Эмэгтэйчүүдийн эрх гэдэг нь хүний эрх юм. Энэ нь ямар нэгэн тусдаа ойлголт биш бөгөөд харин хүний эрхийг тэгш эдлэх боломжоор хангах талаарх ойлголт ажээ. Нэгдсэн үндэстний байгууллагаас тунхагласан 70 гаруй жилийн нүүр үзсэн Эмэгтэйчүүдийн эрх нь дэлхийн өнцөг буланд хүн бүрийн эдэлбэл зохих хүний суурь эрх юм. Эдгээр эрхүүдэд хүчирхийлэл, боолчлол болон ялгаварлан гадуурхалтаас ангид байх эрх, боловсрох эрх, өмч хөрөнгө эзэмших эрх, сонгох эрх, шударга бөгөөд тэгш цалин хөлс авах эрх зэрэг эрхүүд багтдаг.

            Монгол Улс 1955 оны гуравдугаар сарын 8-наас  хойш эмэгтэйчүүдийн эрхийг хамгаалах өдрийг тэмдэглэж эхэлжээ. Энэ өдрийг бүх нийтийн амралтын өдөр болгон тэмдэглэн өнгөрүүлдэг. Монголчуудын хувьд энэ өдөр эмэгтэйчүүдэд цэцэг, бэлэг өгөх, тэдний эрхийн талаар олон нийтэд таниулах үйл ажиллагааг зохион байгуулдаг. Мөн эмэгтэйчүүдийн эрхийг хамгаалахаар Монголын эмэгтэйчүүдийн холбоо, Монголын эмэгтэйчүүдийн сан гэсэн байгууллагууд үйл ажиллагаа явуулдаг. Тус байгууллагууд нь жендерийн тэгш байдал, эмэгтэйчүүдийн нийгэмд эзлэх байр суурь, эрүүл мэнд сурч боловсрох орчин нөхцөлийг бүрдүүлэхээр ажилладаг юм. Жил бүрийн эмэгтэйчүүдийн эрхийг хамгаалах өдрөөр сургалт, зөвлөгөөн эрхийн төлөөх жагсаал болдог байна. Энэ өдрийн гол утга учир нь эмэгтэйчүүдийн эрх тэгш байдлын төлөө шийдвэрүүдийг гаргахад оршдог.

Нийт 80 гаруй улс олон улсын эмэгтэйчүүдийн эрхийг хамгаалах  өдрийг тэмдэглэн өнгөрүүлдэг байна.

       Польш: Польшууд Олон улсын эмэгтэйчүүдийн эрхийг хамгаалах өдөр амардаггүй ч гэсэн ЗХУ-ын үеэс уламжлагдаж ирсэн баяраа мартаагүй. Энэ өдөр польш эрчүүд эмэгтэйчүүддээ баяр хүргэж,  цэцгийн баглаа бэлэглэдэг байна.

     Вьетнам: Вьетнамчууд эмэгтэйчүүдийн өдрийг 200 жилийн турш тэмдэглэж ирсэн түүхтэй. Энэхүү өдрийг дээр үед “Чынг овогт эгч дүүсийг дурсах өдөр” хэмээн тэмдэглэдэг байжээ. Чынг овогт эгч дүүс дайны үеэр вьетнам үндэстний эрх чөлөөний төлөө тулалдсан эрэлхэг бүсгүйчүүд юм. Ялалтын өдрөөс хойш тэднийг дурсах өдөр Мартын 8-ны баяраар солигджээ. Энэ өдөр эрэгтэйчүүд эмэгтэйчүүддээ хамгийн гоё магтаалын үгсийг хайрлаж, хүндэтгэл үзүүлдэг байна.

     Франц: Франц улсад Олон улсын эмэгтэйчүүдийн эрхийг хамгаалах өдөрийг мөн Литва улс шиг орон даяар өргөн тэмдэглэдэггүй байна. Тодруулбал, ихэвчлэн орос хэлтэй мужуудад болон коммунист үзэлтэй хүмүүс л  Мартын 8-ны баярыг  тэмдэглэдэг аж. Францчууд жил бүрийн гуравдугаар сарын эхний долоо хоногт “Эмээ нарын баяр”, харин тавдугаар сард “Ээжүүдийн баяр”-ыг  албан ёсоор тэмдэглэдэг байна.

       Итали: Итали улсын хувьд Олон улсын эмэгтэйчүүдийн эрхийг хамгаалах өдөр албан ёсны баяр биш ч гэлээ охид бүсгүйчүүд, эмэгтэйчүүд нь өргөн хүрээнд тэмдэглэдэг байна. Яагаад охид бүсгүйчүүд, эмэгтэйчүүд гэж тодотгож байна вэ гэхээр хамгийн сонирхолтой нь Мартын 8-ны баярыг эмэгтэйчүүд эрэгтэйчүүдтэй хамт тэмдэглэдэггүй. Охид бүсгүйчүүд, эмэгтэйчүүд хотынхоо томоохон ресторануудад хүлээн авалт зохион байгуулж хоорондоо бэлэг солилцдог уламжлалтай. Харин оройн цагаар шөнийн цэнгээний газрууд эмэгтэйчүүдэд тасалбаргүй байх аж. Тус улсад 1946 оноос хойш мимоза  цэцэг Мартын 8-ны баярын гол бэлгэдэл болжээ.

Энэ өдрийг улс бүр өөрсдийн соёлын дагуу тэмдэглэн өнгөрүүлдэг. Гэвч тухайн өдөр хайртай эмэгтэйдээ зөвхөн цэцэг, чихэр өгөх бус тэдний эрхийг хамгаалахад зориулсан ажлыг хийж байх нь бодитоор тэдний баярыг тэмдэглэж өгч байгаа хэрэг юм. Мөн зөвхөн гуравдугаар сарын 8-нд бус өдөр бүр бүх эмэгтэйчүүдийн эрхийн өдөр байлгаж, тэгш жендерийн ялгаварлан  гадуурхалтгүй өнгөрүүлж байх нь эмэгтэйчүүдэд өгч байгаа нандин бэлэг юм.