Тээврийн цагдаагийн албанаас цахилгаан скүүтер, суррон дугуй, цахилгаан моторт тээврийн хэрэгслээс үүдэлтэй осол, гэмтлийг судалж, урьдчилан сэргийлэх чиглэлээр санал солилцох уулзалт, хэлэлцүүллгийг зохион байгууллаа.

ТЦА-ны Урьдчилан сэргийлэх хэлтсийн дарга Б.Очирбат “2024 оны эхний долоон сарын байдлаар скүүтер, сурронтой холбоотой зам тээврийн ослын 241 дуудлага бүртгэгдэж, 121 иргэн бэртэж, гэмтсэн. Үүний 229 буюу 95 хувь нь Улаанбаатар хотод бүртгэгдсэн.

Суррон, скүүтер гэсэн хоёр төрлийн тээврийн хэрэгслийг өсвөр насныхан ямар нэгэн зөвшөөрөлгүйгээр  унаж, гэмтэж бэртэж байна. Осол гэмтэлд өртөж байгаа иргэдийн дийлэнх хувийг 18-аас доош насныхан эзэлж байна. Тиймээс скүүтер түрээслэгч байгууллагууд хяналтын системээ сайжруулах хэрэгтэй байна. Тухайлбал, АПП дээрээ насны хязгаарлалт хийх, явган хүний замаар явсан тохиолдолд хөдөлгөөнийг автоматаар зогсоодог болгох зэрэг зохицуулалтуудыг хийх шаардлагатай. Мөн хоёр, гуравдугаар эгнээгээр бусад тээврийн хэрэгсэлтэй давхцаж, сүлжсэнээр жолоочид харагдахгүйгээр осолд өртөж, дүрэм зөрчиж байгаа үйлдлүүдийг цахим системээр хянах хэрэгтэй байна.

Манай орны хувьд  эдгээр төрлийн тээврийн хэрэгслийг тусгайлан явуулах боломж нөхцөл хараахан байхгүй. Зам, замын байгууламжийн хувьд нэг хэсэг явж байгаад тасарчихдаг учир замын зорчих хэсгээр орж ирдэг. Иймээс хүүхэд, залуучууд явган хүний замаар явах болж байна.

Эдгээр тээврийн хэрэгслийг хурдны хувьд авч үзвэл замын хөдөлгөөний дүрэмд зааснаар скүүтэр нь мопедны төрөл, суррон нь мотоциклын төрлийн тээврийн хэрэгсэлд хамаарна. Иймээс дүрэм ёсоор бол энэ төрлийн тээврийн хэрэгслийг 16 нас хүрсэн хүн, хамгаалах малгайтай, явган хүний замаар бус зорчих хэсгийн баруун гар талаар явах ёстой. Зөвхөн гүйцэж төрүүлэх, саад тойрох үед л эгнээ солих бусад үед сүлжиж явах нь хориотой. Гэвч замын хөдөлгөөний холбогдох дүрэм болоод мэдлэг мэдээлэл байхгүйгээс үүдэн түгжрэлийг хурдан туулах зорилгоор үүнийг зөрчин явж байгаа хүндрэлтэй асуудлууд гарч байна” гэв.