа төрийн байгууллагад ажиллаж байгаа залуу улстөрч ч байгаа.
Ёстой л уулын мод урттай, богинотой гэдэг жишгээр багаа бүрдүүлж, улс төрийн халуун тогоонд “буцалж” явна. Л.Оюун-Эрдэнийн Засгийн газар харьцангуй залуу боловсон хүчнээр танхимаа бүрдүүлсэн гэгдэж, “мэргэжлийн” гэх тодотголтойгоор үйл ажиллагаагаа эхлүүлсэн. Гэвч “Сайд нар хэтэрхий унтаа, удаан ажиллаж байна” гэх шүүмжлэл сүүлийн үед хөврөх боллоо.
Ерөнхий сайд Л.Оюун-Эрдэнэ танхимын сайд нараа танилцуулах үеэр олон нийтэд хүлээн зөвшөөрөгдсөн нь Боловсрол шинжлэх ухааны сайд Л.Энх-Амгалан. Үүнийгээ ч тэр батлан харуулж байх шиг. Өөрөөр хэлбэл, Л.Оюун-Эрдэнийн Засгийн газарт бусдадаа үлгэрлэн ажиллаж байгаа нь Боловсролын сайд болж таарлаа. Түүнийг “Боловсролын салбарт сүүлийн жилүүдэд үгүйлэгдэж байсан тулгамдаж буй асуудлыг оновчтой харж, шуурхай арга хэмжээ авч байгаа” хэмээн олон нийт үнэлж байгаа . Гол нь өмнөх сайд нарынхаа хийж байсан ажлыг үгүйсгэж, халаа сэлгээ хийхгүй гэдгээ мэдэгдсэнд бүх нийт ам сайтай байна.
Харин өмнө нь хийж байсан алдаатай, хууль бус үйлдлийг нь хүлээн зөвшөөрөхгүй гэдгээ хатуухан сануулсан нь анхаарал татаж буй. Хамгийн анх “Өндөр төлбөртэй хувийн өмчийн сургуулийн хувьсах зардлыг төрөөс олгодог байсныг зогсооно” гэх мэдэгдэл хийж, “Улаанбаатарт таван сая төгрөг хүртэлх төлбөртэй 106 сургууль, 5-10 сая төгрөгийн төлбөртэй 12 сургууль, 10-аас дээш сая төгрөгийн төлбөртэй найман хувийн сургууль байна. Би өндөр үнэтэй буюу 10 сая төгрөгөөс дээш төлбөртэй сургуульд хувьсах зардлыг өгч чадахгүй” хэмээн байр сууриа илэрхийлсэн. Үүний дараа “Газраа зарсан сургуулиудын захирлыг ажлаас нь хална” гэх мэдэгдэл хийснээр түүний нэр хүнд нэлээд өсөж байх шиг. Тэрбээр “Төрийн өмчийн сургуулийн 104 тэрбум төгрөг арилжааны банкуудад байршуулсан байна. Байраа зарж, сургуулиараа бизнес хийхгүй шүү. Их, дээд сургууль бол арилжааны байгууллага биш. Та нар мөнгө хүүлдэг ломбард биш, мөнгө хүүлээд сууж болохгүй. Төрийн мөнгө төрийнхөө саванд байх ёстой. Эзэн нь юмаа мэдэж эрэг нь усаа хашина” хэмээн салбарынхандаа хатуухан сануулга өгөөд амжив.
Түүнчлэн “Боловсролын яам тендерийн яам биш шүү. 2021 онд манай яаманд дээр байгаа бүх хөрөнгө оруулалтын тендерийг Худалдан авах үйл ажиллагааны агентлагт 100 хувь шилжүүлж байна. Бид тендер зарлаад, тендерт цагаа зарцуулах ерөөсөө шаардлага байхгүй. Цаашдаа барилгатай холбоотой асуудлыг барилгын яаманд, дулаан, цахилгаантай холбоотой асуудлыг Эрчим хүчний яаманд хариуцуулах талаар хамтран ажиллана” гэсэн удаатай.
Угтаа бол салбарынхаа жаргал зовлонг ойлгох мэдрэмжтэй улстөрч энэ Засгийн газарт үгүйлэгдэж байх шиг. Харамсалтай нь, сайд нарын олонх нь цахимд хов жив хөөцөлдсөн шигээ өөрийгөө өмөөрөөд хэд хэдээр нь сошиал тролл ажиллуулаад суудаг бололтой. Ямар сайндаа л Хөдөлмөр нийгмийн хамгааллыг сайдыг өмнөх сайд нь “А.Ариунзаяа сайд ажлаа фэйсбүүкээр хийж байгаа шүү” хэмээн хатуухан шүүмжилсэн удаатай.
Мөн хуучин Засгийн газраас улиран ажиллаж байгаа найман сайд ажлаа хүлээж аваад хагас жилийн нүүр үзсэн ч өнөөдрийг хүртэл хөлөө олоогүй будилсаар байгаа нь олны шүүмжлэлд өртөж байна. Өөрөөр хэлбэл, У.Хүрэлсүх сайдынхаа итгэлийг дааж, олноос онцгойрох зангарагтай сайд өнөөдрийг хүртэл тодроогүй л байна. У.Хүрэлсүхийн Засгийн газраас Хууль зүй, дотоод хэргийн сайд Х.Нямбаатар, Эрчим хүчний сайд Н.Тавинбэх, ХХААХҮ сайд З.Мэндсайхан, Хөдөлмөр нийгмийн хамгааллын сайд А.Ариунзаяа, УУХҮ-ийн сайд Л.Ёндон, Батлан хамгаалахын сайд Г.Сайханбаяр, Зам тээврийн сайд Л.Халтар, Барилга хот байгуулалтын сайд Б.Мөнхбаатар нар улирч үлдсэн. Уг нь тэднийг анх Ерөнхий сайд асан У.Хүрэлсүх сайдаар томилохдоо салбартаа түүчээ болсон, мэргэжлийн хүмүүс хэмээн ихэд онцгойлон томилж байсныг олон нийт санаж буй биз ээ. Түүгээр ч зогсохгүй танхимаараа огцроход бусдаас нь шигшиж үлдээсэн нь ч тэр тодотголтой холбоотой. Харин өнөөдрийг хүртэлх хугацаанд энэ найман сайд Монголын ард түмэнд гавьяа байгуулсангүй.
Эхлүүлсэн ажлаа үргэлжүүлж байгаа тэдний хувьд шинэ сайд нартаа үлгэр жишээ болох хугацаа хангалттай өнгөрсөн. Харамсалтай нь, тэд бусдыгаа манлайлах нь битгий хэл хөлд нь чирэгдэх нь. Ялангуяа Л.Энх-Амгалан сайдын дөнгөж хийж, хэрэгжүүлж эхэлсэн ажлуудын тоосонд бултаараа дарагдаад, холоо хаягдчихаад байгаагаа мэдэж байгаа болов уу.
Шинэ засгийн овлигогүй, мэдлэггүй, мэдрэмжгүй, хэрүүлч, унтаа сайд нараас арай дээр нь Л.Энх-Амгалан л юм уу даа |
|