Есөн настай Н.Содгэрэлт 10 настай эгч нартайгаа есөн өрөг тоглож, гурав тэнцэж, хожигдолгүйгээр Өсвөрийн улсын аварга шалгаруулах шатрын тэмцээний  аварга болоод хэдхэн хонож байна.

33 дугаар сургуулийн 4В ангид сурдаг тэрбээр гурван настайдаа ааваараа шатар заалгаж, таван настайдаа анхын тэмцээнд орж байсан гэнэ. Н.Содгэрэлтийн анхны тэмцээн “Цодгор хүү” улсын аварга шалгаруулах тэмцээн байсан гэлээ. Тэрбээр таван настайдаа Улаанбаатар хотын аварга шалгаруулах тэмцээнд мөнгөн медаль, зургаан настайдаа улсын аварга шалгаруулах тэмцээнд түрүүлж, долоотойдоо дэлхийн аварга шалгаруулах тэмцээнээс гуравдугаар байр, мөн дөрвөн жилд нэг удаа зохион байгуулдаг Хүүхдийн их наадамд түрүүлж, 2020 оны Өсвөрийн шатарчдын улсын аварга болоод байгаа нь энэ юм. Оюун ухааны хаан гэдэг шатрын спортын ирээдүйтэй тамирчин Н.Содгэрэлттэй ярилцлаа.

-Есхөн настайдаа Өсвөрийн шатарчдын улсын аварга болсонд баяр хүргэе. Чиний гаргаад байгаа амжилтыг Монголд олон зуун хүүхэд, дэлхийд олон зуун, сая хүн хүсэж, мөрөөддөг гээд боддоо. Чиний хувьд шатар юу вэ?

-Баярлалаа. Шатар бол миний хамгийн дуртай зүйл. Бас шатар тоглох гоё. Зөв тоглож сурснаар тэвчээр сууж, бодол санаагаа цэгцэлж сурдаг гэж багш нар хэлдэг. Үнэн байх гэж боддог. Би өөрийгөө бусад найзаасаа тэвчээртэй болж байгааг заримдаа анзаардаг. 

-Тэмцээнд орохдоо өөртөө ямар нэг шаардлага, амлалт өгдөг үү?

-“Өмнөхөөсөө сайн, уран тоглолт гаргах юм шүү” гэж боддог. Гэхдээ багш маань бидэнд бусадтай эвтэй, найрсаг тоглохыг байнга захидаг. Бас заавал хожих ёстой гэж улайрч, шаралхвал олигтой амжилт гаргадаггүйг сануулдаг. Тийм болохоор тайван байхыг хичээдэг. Харин аав, ээж хоёр тэмцээн бүрийн өмнө “Айлын нүүдлийг сайн тооцоолоорой. Нүүдлээ зөв хараарай” гээд үнсдэг.

-Бэлтгэлээ хэрхэн хийдэг вэ. Шантрах үе байсан уу?

-Нэг удаа шантарч байсан. Нэг тэмцээнд амжилттай оролцож чадаагүй юм. Тухайн үед шатрын спортыг орхиё гэж бодож байсан ч дараагийн тэмцээнээс нь амжилт гаргаж, улам илүү дуртай болсон. Манай багш тэмцээн ойртохоор тоглуулдаггүй. Эгц суулгаж, хичээлээ тайлбарлаж өгчихөөд бодлого бодуулдаг. Багш стратеги, тактикийн бодлого ихэвчэн бодуулдаг. Шатраа өрчихөөд сайн нүүдлээ ол гэдэг. Би гурван шатрын ном бодож дуусгасан. Бодож дууссан номоо ч дахин боддог. Манай аав, ээж намайг дэмжиж, тусладаг болохоор би Өсвөрийн шатарчдын улсын аварга шалгаруулах тэмцээнд түрүүлсэн гэж бодож байгаа.

-Өсвөрийн улсын аваргын шагналаа авч байхдаа хэр баярласан бэ?

-Зөндөө их баярласан. Одоогоор зөвхөн шатрын тэмцээнүүдээс 42 медальтай болоод байна. Медалиа авах үед баярлаж, догдолдог ч дотроо “Дараагийнх нь хэзээ, ямар тэмцээн байгаа бол” гэж боддог.

-Чиний мөрөөдөл юу вэ?

-Би эмч мэргэжилтэй болохыг мөрөөддөг. Өвчтэй хүнийг эмчилж, эдгэрүүлэхээс гадна хамгийн гол нь хүүхдүүдэд нь хайртай хүнийг нь эрүүл болгож өгнө гэж бодохоор сайхан санагддаг. Манай хамаатны эгч эмч. Түүнийг харахаар надад сайхан байдаг. Бас өөр нэг мөрөөдөл бий.

-За.

-Өсвөрийн дэлхийн шатрын аварга болох. Багш бид хоёрын шинэ мөрөөдөл гэх юм уу даа.

-Тэгвэл улам илүү хичээх, бэлтгэх хэрэгтэй юм байна даа?

-Тийм. Жилийн өмнө шатрын мастер н.Гүндаваа багшийн шавь болж, үндсэн тактик, ойлголтуудыг заалгаж эхэлсэн. Миний хувьд өөрийгөө бэлдэхээс гадна багшийн зааж, зөвлөж байгааг маш анхааралтай сонсож, суралцахыг хичээх болно.

-Шатар тоглохоос өөр ямар хоббитой вэ?

-Сургуулийнхаа усан бассейнд сэлэх дуртай. Коронавирусийн улмаас бассейн энэ жил ажиллаагүй. Гэхдээ сэлэх хоббигоо орхихгүй.

-Чамайг амжилт гаргахаар найзууд чинь чиний өмнөөс баярлаж хүлээж авч байгаа нь мэдрэгддэг үү?

-Тийм. “Гэгээн арвай” шатрын клубын найзууд маань “Баяр хүргэе. Чи ямар мундаг юм бэ” гээд зарим нь тэвэрч, зарим нь үнсэж, зарим нь гар барьдаг. Тэгж хэлэхэд нь би урам зориг авч, бүр илүү эрч хүчтэй болдог. Клубтээ элссэнээс хойш шатар тоглох, бодлогоо хамт бодох олон найзтай болсондоо баяртай байгаа. Манай клубээс н.Зол-Учрал, н.Ану–Үжин, н.Азжаргал, н.Маргад нар сайн тоглодог. Би тэдэнтэй аваа өгөөтэй тоглодог болохоор намайг амжилт гаргахаар тэд илүү баярлаж байсан.  

-Тэмцээн дээр найзуудтайгаа таарч толгох тохиолдол нэлээд байдаг. Чиний хувьд энэ тохиолдолд хэрхэн тоглодог вэ?

-Найзуудтайгаа ширээний ард юу ч ярихгүй, шударга тоглодог. Харин тэмцээнээс гарч ирэхдээ инээлдээд найзууд хэвээрээ байдаг.

-Цаг гарган бидэнтэй ярилцсанд баярлалаа. Үеийн найзууддаа, ялангуяа шатар тоглож сурах гэж байгаа дүү нартаа юу зөвлөмөөр байдаг вэ?

-Тэвчээртэй сууж бодож сураарай. Сууж чадахгүй бол зөв нүүдэл харагдахгүй, зөв нүүж чадахгүй уран тоглох тухай бодох ч хэрэггүй шүү гэж зөвлөмөөр байна. Бас танд баярлалаа.