Ерөнхий сайд Л.Оюун-Эрдэнэ Засгийн газрын ээлжит бус хуралдаанаас гарсан шийдвэрийн талаар мэдээлэл өглөө.

Тэрбээр “Засгийн газрын үйл ажиллагааны хөтөлбөр батлагдсанаас хойш 100 хонож байна. Тиймээс сайд нарт өгөгдсөн албан даалгаврын биелэлтийг тус бүрээр дүгнэж ярилцлаа. Уламжлал ёсоор өнгөрсөн хугацааны эдийн засгийн биелэлтийг үзлээ. Мөн нийслэлийн агаарын бохирдлын талаар шинээр байгуулагдсан үндэсний хороотой шуурхай үйл ажиллагааны төлөвлөгөөг хэлэлцэж баталлаа. Өнөөдрийн байдлаар Монгол Улсын эдийн засгийн өсөлт таван хувьтай, валютын нөөц 4.9 тэрбум ам.доллар оны эцсээр таван тэрбум ам.долларт хүрнэ гэсэн хүлээлттэй байна. Монгол Улсын төсөв 1.3 их наядын төгрөгийн ашигтай гарсан. Тиймээс хөгжлийн сан руу 50 хувь нь орох боломж үүссэн. Экспортын орлого 15.7 тэрбумд хүрсэн, үүнээс нүүрсний экспорт 81.8 сая тонн буюу түүхэн дээр амжилтад хүрсэн. Хамгийн дээд хэмжээгээрээ тээвэрлэсэн гэсэн үг. Баялагийн сан мөнгөжиж байгаа учраас олон улсад баялгийн сангийнхаа менежментийг гаргах шаардлагатай. Өөдлөн дэвжих бэлгэдлээ бодож их хааныхаа нэрээр нэрлэх нь зөв гэж үзсэн. Олон улсад үндэсний баялгийн сан маань Чингис бонд гэх нэрээр танигдана. Үндэсний сан буюу ирээдүйн өв санд дөрвөн их наяд төгрөг хуримтлагдсан. Ирээдүйн өв сангийн дөрвөн их наяд төгрөгийг арвижуулах байдлаар захиран зарцуулах эрх нээгдсэн. Иргэдийн хуримтлалд 495 тэрбум төгрөг нэрийн хадгаламжид бүртгэгдлээ. Иргэн бүрд 135 мянган төгрөгийн хадгаламж үүссэн гэсэн үг. Энэ хадгаламжийн мөнгийг бэлнээр зарцуулагдахгүй эрүүл мэнд, боловсрол, орон сууцжуулалтад зарцуулах боломжтой"  гэв.