Импортлогчдын зүгээс шатахууны үнэ чөлөөлөх хүсэлт гаргасантай холбоотойгоор өнөөдөр Шатахууны үнийн зөвлөл хуралдаж, шатахууны үнэ чөлөөлөх шийдвэр гаргажээ.

          Энэ талаар Уул уурхай, хүнд үйлдвэрийн дэд сайд О.Батнайрамдал Засгийн газрын 2021 оны 311 дүгээр тогтоолд заасны дагуу газрын тосны бүтээгдэхүүний бөөний худалдаа эрхлэх тусгай зөвшөөрөл эзэмшигчдийн 2022 оны компанийн нөөцийг бүтээгдэхүүн нэр төрөл, тоо хэмжээгээр бүрдүүлэхэд шаардлагатай хөрөнгийг бага хүүтэй эх үүсвэрээс санхүүжүүлэх асуудлыг Монголбанктай хамтран шийдвэрлэхдээ холбогдох журмаа шинэчлэх, зах зээлийн бодит байдал, үнийн мэдээллийг олон нийтэд сурталчлах зөвлөмжийг гаргасан. Өргөн хэрэглээний АИ-92 шатахууны үнэ зах зээлийн горимд шилжсэнээр дэлхийн олон оронд сайн жишиг болсон зургаан сарын дундаж өртгөөр үнийг нь тооцоолж, автомат үнийн аргачлал руу шилжихээр боллоо. Өөрөөр хэлбэл, зах зээлийн эрэлт нийлүүлэлтээс хамаарч, гадаадаас шатахуун импортолж буй үнийг өнөөдрийнх бус, сүүлийн зургаан сарын дундаж өртгөөр тооцоолох юм. Үнийн бодлогод төр оролцохгүйгээр зах зээлийн үнээ тооцоолно. Нэг удаагийн үнийн өөрчлөлт нийт үнийнхээ таван хувиас хэтрэхгүй буюу одоо жижиглэнгийн үнэ 2050 төгрөг байхад 100 төгрөгөөр хэтэрч нэмэгдэхгүй” гэв.

Мөн арваннэгдүгээр сард ОХУ-аас 48,540 тонн, БНХАУ-аас 14,520 тонн АИ-92 шатахуун татан авахаар баталгаажуулсан бөгөөд татан авалт хэвийн үргэлжилж байгаа тухай мэдээлэл өгсөн юм.