УИХ-ын гишүүн, УИХ-ын Ёс зүй,сахилга хариуцлагын байнгын хорооны дарга Б.Баттөмөр өнөөдөр Монголын хөрөнгийн биржид ажиллаж,  уул уурхайн биржийн тухай, банкны тухай зэрэг хуулиудыг хэрэгжилтийн явц,  бэлтгэл ажилтай танилцлаа.  Хөрөнгийн биржээр  туршилтаар нүүрс худалдаалж эхэлсэн гурван сарын хугацаанд 370.6 тэрбум төгрөгийн орлого олжээ. Монголын хөрөнгийн биржийн захирал Х.Алтай танилцуулга, мэдээлэл хийлээ.

        2023 он гарснаас хойш Монголын эдийн засагт сэргэлт ажиглагдаж, эхний хоёр сарын дүн мэдээллээр эдийн засаг  8.1 хувийн өсөлттэй гарсан. Эдийн засаг ингэж өсөлттэй гарахад уул уурхайн бүтээгдэхүүн тэр дундаа нүүрсний экспорт голлох нөлөөг үзүүлсэн байна. Тодруулбал энэхүү 8.1 хувийн өсөлтийн 6.3 хувь нь нүүрсний экспортоос бий болжээ.  Уул уурхайн биржийн тухай хууль батлагдаж, Монголын хөрөнгийн биржээр анхны туршилтийн нүүрсний дуудлага худалдаа хийгдэж эхэлснээр дээрх нааштай үр дүн эдийн засагт бий болоод байна гэж УИХ-ын Ёс зүй сахилга, хариуцлагын байнгын хорооны дарга Б.Баттөмөр Монголын хөрөнгийн биржийн үйл ажиллагаатай танилцах үеэрээр онцолсон.

         Эрчим хүчний нүүрсийг уурхайн аман дээрээс 9.5 доллароор худалддаг байсан бол хөрөнгийн биржээр арилжаалж эхэлснээс хойш 73 долларт хүргэж, 7.5 дахин үнэ нэмэгдсэн.  Мөн коксжих нүүрсийг уурхайн амнаас 60-62 доллароор арилжаалдаг байсан бол 187 орчим долларт  хүрч, үнэ гурав дахин нэмэгдсэн байна. Өөрөөр хэлбэл Монголын хөрөнгийн биржээр нүүрсийг арилжаалж эхэлснээр далд эдийн засагт ямар боломж байсан нь ийнхүү ил болоод байна гэж УИХ-ын гишүүн Б.Баттөмөр яриандаа тодотгож байлаа. 

     Тэрбээр “Монгол Улсын Их Хурлын дарга Г.Занданшатарын захирамжаар 2022 оны 10 сард уул уурхайн биржийн тухай хуулийг УИХ-аар хэлэлцүүлэх Ажлын хэсгийг байгуулан ажиллаж, уг хуулийг 2022 оны арванхоёрдугаар сарын 22-ны өдөр баталсан. Уул уурхайн биржийн тухай хууль 2023 оны  долдугаар сарын 1-нээс хэрэгжиж эхэлнэ. Засгийн газраас нүүрсийг хөрөнгийн биржээр туршилтаар арилжаалах түр журмыг баталж, мөрдөж ажилласны үр дүнд дээр дурьдсан боломжууд гарч ирж байна.  Эдийн засгийн өсөлт 8.1 хувь болоход Монгол Улсын төсвийн орлого өмнөх жилтэй харьцуулахад  30 гаруй хувиар өслөө. Эндээс Монгол улсын хөгжлийн гарц бол баялгийн менежментийг зөв хийх юм гэдэг нь харагдаж байна” гэж байр сууриа илэрхийллээ. Нүүрсийг хөрөнгийн биржээр арилжаалж эхэснээс хойших гурван сарын хугацаанд УУХҮЯ, Монголын хөрөнгийн бирж, СЗХ-ноос гаргасан доод үнэ буюу анх дуудсан үнээс 12.4 тэрбум төгрөгөөр нэмэгдэж зарагдсан нь маш сайн үзүүлэлт гэлээ.

        Монголын хөрөнгийн биржийн гүйцэтгэх захирал Х.Алтай  хэлэхдээ, Банкны тухай хуульд орсон нэмэлт өөрчлөлтийн дагуу  банкууд олон нийтийнх болох ажил хийгдэж байна. Энэ жилийн зургаадугаар сарын 30-наас өмнө энэ ажил дуусах ёстой. Одоогийн байдлаар Төрийн банк, Голомт банк  IPO гаргаад байгаа бөгөөд бусад банкууд бэлтгэл ажлаа хангаж байгаа  талаар танилцууллаа.