Монгол Улсын 2026 оны ургацын баланс эерэг гарч, 1.1 сая тонн ургац хураан авч улаанбуудай, гурил, төмсний хэрэгцээгээ 100, хүнсний ногооны 70 орчим хувийг хангах төлөв гарчээ. Улсын хэмжээнд үр тарианы ургац хураалт 70, төмснийх 90, хүнсний ногооных 70, тэжээлийн таримлынх 50, тосны ургамлын ургац хураалт 30 орчим хувьтай байна. Энэ жил газар тариалангийн түүхэнд хамгийн өндөр ургац хураан авах төлөвтэй байгаа. 1988 оны ургацын амжилтыг эвдсэн жил болох бололтой. Газар тариалангийн салбар байгаль цаг уур, түлш шатахуун, эрчим хүч, техник тоног төхөөрөмж, зам тээвэр, ажиллах хүч зэрэг олон хүчин зүйлээс хамааралтай. Засгийн газар онцгойлон анхаарч, шаардлагатай дэмжлэг үзүүлж байна.