Бага насны хүүхдүүд хүний наймааны хохирогч, бэлгийн мөлжлөгийн золиос болж байгаа талаар албаны танил маань ярьж байна. Өсвөр насны охидыг хүчээр биеийг нь үнэлүүлэх, айлган сүрдүүлж, дарамталж, эрхшээлдээ байлгаж гэмт хэргийн золиос болгох нь нэмэгдэж байгаа харамсалтай мэдээг дуулгаж байгаа юм. Энэ нь фэйсбүүк болон цахим сүлжээний замбараагүй хэрэглээнээс үүдэлтэй. Мөн эцэг, эх, асран хамгаалагчийн анхаарал, халамж сул, үл хайхралаас болж уг гэмт хэрэг гарах нөхцөл бүрдэж байна гэсэн.

Тэгвэл сэрэмжлүүлэг болгох үүднээс дараах мэдээллийг бэлтгэн хүргэж байна.

ӨНГӨРСӨН 2023 ОНД 18 ХҮҮХЭД ХҮНИЙ НАЙМААНЫ ХЭРГИЙН ХОХИРОГЧ БОЛЖЭЭ

    Хүүхдийн тусламжийн 108 утсанд өнгөрсөн 2023 онд 111223 дуудлага, мэдээлэл бүртгэгджээ.  Үүнээс хүүхдийн эрх зөрчигдсөн зорилтод дуудлага нь 64304  байсан байна. Зорилтот дуудлагыг ангилж үзвэл 18 хүүхэд хүний наймааны хохирогч болсон байж болзошгүй ноцтой мэдээлэл байгаа аж.

Албаны эх сурвалжийн мэдээлж буйгаар “Насанд хүрээгүй хүүхдийг хүчээр биеийг нь үнэлүүлэх, гадаад, дотоодын хүмүүст зуучилж, танилцуулах, эрхшээлдээ байлгах тохиолдол гарсаар байна. Цагдаагийн болон Хүүхэд хамгааллын утсанд хүний наймааны золиос болсон байж болзошгүй 18 дуудлага, мэдээлэл ирсэн. Үүний дагуу хууль хяналтын байгууллагынхан шалгалтын ажиллагааг явуулж байна. Мөрдөн шалгах ажиллагааны хүрээнд нэр дурдагдсан 18 хүүхэд хохирогч болсон эсэхийг тогтооно. Ямартай ч энэ 18 хүүхэд хохирогч болсон байж болзошгүй учраас шалгалтын ажиллагаа явуулж байгаа” гэлээ.

       Өөр нэг эх сурвалжийн мэдээлж буйгаар насанд хүрээгүй хүүхдийг хүчээр биеийг нь үнэлүүлдэг бүлэглэл газар авч байгаа гэнэ. Хууль хяналтын байгууллагад мэдэгдсэн нь 18 хүүхдийн хэрэг байгаа болохоос хаалттай хаалганы цаана үйлдэгдэж байгаа хэрэг олон гэдгийг онцолж, анхааруулж байлаа. Хамгийн сүүлийн жишээ гэхэд насанд хүрээгүй хүүхдүүдийг биеийг нь үнэлүүлдэг бүлэглэлийг илрүүлж, цагдаагийн байгууллагаас шалгаж, шүүхэд шилжүүлээд байна.

НАСАНД ХҮРЭЭГҮЙ ХҮҮХДҮҮДИЙГ ХЯТАДЫН ИРГЭНД ЗУУЧИЛЖ, БИЕИЙГ НЬ ҮНЭЛҮҮЛСЭН ХЭРГИЙГ ШҮҮХЭД ШИЛЖҮҮЛЖЭЭ

 Тодруулбал,

-2023 оны гуравдугаар сарын 25-26-нд шилжих шөнө Баянгол дүүргийн нутаг дэвсгэрт байрлах зочид буудалд насанд хүрээгүй эмэгтэй хүүхдийг бусдад зуучилжээ. Түүнийг 16 насанд хүрээгүй болохыг мэдсээр байж бэлгийн харьцаанд орсон үйлдэлд БНХАУ-ын нэг иргэн болон зуучилсан Монгол Улсын иргэн Х, Э нарт холбогдуулан Эрүүгийн хуулийн 13.1 дүгээр зүйлийн 1 дэх хэсэг, мөн хуулийн 12.5 дугаар зүйлийн 1 дэх хэсэгт тус тус зааснаар эрүүгийн хэрэг үүсгэж, яллагдагчаар татан мөрдөн шалгах ажиллагаа явуулж, хэргийг шүүхэд шилжүүлэх саналтай прокурорт,

-Насанд хүрээгүй хоёр эмэгтэйг хууран мэхэлж, эмзэг байдлыг нь далимдуулан, хүч хэрэглэж, хүч хэрэглэхээр заналхийлсэн. Улмаар 2023 оны нэгдүгээр сараас хойш Баянгол, Баянзүрх, Сонгинохайрхан дүүргийн нутаг дэвсгэрт бусдад биеийг нь үнэлүүлсэн гэх үйлдэлд иргэн Н, Т нарыг холбогдуулан Эрүүгийн хуулийн 12.6 дугаар зүйлийн 2 дахь хэсэгт зааснаар эрүүгийн хэрэг үүсгэж, яллагдагчаар татан мөрдөн шалгах ажиллагаа явуулж, хэргийг шүүхэд шилжүүлэх саналтай прокурорт,

-Насанд хүрээгүй дөрвөн эмэгтэйн эмзэг байдлыг далимдуулан бусдад биеийг нь үнэлүүлж, хүн худалдаалах гэмт хэргийг хүндрүүлэх нөхцөл байдалтайгаар үйлдсэн гэх хэрэгт Н нарын зургаан хүнд холбогдуулан Эрүүгийн хуулийн 13.1 дүгээр зүйлийн 2 дахь хэсгийн 2.1, 2.2 хэсэгт тус тус зааснаар эрүүгийн хэрэг үүсгэж яллагдагчаар татан мөрдөн шалгах ажиллагаа явуулж, хэргийг шүүхэд шилжүүлэх саналтай прокурорт хүргүүлжээ.   

ТӨРСӨН ОХИНЫХОО БИЕИЙН ҮНЭЛҮҮЛДЭГ БАЙСАН ЭМЭГТЭЙГ ШАЛГАЖ БАЙНА

       Мөн үүнээс гадна насанд хүрээгүй охиныхоо биеийг үнэлүүлдэг байсэн хэрэг гарсан. Тодруулбал, төрсөн ээж нь 15 настай охиныхоо биеийг үнэлүүлж, мөнгийг нь өөрийнхөө дансаар авдаг байсан хэргийг цагдаагийн байгууллагаас илрүүлээд шалгаж байгаа.

       Энэ хэргийн талаар албанаас өгсөн мэдээллээр “Насанд хүрээгүй охиноо биеийг нь үнэлүүлдэг байсан хэргийг илрүүлсэн. Цагдаагийн байгууллагаас шалгалтын ажиллагаа явуулж байгаа” гэсэн байдаг.

Уг хэрэг нь Улаанбаатар хотод үйлдэгдсэн бөгөөд төрсөн ээж нь охиноо болон бусад насанд хүрээгүй охидыг зуучилж, биеийг нь үнэлүүлдэг байсан байж болзошгүй. Тэрбээр охиндоо хандаж “Битгий маяглаад бай. Зүгээр яваад ир. Мөнгөө над руу хий” гэх зэргээр тулган шаардаж байсныг нь мөрдөн шалгах ажиллагааны хүрээнд илрүүлээд байгаа гэнэ.

18 хүүхдээс хэдийг нь хил давуулж, биеийг нь үнэлүүлсэн, гадаадын иргэнд зуучилсан уу, хэдэн удаагийн үйлдлээр уг гэмт хэргийг золиос болгосон бэ гэдэг нь мөрдөн шалгах ажиллагааны хүрээнд тогтоогдох ажээ.

ӨНГӨРСӨН 2023 ОНД 420 ХҮҮХЭД БЭЛГИЙН ХҮЧИРХИЙЛЛИЙН ХОХИРОГЧ БОЛЖЭЭ

       Хүний наймааны золиос, хохирогч болохоос гадна насанд хүрээгүй хойд аав, төрсөн эцэг, ураг төрлийнхөндөө хүчирхийлэх нь нэмэгдэж байгаа харамсалтай мэдээ байна. Тодруулбал, өнгөрсөн 2023 онд гэхэд л 420 хүүхэд хойд эцэг, төрсөн аав, ураг төрөл, ах, дүүдээ хүчирхийлсэн дуудлага, мэдээлэл бүртгэгджээ.

Энэ талаар Гэр бүл, хүүхэд, залуучуудын хөгжлийн газрын Хүүхдийн эрхийн хууль эрх зүйн асуудал хариуцсан мэргэжилтэн Д.Цэрэндуламаас тодрууллаа.

          Тэрбээр “Өнгөрсөн онд бэлгийн хүчирхийлэлд өртсөн 420 хүүхдийн дуудлага бүртгэгдсэн. Бэлгийн хүчирхийлэлд өртсөн хүүхдүүдийг харьяа орон нутаг, хорооных нь анхан шатанд нэгжид бүртгээд, шаардлагатай үйлчилгээг үзүүлсэн. Бэлгийн хүчирхийллийг хэн үйлдээд байна вэ гэхээр ураг төрлийн холбоотой, хамаатан садан, хойд эцэг, төрсөн аав, ах, дүү, аав, ээжийнх нь найз нөхөд л үйлдэж байна. Үл таних этгээдэд хүчирхийлүүлсэн тохиолдол 420 дуудлагын хоёр хувийг эзэлж байна. Бэлгийн хүчирхийллийн дуудлага жилээс жилд өсөж байгаа. Гэхдээ энэ нь илрүүлэлт сайн байгаагийнх нөгөө талаар энэ төрлийн гэмт хэргийг мэдээлдэг 108 төвийн утас ажиллаж эхэлсэнтэй холбоотой. Хохирогч хүүхдүүд өөрсдөө холбогдож дуудлага өгөх тохиолдол ч бий болж байна. Эцэг, эхийн хараа хяналтгүй, гэр бүлийн орчин сул хүүхдүүд л ийм төрлийн гэмт хэрэгт өртөж байна. Хүүхдүүдийг хэдэн цагт ганцаараа байдаг, өдрийг хаана өнгөрүүлдэг, ар гэрийнхэн нь араас нь явахгүй, эрх зүйн мэдлэггүй зэргийг далимдуулж ах, дүү, ураг төрлийнхөн буюу ойрын хүмүүс нь энэ төрлийн гэмт хэргийг үйлдэж байна. Тэгээд ар гэрийнхнийг нь ална, ах, эгчийг чинь зодно зэргээр айлган сүрдүүлж, нууцын зэрэглэлд гэмт хэргээ үйлддэг. Хохирогч хүүхдүүд ихэнхдээ 5-17 насныхан байгаа. Хүүхдүүд хэдий хэр хугацаанд хүчирхийлэлд өртсөн төдий чинээгээр сэтгэл санааны гүн хямралд ордог. Хүчирхийлэлд өртсөн хүүхдүүд ирээдүйн амьдралдаа итгэлгүй, зан төлөв нь өөрчлөгддөг, гутранги үзүүлтэй, үүнээс болоод буруу замаар явах, муу үйл хийх зэрэг хор уршиг гардаг. Хүчирхийлэлд өртсөн хүүхдүүд ганц удаа сэтгэл зүйн зөвлөгөө өгөөд зогсохгүй хүүхдийг эдгэн эдгэтэл сэтгэл заслын эмчилгээ хийдэг. Гэхдээ бэлгийн хүчирхийлэлд өртсөн хүүхдийн сэтгэл зүй хуучин шигээ 100 хувь эдгэнэ гэж байхгүй. Хамгийн дээд талдаа 70-80 хувьд хүрч энгийн амьдралдаа шилждэг. Насны онцлог чухал учраас урт хугацааны эмчилгээ хийлгэх шаардлагатай. Бэлгийн хүчирхийллээс гол урьдчилан сэргийлэх нь арга нь ердөө л бага болон өсвөр насны хүүхдэдээ анхаарал, хяналт тавих. Хүүхдээ хараа хяналтгүй орхихгүй байх, хэнд ч найдахгүй байх хэрэгтэй. Мөн ярилцаж, ийм асуудалд өртөж болзошгүй гэдгийг сануулж, авах арга хэмжээг сайтар хэлж өгөх нь зөв” гэсэн юм.

Иймд эцэг, эхчүүд та бүхний насанд хүрээгүй хүүхдэдээ тавих анхаарал хяналтаа сайжруулж, үл хайхрах хүчирхийллээс урьчилан сэргийлэхийг анхааруулж байна.