Төрийн сэнтий өвлөгддөг болох нь. Ураг удмаараа төрийн сэнтийд залрахаар улайран зүтгэгчдийн арми бий болжээ. Үүний нэг нь УИХ-ын гишүүн асан Н.Ганбямбын хүү Монгол банкны тэргүүн дэд ерөнхийлөгч асан Дөлгөөн. Тэр угтаа УИХ-ын гишүүн болох гэж зүтгэхээсээ урьтаж Хөгжлийн банкны хэрэгтээ ял сонсох байсан. Гэвч тэгсэнгүй, бүүр иргэдийг төлөөлөх гишүүн болохоор санархаж эхэллээ.

         Хөгжлийн банкны хэрэгт албан тушаал, эрх мэдлээ урвуулан ашигласан,  мөнгө угаах, хахууль авах, өгөх, санхүүгийн баримт хуурамчаар үйлдэх, ашиглах, нотлох барим хуурамчаар бүрдүүлэх, худал мэдүүлэх зэрэг гэмт үйлдлүүдээр холбогдсон 80 хүн, дөрвөн компанид яллах дүгнэлт үйлдэж, хэргийг шүүхээр шийдвэрлэсэн. Гэтэл Хөгжлийн банкны хэрэгт холбогдсон Г.Дөлгөөний хэргийг прокуророос тусгаарлах санал гаргаж, авч үлдээд сураггүй боллоо. Хэрэг нь сураггүй болж, эзэн нь төрийн сэнтий рүү зүтгэж байна гэсэн үг л дээ.

        Тодруулбал, Хөгжлийн банкны дэд захирал бөгөөд Эрсдэлийн үнэлгээ, удирдлагын газрын дарга асан Г.Дөлгөөн нь “Монгол мах экспо” ХХК-д 31.9 тэрбум, “Монгол эм импекс” ХХК-д 7.3 тэрбум, “Инжир” ХХК-д 4.7 тэрбум, “Баруун баян транс” ХХК-д 10 тэрбум, “Пирамид орд” ХХК-д 15 тэрбум төгрөгийн зээлийг тус тус хууль бусаар олгуулсан буюу ТЭЗҮ-гүй, барьцаа хөрөнгө хангалтгүй, чанаргүй зээлийн үлдэгдэлтэй, шаардлага хангахгүй, зээл олгоход эрсдэлтэй гэдгийг нь мэдсээр байж албан тушаал, эрх мэдлээ урвуулан ашиглаж тухайн компаниудад зээл олгохыг дэмжсэн хэрэгт холбогдсон. Г.Дөлгөөний уг үйлдэл бол Эрүүгийн хуулийн 22.1.2-д “Албан тушаалаа урвуулан ашиглаж, их хэмжээний хохирол учруулсан бол нийтийн албанд томилогдох эрхийг таван жил хүртэл хугацаагаар хасаж, нэг жилээс тав хүртэл хугацаагаар хорих ял шийтгэнэ” гэж яллагдах гэмт хэрэг юм. Гэвч тэр аавынхаа залгамж халааг Монголын төрд үргэлжлүүлнэ гээд гүйж явна. Авлига, албан тушаалын хэрэгт холбогдсон хэнийг ч нэр дэвшүүлэхгүй гэж амлалт өгсөн Ардын намынхан “Шинэ өнгө төрх, шилдэг боловсон хүчин” гээд Г.Дөлгөөнийг сойх нь баараггүй болжээ.  

       Хөгжлийн банкны талаарх сонсголын үеэр УИХ-ын гишүүн Т.Доржханд Г.Дөлгөөнд хандаж "Таныг Хөгжлийн банкны хэрэгт холбоотойгоор яллагдагчаар татсан” гэх мэдээлэл байсан. Энэ хэвээрээ байгаа юу. Хэрэг ямар шатандаа байгаа вэ" гэж асуухад Г.Дөлгөөн "Надад холбогдох гэх хэрэг шалгагдаж байгаа. Яллагдагчаар татагдсан хэвээрээ байгаа. Хэрэгт холбоотой мэдээлэл задруулахгүй гэх нууцын баталгаанд гарын үсэг зурсан учраас мэдээлэл өгөх боломжгүй" гэж хариулсан байдаг.

      Хариулт хэлэх боломжгүй гэж хэлснээс нь хойш жил тойрлоо. Энэ хугацаанд Г.Дөлгөөн Монгол банкны тэргүүн дэд ерөнхийлөгчийн суудлаасаа бууж, сонгуульд бэлдлээ. Өөр өөрчлөгдсөн зүйл үнэндээ алга.  

      Хэнтий аймгаас УИХ-д гурван удаа сонгогдсон Н.Ганбямба гэж хэн бэ гэхээс илүүтэй банкны салбарт 10 гаруй жил ажиллаж, Хөгжлийн банкны хэрэгт холбогдож, яллагдагчаар татагдаад байсан Г.Дөлгөөн хэн бэ гэдгийг танилцуулах нь зүйтэй болов уу. Г.Дөлгөөн нь 2008 онд МУИС-ийг Эдийн засагч мэргэжлээр төгсөж, тэр ондоо Монгол банкны Төлбөр тооцоо бүртгэлийн газарт Нягтлан бодогчоор ажилд орсон байдаг. Г.Дөлгөөн 2016 онд Хөгжлийн банкны дэд захирал бөгөөд ЭҮУГ-ын захирлаар томилогдсон.

Боловсролын байдал:

2005-2008 онд МУИС-ийг олон улсын эдийн засагч, бакалавр

2013-2015 онд Люксембургийн их сургуулийг банк, санхүүгийн магистр

Ажилласан байдал:

Монголбанканд Хяналт шалгалтын газарт хянан шалгагч, ахлах хянан шалгагч /2008-2016/

Люксембургийн  “Шродерс” хөрөнгө оруулалтын санд ажилтан-2015-2016

       Г.Дөлгөөний жилийн орлого 152 сая төгрөг бол гэр бүлийн гишүүдийн орлого нь 101 сая төгрөг байна. Тэрбээр 165 сая төгрөгийн 40 адуу, 140 үхэр, 420 хонь, 87 ямааг хөрөнгө орлогын мэдүүлэгтээ мэдүүлжээ. 62 сая төгрөгийн үнэтэй LEXUS RX 350 машин, Нийт 1 тэрбум 120 саяын үл хөдлөх хөрөнгөд нэг амины орон сууц, хоёр нийтийн орон сууц, эзэмших 0.07га-2, ашиглах 10м/кв газар багтжээ. Г.Дөлгөөн нь хадгаламждаа 313 сая төгрөгтэй, 535 саяын зээлтэй. Аавынхаа эзэмшлийн “Жононхолдинг” ХХК-ийн гүйцэтгэх захирал, Монголын хэрэглэгчдийн эрх ашгийн нэгдлийн нэг хувь, Эс ди Солюшнс ХХК-ийн хувьцаа эзэмшигч.