Монголын анхны “Балдорж” шагналт редакц, МСНЭ-ийн “Ган үзэг” шагналт “Оюунлаг эргэлт медиа групп”-ийн дэргэдэх Ergelt.mn мэдээллийн сайтын сэтгүүлчид “Сүүлчийн нүүдэлчид” номоо монгол, англи хэлээр хэвлүүлэн, дэлхийн уншигчдад хүргэж байгаа билээ. Унгар Улсын уншигчдын гарт хүрээд байгаа тус хөрөг номыг Австри Улсын нийслэл Вена хотод амжилттай нээлээ.

     Номын нээлтэд оролцсон зочид сэтгэл хангалуун байгаагаа илэрхийлж, "Сүүлчийн нүүдэлчид" номыг Герман хэлээр хэвлүүлж, Австрийн болон бусад орны эгэл жирийн уншигчид, эрдэмтэн судлаачдын хүртээл болгох талаар санал солилцлоо. 

  Харин Австри Улсын Олон улсын сэтгүүлчдийн холбооны Ерөнхий нарийн бичгийн дарга Бирол Келич "Монгол орны олон зохиолч ном бүтээж, бидэнд танилцуулахаар ирж байсан ч сэтгүүлчид сэтгүүл зүйн бүтээлээ ийн дэлгэж байгаа нь анхны тохиолдол боллоо. Сайн, сайхан бүтээл болсон байна, багт баяр хүргэж, амжилт хүсье. Монгол Улсын соёл, нүүдэлчин ардын эгэл жирийн амьдралыг "Сүүлчийн нүүдэлчид" номоос дэлхийн англи хэлтнүүд унших, мэдэх боломжтой болжээ" гэсэн юм.