“Тавантолгой түлш” ХХК энэ удаагийн халаалтын улиралд нийт 430 мянган тонн бүтээгдэхүүн борлуулахаар төлөвлөжээ.

   Тодруулбал, 300 мянга гаруй тонн хагас коксон түлш, 80 мянган тонн шахмал түлшийг нийслэлийн 446 борлуулалтын цэгээр худалдаалах бөгөөд аж ахуйн нэгжүүдэд 40 мянган тонн савласан мидлинг нийлүүлэхээр төлөвлөсөн байна.

   Тус компанийн гүйцэтгэх захирал С.Даваасүрэн өвөлжилтийн бэлтгэл ажлын талаар мэдээлэхдээ, одоогоор гурван цехийн хоёр шугамаар шахмал түлш үйлдвэрлэж байгааг онцоллоо. Түүний хэлснээр, өмнө нь гурван үйлдвэрийн 20 шугамаар үйлдвэрлэл явуулдаг байсан бол 2024 оноос үйлдвэрлэлийн хүчин чадлыг цагт 50 тонн болгон гурав дахин нэмэгдүүлж, шугамын тоог цөөрүүлснээр бүтээмжийг сайжруулжээ.

  Мөн “Тавантолгой түлш” ХХК түлшний үйлдвэрлэлийн гурав дахь үеийн шилжилтийг хийж, 2025-2026 оны халаалтын улиралд нийслэлийн айл өрхүүдэд хагас коксон түлш нийлүүлсэн байна. Өнөөдрийн байдлаар 38.3 мянган тонн түлшний нөөц бүрдүүлээд байгаа ажээ.