Булаг, шандын эхийг хашиж, хамгаалах нь байгаль экологи талаасаа маш чухал ажил.  Тэгвэл Говь-Алтай аймаг энэ чиглэлээр идэвхтэй ажиллаж байна. Тус аймгийн хувьд 2004 онд анх модон шон өргөстэй тороор булаг шандын эхийг хашиж, хамгаалах ажлыг эхлүүлэн, өөрсдийн арга барилаар сайн хийгдсэн булгийн хамгааллыг жишээ болгон ажлын даалгавар боловсруулан өнөөдрийг хүртэл 19 жил тасралтгүй зохион байгуулж, 203 булаг шандын эхийг хашиж хамгаалаад байна.            

                           Мэргэжилтнүүдийн ярьсанаар эдгээр 203 булаг, шандыг хамгаалахад дан ганц төсвийн санхүүжилтээр бус тус аймагт үйл ажиллагаа явуулдаг төсөл хөтөлбөрийн байгууллага, хувийн аж ахуйн нэгж байгууллагын санхүүжилтээр хамтран зохион байгуулдаг. Харин санхүүжилт гаргаж байгаа байгууллагууд өөрсдийн арга барил, мөнгө санхүүгийн байдалд тохируулан өөр өөр материал, хэлбэр хийц ашиглан хамгаалсан нь сайн муу янз бүр, мөн булгийн нэвчих талбайгаас гадуур дотуур хамгаалах нь цаашлаад илүү олон жил ашиглагдахгүй болох зэргээр асуудал дагуулдаг. Үүнийг шийдвэрлэх зорилгоор говь хээрийн бүс нутагт булаг, шандын эхийг хашиж, хамгаалах аргачлал, заавар, жишиг зураг, хамгаалсан булгийн гэрчилгээ, мониторингийн дэвтрийн загварыг нэгдсэн журмаар боловсруулан аймгийн Засаг даргын 2023 оны А/72 дугаар захирамжаар батлуулан мөрдөн ажиллаж байгаа ажээ.    

Булаг хамгаалах ажлыг захиалагч мөнгөндөө тааруулж, гүйцэтгэгч өөрсдийн арга барилаар хамгаалснаар янз бүрийн хэмжээ хийцтэй, хамгаалагдах талбай бүрэн хамрагдахгүй зэргээр үр дүнгүй болдог байдал одоо өөрчлөгдөх юм. Түүнчлэн хамгаалсан булаг тухайн сумын эд хөрөнгөд бүртгэгдэн гэрчилгээ бичигдсэнээр хариуцах эзэн, цаашдын арчилгаа хамгаалалт ашиглагчдад шилжих, хамгаалснаар гарах үр дүнг бодит байдлаар тооцож үнэлэхэд шаардлагатай тоон үзүүлэлтийг олон жилээр бүрдүүлэх мониторингийн дэвтэр бичигдэх ач холбогдолтой.  

                           Булаг, шандын эхийг хашиж, хамгаалах ажилд хамгийн идэвхтэй ажиллаж байгаа байгууллага бол Дэлхийн байгаль хамгаалах сан (WWF)-гийн Монгол дахь хөтөлбөрийн газар юм. Тус байгууллагын санаачилга, санхүүжилтээр орон нутгийн байгууллага, иргэдийн оролцоотойгоор дэлхийд нэн ховор монгол бөхөнгийн тархац нутагт 26 булаг,  цоохор ирвэсийн тархац нутагт найман булаг нийт 34 булгийн эхийг хашиж, хамгаалсан байна. Булгийн эхийг хашиж, хамгаалснаар ундарга нэмэгдэх, урсац задгайрч урсах тусам мал, зэрлэг амьтдын усан хангамж сайжрах нөхцөл бүрдэж байгаа ажээ.