Сүхбаатар дүүргийн зургадугаар сургуулийн дөрөвдүгээр ангийн багш О.Одончимэг захирлынхаа мөнгө идсэн баримтыг ил болгосныхоо төлөө ажлаасаа халагдсан гэх мэдээлэл бий. Энэ талаар тус сургуулийн бага ангийн багшаар ажиллаж байсан О.Одончимэгээс зарим зүйлийг тодрууллаа.

Тэрбээр “Би Боловсролын салбарт 30 жил ажиллаж байна. Зургадугаар сургуульд ажиллаад 23 жил болж байгаа. Манай сургуульд 2022 оны гуравдугаар сараас Э.Түвшинсайхан захирал ажиллаж эхэлсэн. Гэтэл захирал маань удаа дараа сургуулийн спорт заалны төлбөрийг хувьдаа авдаг байсан. Түүний энэ хууль бус үйлдлийг холбогдох газруудад мэдэгдэж байсан. Э.Түвшинсайхан манай сургуулийн захирал болсноосоо хойш 31 сая төгрөг хувьдаа авсан байгаа юм. Түүнд ёс зүйн хариуцлага тооцож, өнгөрсөн наймдугаар сард дөрвөн сая төгрөгөөр торгож байсан. Түүнээс гадна удаа дараа сахилгын шийтгэл ногдуулж байсан ч алдаагаа засдаггүй. Тэгээд өнгөрсөн тав дахь өдөр багш нарын хурал зарлаж, "О.Одончимэгтэй ажиллах уу, Э.Түвшинсайхантай ажиллах уу" гэх санал хураалт явуулж, багш нараар намайг халуулсан. 30 жил боловсролын байгууллагад ажиллачихаад шүгэл үлээснийхээ төлөө хэлмэгдчихлээ. Э.Түвшинсайхан захирлыг АТГ-аас шалгаж байгаа” гэв.