...Эргэх дөрвөн цагт амьд явах сайхан

              Эрээнцавд бороо орох сайхан...хэмээн яруу найрагч Данзангийн Нямсүрэн "Дөрвөн цаг" шүлэгтээ нэгэнтээ бичсэн байдаг. Манай сурважлах баг их найрагчийн нутгийг ийн дуранд буулгажээ. Наймдугаар сарын нам гүмхэн эл өдрүүдэд Эрээнцав ч мөн дуугаа хураан аниргүй байж, удахгүй айлчлах намрыг хүлээж байх шиг санагдана. Нам гүмхэн ийм л ахуйд эгэл даруухан сайхан найрагч минь амьдарч, дөрвөн цагийг угтаж, үдэж, шүлгээ тэрлэж суусан байх даа гэж бодохоор бүх зүйл нь дотно санагдаж, эрхгүй холдмооргүй, хоргодом мэдрэмж төрнө. Яг одоо Эрээнцавын тэнгэр хамгийн тодоор цэнхэртэж, хаа нэг үүлс хөвж, гэнэт нүргэлэх галт тэрэгний дуу л бүхнийг сэрээж, хүүхдүүд тоглож, хүмүүс аж төрж байна.