Үндэсний аудитын газраас 2025 онд төрөөс улс төрийн намуудад олгосон санхүүжилт, түүний зарцуулалтын тайлагналд аудит хийж дүгнэлт хийжээ. Улс төрийн намын тухай хуульд заасны дагуу Сонгуулийн ерөнхий хороо 2025 оны тавдугаар сард тогтоол гаргаж улс төрийн намуудад олгох төрийн санхүүжилтийн хэмжээг эцэслэн тогтоосон. Энэхүү тогтоолоор улс төрийн долоон намд 6.9 тэрбум төгрөгийн санхүүжилт олгосон байна. Үүнээс 3.8 тэрбум төгрөг буюу 55.6 хувийг зориулалтын дагуу зарцуулж, 3.1 тэрбум төгрөг буюу 44.3 хувийг намууд үйл ажиллагаандаа зарцуулсан байна.

    2025 онд МАН 2.8 тэрбум, АН 2.2 тэрбум, ХҮН нам нэг тэрбум, ИЗНН 500 сая, Монголын ногоон нам 200 сая, Шинэ нэгдсэн эвсэл 300 сая төгрөгийн санхүүжилтийг төрөөс авсан. Аудитаар намууд 191.5 сая төгрөгийг зориулалтын дагуу зарцуулаагүй зөрчил илэрчээ. Төрийн санхүүжилтийг тайлагнах, хянах шалгуурыг нарийвчлан тодорхойлсон журам заавар хуультай нийцээгүй байна. Мөн Сонгуулийн ерөнхий хорооноос улс төрийн намд олгосон төрийн санхүүжилтийг хуульд заасны дагуу зарцуулсан эсэх хяналт тавих чиг үүргээ бүрэн хэрэгжүүлээгүй байна. Улс төрийн намуудад шилэн дансны нэгдсэн цахим хуудас хөтлүүлж, ил тод мэдээллэх хуулийн хэрэгжилтийг хангаж ажиллаагүй байна гэж дүгнэжээ.

   Тиймээс төрийн санхүүжилтийн хэрхэн зарцуулах хувь хэмжээ, зардлын ангилал, шалгуур үзүүлэлт, бүртгэл тайлагналын журмыг илүү тодорхой болгох шаардлагатай гэж үзсэн байна. Үүнтэй холбогдуулан холбогдох журам, маягтыг хуульд нийцүүлэх, төрөөс олгосон санхүүжилтийн анхан шатны болон цахим төлбөрийн баримтад үндэслэн зөвхөн хуульд заасан зориулалтаар зарцуулж, тайлагнах зөвлөмж хүргүүлжээ.