Хүний эрхийн үндэсний комиссоос ОХУ-ын Ерөнхийлөгчийн айлчлалын үеэр үзэл бодлоо илэрхийлэх арга хэмжээ зохион байгуулах явцад саатуулсан иргэдийн талаар мэдээлэл өглөө.

      Энэ үеэр Гомдол, хяналт шалгалтын хэлстийн дарга Г.Ууганбаатар "ОХУ-ын Ерөнхийлөгч албан айлчлал хийсэнтэй холбоотойгоор иргэд үзэл бодлоо илэрхийлсэн. Иргэдийн үзэл бодлоо илэрхийлэх арга хэмжээ зохион байгуулах явцад цагдаагийн байгууллагын зүгээс саатуулсан. Харин Хүний эрхийн үндэсний комиссоос хяналт шалгалт тавьж ажилласан. Иргэд жагсаал цуглаан хийх, үзэл бодлоо илэрхийлэх эрх нээлттэй. Гагцхүү энэ удаагийн айлчлал бол тусгайлсан горимоор буюу Төрийн тусгай хамгаалалтын горимоор хуульд заасны дагуу хамгаалалтын гурван зэрэглэлтэй зохион байгуулж байгаа. ОХУ-ын Ерөнхийлөгчийн албан ажил нь хуульд заасны дагуу нэгдүгээр зэрэглэлийн хамгаалалт авагдсан. Энэ дагуу тухайн арга хэмжээний үеэр жагсаал цуглаан хийж, үзэл бодлоо илэрхийлсэн иргэдийг хамгаалалтын хоёрдугаар зурваст үзэл бодлоо илэрхийлэх нь нээлттэй гэсэн. Гэтэл иргэд хамгаалалтын нэгдүгээр бүсэд үзэл бодлоо илэрхийлсэн учир саатуулсан байна. Төрийн тусгай хамгаалалтын тухай хуулийн 12 дугаар зүйлийн 12.1.5-д зааснаар хамгаалалтын бүсэд жагсаал цуглаан хийхийг хориглосон байдаг. Зөрчил гаргасан иргэдийг саатуулж цагдаагийн газарт хүргэхдээ хүч хэтрүүлэн хэрэглэсэн байж болзошгүй нөхцөл байгаа. Энэ нөхцөл байдлыг Цагдаагийн ерөнхий газрын дотоод хяналт, шалгалтын хэлтсээс албаны шалгалтыг явуулж байгаа" гэв.