-НИЙГМИЙН ДААТГАЛЫН 100 ТЭРБУМ, ЭРҮҮЛ МЭНДИЙН ДААТГАЛЫН 30 ТЭРБУМ ТӨГРӨГИЙГ БУЦААЖ ӨГӨХГҮЙ ГУРВАН ЖИЛ ГҮРИЙЖ БАЙГАА “ЧИНГИСХААН БАНК”-НЫ “НУУЦ НОЁН” САНГИЙН САЙД Б.ЖАВХЛАН ГЭВЭЛ ИТГЭХ ҮҮ-
Эргэлт.мн мэдээллийн сайтын “Эрэн сурвалжлах нэгдэл”-ээс бэлтгэж буй “Б.Жавхлангийн завхрал” цувралын өмнөх дугаарт Сангийн сайд Б.Жавхлангийн төрсөн эгч Боловсрол, шинжлэх ухааны яам, Соёлын яам дамжин газрын даргын албан тушаал хашиж байгаа болон Сангийн сайд Б.Жавхлантай нэг сургууль төгссөн, нэг ТББ хамт эзэмшдэг найз нь 2018 онд ЖДҮХС-аас зээл авсан болохыг эрэн сурвалжилсан.
Тэгвэл энэ удаад Сангийн сайд Б.Жавхлан татвар төлөгчдийн мөнгийг “залгиад” хэзээ мөдгүй дампуурлаа зарлах гэж буй “Чингисхаан банк”-ны нэг “нууц ноён” болохыг илчлэх гэж байна.
Монголын төр 2017 онд татвар төлөгчдийн мөнгө буюу Нийгмийн даатгалын сан, Эрүүл мэндийн даатгалын сангийн мөнгийг хүү авч, өсгөж, эргэлдүүлэх нэрээр арилжааны 13 банкнаас “Чингисхаан банк”-ыг сонгож, хадгалуулсан байдаг. Гэтэл “Чингисхаан банк”-ны гол хувьцаа эзэмшигчид нь өөрсдөө тэр мөнгийг зээл хэлбэрээр аваад эргүүлж төлөөгүй. Улмаар тус банк дампуурлын ирмэгт ирчихээд байгаа. Монголын төр тус банканд хадгалуулсан мөнгөнийхөө үлдэгдэл буюу Нийгмийн даатгалын сангийн 100 тэрбум, Эрүүл мэндийн даатгалын сангийн 30 тэрбум төгрөгөө авах гэж сүүлийн гурван жил хөөцөлдөөд авч чадахгүй яваа. Тэгвэл Сангийн сайд Б.Жавхлан “Чингисхаан банк”-ны нэг “нууц ноён” гэвэл итгэх үү.
Уншигч та санаж буй бол 2017 онд Сангийн сайд Б.Жавхлан Банкны тухай хуульд нэмэлт өөрчлөлт оруулах тухай хуулийн төслийн ажлын хэсгийн ахлагчаар ажиллаж байсан. Тухайн үед УИХ-ын гишүүн Б.Пүрэвдорж “Б.Жавхлан гишүүн “Чингисхаан банк”-ны хувьцаа эзэмшигч. Гэтэл УИХ-аар Банкны тухай хуульд нэмэлт өөрчлөлт оруулах тухай хуулийн төслийг боловсруулах үүрэг бүхий ажлын хэсгийг ахлагчаар томилсон нь ашиг сонирхлын зөрчил үүсгэх эрсдэлтэй” гэж мэдэгдэж байсан. Гэвч тухайн үедээ Б.Жавхлан “Чингисхаан банк”-тай ямар ч холбоотой гэгдээд асуудал мартагдсан байдаг.
Тэгвэл Сангийн сайд Б.Жавхлан “Чингисхаан банк”-тай ихэд нарийн сэжмээр холбогджээ. Бид Б.Жавхланг “Чингисхаан банк”-тай холбох үндсэн хоёр “коридор” олсон юм.
КОРИДОР 1: САНГИЙН САЙД Б.ЖАВХЛАНГИЙН ЭХНЭР А.СОЁЛМААГИЙН “НЬЮГОБИ ГЕЙТ” ХХК БУЮУ “ЧИНГИСХААН БАНК”-ТАЙ ХОЛБОХ ГҮҮР
Сангийн сайд Б.Жавхлангийн эхнэр Амийлийн Соёлмаа “Хан-Уул, 11-р хороо, С-17 тоот” хаяг дээр иргэн Будням овогтой Батхүүгийн хамт “Ньюгоби гейт” ХХК-ийг эзэмшдэг юм байна. Эндээс буюу БУДНЯМЫН БАТХҮҮ гэх нэрнээс Сангийн сайд Б.Жавхлан татвар төлөгчдийн мөнгийг “залгисан” “Чингисхаан банк”-тай холбогдох сэжим эхэлж байгаа юм.
Тодруулбал,
“Чингисхаан банк”-ыг “Нью стандарт финанс” ХХК эзэмшдэг бөгөөд үндсэн хувьцаа эзэмшигчээр Дашцэрэнгийн Батаа, Шүхэртийн Бүтэд, Цэдэн-Ишийн Баярсайхан нар бүртгэлтэй байдаг. Тэднээс Цэдэн-Ишийн Баярсайхан нь тус банкны 23 хувийн хувьцаа эзэмшдэг гэх бөгөөд “Чингисхаан банк”-нд хадгалагдаж байсан Нийгмийн даатгал, Эрүүл мэндийн даатгалын мөнгөнөөс нөхөр Буднямын Батхүүгийн хамт 31 тэрбум төгрөг гаргуулж аваад эргэж төлөөгүй гэх шуум өнгөрсөн оны сүүлээс дуулдах болсон. Санаж буй бол, өнгөрсөн жилийн өдийд “Чингисхаан банк”-ны гол хувьцаа эзэмшигч Ц.Баярсайхан түүний нөхөр Буднямын Батхүү нар “Чингисхаан банк”-наас 31 тэрбум төгрөг гаргуулж аваад Дорнод аймагт үйл ажиллагаа явуулдаг Канадын хөрөнгө оруулалттай “Степп голд” ХХК-ийн 16 хувийг худалдаж авсан” гэх мэдээлэл цацагдаж байлаа.
Тэгвэл Цэдэн-ишийн Баярсайханыг судлаад үзвэл, МУИС-ийн Математикийн хүрээлэнгийн эрхлэгчээр ажиллаж байсан доктор, профессор, Шинжлэх ухааны гавьяат зүтгэлтэн Санжаагийн Буднямын бэр буюу түүний хүү Буднямын Батхүүгийн эхнэр юм байна. Бас өнгөрсөн жилээс л санхүү, бизнесийн удирдлагын чиглэлээр онлайнаар суралцаж буй бөгөөд Сангийн сайд Б.Жавхлангийн эхнэр А.Соёлмаатай үй зайгүй найзууд юм байна.
Хамгийн сонирхолтой нь, ингэж хөөгөөд үзэхээр Буднямын Батхүү гэгч нь эхнэр Ц.Баярсайханаараа дамжуулан “Чингисхаан банк”-ны гол хувьцааг далдаас эзэмшдэг бөгөөд Сангийн сайд Б.Жавхлангийн эхнэр А.Соёлмаатай хамт “Ньюгоби гейт” ХХК-ийг эзэмшигч Буднямын Батхүүтэй нэг хүн болж таарч байгаа юм. Өөрөөр хэлбэл, “Банк”-ны гэж анх танигдсан Сангийн сайд Б.Жавхлангийн эхнэр А.Соёлмаа “Чингисхаан банк”-ны гол хувьцаа эзэмшигч Ц.Баярсайхантай үй зайгүй найзууд, нөхөр Б.Батхүүтэй нь “Ньюгоби гейтс” гэх нэг компани хамтран эзэмшиж байгаа нь санаандгүй тохиолдол байх боломжгүй биз дээ.
Ингээд харвал, Буднямын Батхүү гэгч нь эхнэр Цэдэн-Ишийн Баярсайханаараа дамжуулан “Чингисхаан банк”-ны нэг “нууц ноён” болсон бол Сангийн сайд Б.Жавхлан эхнэр А.Соёлмаагаараа халхавч хийж “Чингисхаан банк”-ны нэг “нууц ноён” болсон схем илүү тод харагдаж байгаа юм.
Тэгвэл, Сангийн сайд Б.Жавхлангийн “Чингисхаан банк”-тай холбогдсон хоёр дахь коридор илүү сонирхолтойгоор схемчлэгджээ.
КОРИДОР 2: САНГИЙН САЙД Б.ЖАВХЛАНГИЙН ЭХНЭР А.СОЁЛМААГИЙН ЭЗЭМШДЭГ КОМПАНИЙН ХАЯГ ДЭЭР "ЧИНГИСХААН БАНК" БОЛОН Б.БАТХҮҮГИЙН ААВ С.БУДНЯМЫН КОМПАНИ БҮРТГЭЛТЭЙ БАЙНА
Дээр дурдсан Сангийн сайд Б.Жавхлангийн эхнэр Амийлын Соёлмаа, Буднямын Батхүү нарын “Ньюгоби гейт” ХХК-ийн бүртгэлтэй “Хан-Уул дүүрэг, 11-р хороо, С-17 тоот” гэх хаягийг улсын бүртгэлийн мэдээллийн санг шүүж үзвэл хоёр компани олдож байгаа юм.
Тодруулбал,
Баримт 1: “Хан-Уул, 11-р хороо, хатан туул, с байр, 17 тоот” гэх ижил бүртгэлээр “ОСМ агро трейдинг” ХХК гарч ирж байна. Энэ компанийг судлаад үзвэл, гүйцэтгэх захирал нь Хашчулууны Шижир-Эрдэнэ, үндсэн хувьцаа эзэмшигч нь “Чингисхаан банк” гэж гарч ирж байна. Сангийн сайд Б.Жавхлангийн эхнэрийн компанийн хаяг дээр “Чингисхаан банк”-ны эзэмшлийн компани давхар бүртгэлтэй байгаа нь бас л санаандгүй эсвэл эндүүрсэн тохиолдол гэж үү.
Баримт 2: “Хан-Уул, 11-р хороо, 6 хэсэг, зайсан гудамж, хатан туул С-17” гэх мөн ижил бүртгэлээр “Органик солюшнс монголия агро” ХХК гарч ирж байна. Энэ компанийг судлаад үзвэл Санжаагийн Будням байх ажээ. Санжаагийн Буднямыг судлаар үзэхээр, дээр дурдсан “Чингисхаан банк”-ны гол хувьцааг эхнэр Ц.Баярсайханаараа дамжуулан эзэмшигч, Сангийн сайд Б.Жавхлангийн эхнэр А.Соёлмаатай хамт “Ньюгоби гейт”ХХК-ийг эзэмшигч Б.Батхүүгийн аав байх ажээ.
Тэрбээр Ховд аймгийн Зэрэг сумын уугуул. МУИС-ийн Математикийн хүрээлэнгийн анхны эрдэмтэн нарийн бичгийн дарга, захирлаар ажиллаж байсан, багш, эдийн засагч, доктор, профессор, Монголын Улсын хөдөлмөрийн гавьяаны улаан тугийн одонт, Шинжлэх ухааны гавьяат зүтгэлтэн нэгэн юм байна. С.Будням гурван хүүтэй бөгөөд том хүү Б.Инжиннаш нь Нийслэлийн агаарын чанарын албаны дарга, “Харгиа” цэвэрлэх байгууламжийн дарга байсан, хувьдаа “Ану сервис” тэргүүтэй хэд хэдэн компанитай гэх мэдээлэлтэй. Удаах хүү нь дээр дурдагдсан “Чингисхаан банк”-ны гол хувьцаа эзэмшигч Б.Батхүү. Бага хүү Б.Буяннэмэх нь газар тариалангийн бизнес эрхэлдэг, Хүнс, хөдөө аж ахуйн тэргүүний ажилтан, Монгол Улсын Манлай уяач ажээ.
“ЧИНГИСХААН БАНК”-НЫ ХУВЬЦАА ЭЗЭМШИГЧДИЙН ҮРЭН ТАРАН ХИЙСЭН НД, ЭМД-ИЙН 130 ТЭРБУМ ТӨГРӨГИЙГ САНГИЙН САЙД Б.ЖАВХЛАНГААС НЭХ”
Ингээд харвал, нэгдүгээрт, Сангийн сайд Б.Жавхлангийн эхнэр А.Соёлмаатай хамт “Ньюгоби гейт” ХХК-ийг эзэмшиж буй Буднямын Батхүү гэгч нь “Чингисхаан банк”-ны гол хувьцааг эхнэрээрээ дамжуулан эзэмшдэг юм байна. Хоёрдугаарт, А.Соёлмаагийн эзэмшдэг компанийн хаяг дээр “Чингисхаан банк”-ны эзэмшдэг компани давхар бүртгэлтэй байдаг юм байна. Гуравдугаарт, А.Соёлмаагийн эзэмшдэг компанийн хаяг дээр “Чингисхаан банк”-ны далд хувьцаа эзэмшигч Б.Батхүүгийн аав С.Буднямын компани давхар бүртгэлтэй байдаг юм байна. Дөрөвдүгээрт, Сангийн сайд Б.Жавхлан МУИС-ийн Эдийн засгийн сургуулийг эдийн засагч мэргэжлээр төгссөн гэхээр дээрх МУИС-ийн Математикийн хүрээлэнгийн доктор С.Будням багшийнхаа гараар орж л байсан байх.
Ийм байхад Сангийн сайд Б.Жавхланг татвар төлөгчдийн мөнгийг үрэн таран хийгээд, үлдэгдэл 130 тэрбум төгрөгийг гурван жил нэхүүлээд ч өгөхгүй гүрийж байгаа “Чингисхаан банк”-тай холбоогүй гэх үү. Харин ч нэг “нууц ноён” гэдэг дүр зураг шууд харагдаж байна. Гэтэл эрүүл мэндийн даатгалын сан хоосрох дээрээ тулчихаад “Чингисхаан банк”-наас үлдэгдэл мөнгөө авах гэж өдөржин шөнөжин хөөцөлдөж байгаа гэх.
Сангийн сайд асан, УИХ-ын гишүүн Ч.Хүрэлбаатар хэдхэн хоногийн өмнө буюу аравдугаар сарын 28-нд төрийн ордонд “Чингисхаан банканд Нийгмийн даатгалын үлдэгдэл 100 тэрбум төгрөгөө яаж авахаар байгаа вэ. Өгч байна уу, үгүй юу. Бас Эрүүл мэндийн даатгалын 30 тэрбум төгрөг байгаа. Энэ мөнгийг авах талаар ямар санаачилга гаргаж байгаа вэ. Сүүлийн гурван жил хөөцөлдөөд бүтэхгүй байгаа. Үүн дээр анхаарч ажиллах хэрэгтэй. Эрүүл мэндийн даатгалын сан мөнгөгүй болох гээд байна” гэдэг асуулт асуусан.
Улсын Ерөнхий аудитор Д.Занданбат хариуд нь “Чингисхаан банканд Нийгмийн даатгал, Эрүүл мэндийн даатгалын мөнгөний үлдэгдэл 130.7 тэрбум төгрөг байгаа. Чингисхаан банкнаас одоогоор 2.1 тэрбум төгрөгийн байшин өгөхөө илэрхийлээд байгаа” гэх хариулт хэлсэн байдаг.
Чингисхаан банк 2019 оны арванхоёрдугаар сараас доголдож эхэлсэн. Тус банканд мөнгөө хадгалуулаад авч чадахгүй хохирсон иргэдийн холбоо хүртэл байгуулагдаж байсан. Зургаан салбартай байсан ч таван салбараа татан буулгаж, ердөө ганц төв салбар буюу оффис нь NCF барилгад байрлаж буй. НДЕГ, ЭМДЕГ-ийн удирдлагууд “Чингисхаан банк”-наас үлдэгдэл 130 тэрбум төгрөгөө нэхээд ч авч чадахгүй байгаа юм бол Сангийн сайд Б.Жавхлангаас нэхэх нь илүү дээр болов уу.
Б.ЖАВХЛАНГИЙН ЗАВХРАЛ-II БУЮУ НД, ЭМД-ЫН САНГИЙН 130 ТЭРБУМЫГ ЗАЛГИСАН “ЧИНГИС ХААН" БАНКНЫ “НУУЦ НОЁН” |
|