Монгол Улсын Засгийн газраас 2027 оны улсын төсвийн төслийг УИХ-д өргөн мэдүүлэхтэй холбогдуулан Ерөнхий сайд Н.Учрал 2027 оны төсөвтэй холбоотой 9 шийдвэр гаргаснаа танилцууллаа.

1. Оюутолгойн ногдол ашгийг анх удаа Монголдоо авчирна

• Ногдол ашгийн мөнгийг аль нэг яам, албан тушаалтны шийдвэрээр бус, иргэн бүрийн хуримтлалын дансанд төвлөрүүлж, дулааны станц, арьс шир, малын вакцины үйлдвэр болон хоёр боомтыг бүрэн шинэчлэхэд зарцуулна.
• Хаана, юу хийхийг E-Mongolia платформаар дамжуулан иргэдийн дунд нээлттэй санал асуулга явуулж эцэслэнэ.

2. "ЭрдэнэсТавантолгой"-н 1072 хувьцааг жинхэнэ өмч болгоно

• Хувьцааг үр хүүхдэдээ өвлүүлэх, бэлэглэх, арилжих боломжтой жинхэнэ үнэт цаас болгож, тус компанийг нээлттэй компани болгоно.
• Төр өөрийн өмчит 10 компанийн хувьцааг дэлхийн хөрөнгө оруулагчдад санал болгож, 500 сая ам.доллар татна. ТӨК-иудаас төвлөрөх 3.5 их наяд төгрөгийг хувийн хэвшлийг дэмжихэд зориулна.

3. Татварын дарамтыг бууруулж, НӨАТ-ын босгыг нэмнэ

• Иргэд цалингийнхаа 792 мянган төгрөг хүртэлх хэмжээнд Хувь хүний орлогын татвар (ХХОАТ) огт төлөхгүй (үүний дүнд хөдөлмөрлөж буй иргэдийн дансанд 840 тэрбум төгрөг үлдэнэ).
• Жилийн борлуулалт нь 2.5 тэрбум төгрөг хүртэлх компаниуд нэг хувийн татвар төлнө.
• НӨАТ төлөгчийн босгыг 50 саяас 400 сая төгрөг болгож өсгөнө.
• 25 хувийн татварыг 15 хувийн шинэ шатлалд шилжүүлж, 600 гаруй компанийн татварын ачааллыг бууруулна.

4. Тэтгэвэр, цалинг үе шаттай нэмэгдүүлнэ

• Тэтгэвэр: 2027 оны нэгдүгээр сарын 1-ээс тэтгэвэр дунджаар 380,300 төгрөгөөр нэмэгдэж, дундаж хэмжээ нь 1,335,400 төгрөг болно. 141 мянган ахмадын тэтгэврийн зөрүүг арилгана. 2026 оны арван нэгдүгээр сарын 1-ээс ахмадуудад 100-300 мянган төгрөгийн суурь тэтгэвэр шинээр олгоно.
• Цалин: Соёл, спорт, ХАА, цаг уурч, байгаль хамгаалагч зэрэг төрийн үйлчилгээний албан хаагчдын цалинг 50 хувь, эмч нарын цалинг арван нэгдүгээр сарын 1-нээс 20 хувиар тус тус нэмнэ. 2027 оны эхний улиралд багтаан төрийн бүх албан хаагчдын цалинг инфляцтай уялдуулан нэмнэ.
• Ажил эрхэлж буй оюутан залуус Нийгмийн даатгалын шимтгэл (НДШ) төлөхгүй.

5. 16 мянган өрхийг орон сууцжуулна

• 14 мянган айл ипотекийн зургаан хувийн зээлээр, хоёр мянган айл түрээслээд өмчлөх нөхцөлөөр орон сууцанд орно.
• Төрийн барьж буй 4000 орон сууцны урьдчилгаа төлбөрийн босгыг 30 хувиас 15 хувь болгон бууруулна.

6. Эрчим хүчний найдвартай байдлыг хангаж, үнийг тогтвортой байлгана

• ДЦС-3-ын дэргэд 300 мВт хүчин чадалтай Дулааны зургаадугаар цахилгаан станц барина.
• Олон жил гацсан ДЦС-3 болон 10 аймгийн дулааны станцыг ашиглалтад оруулна. Эрчим хүчний үнийн өсөлтийг иргэдийн нуруун дээр үүрүүлэхгүй.

7. Боловсролын салбарт Google-ийн хөрөнгө оруулалт, Кембрижийн хөтөлбөр нэвтрүүлнэ

• Зургаан бүс тус бүрд Кембрижийн хөтөлбөртэй хоёр сургууль, нэг төрөлжсөн ахлах сургууль, 300 ортой 15 дотуур байр барина.
• Ирэх онд 100 мянган сурагч "Google" компьютер хүлээн авч, 100 сургууль "Google"-ийн лаборатори сургууль болно. 100 сургуулийг уурын зуухгүй, ногоон сургууль болгож шинэчилнэ.

8. Эрүүл мэндийн салбар болон ахмадын эмийн халамжийг нэмэгдүүлнэ

• Одоо баригдаж буй 39 эмнэлэг дээр нэмж 34 эмнэлэг шинээр барина.
• Ахмад настнууд даралт, зүрх судас, чихрийн шижингийн өдөр тутмын амин чухал эмээ хөнгөлөлттэй эмийн жагсаалтаар нэг ч төгрөг төлөхгүй (100% үнэгүй) авдаг болно.

9. Ногоон эрчим хүч, цахилгаан машины дэд бүтцийг дэмжинэ

• Таван аймагт баригдаж буй нарны станц дээр нэмж ирэх онд 10 нарны станц төр-хувийн хэвшлийн түншлэлээр барина.
• Орон нутгийн зам дагуу 150 км тутамд нэг байхаар нийт 500 цахилгаан машин цэнэглэх "ногоон өртөө" байгуулна.
• Нарны хавтан, хураагуур, сэргээгдэх эрчим хүчний тоног төхөөрөмжийг Гаалийн болон Онцгой албан татвараас бүрэн чөлөөлнө.