МУГЖ Г.Эрдэнэбилэгийн төрсөн өдөр өнөөдөр тохиож байна. Тэрбээр "Тамгагүй төр" жүжгийн Арчуг хааны дүрийг бүтээж, хэсэгтээ кинонд тоглоогүй байж байгаад энэ намар харин OI энтертайнментийн бүтээл "No Rules-3" киноны Тайширын дүрээр үзэгчидтэйгээ уулзлаа.

       Тайшир төдийгөөс өдий хүртэл бусдын гэсэн бүхнийг хулгайлж, Эрдэс хотын хамгийн том дарга болж, эрх мэдлийг гартаа авсан болохоор өөрийн гэсэн бүхэндээ харам, түүнээс нь булаах гэсэн, хайртай бүхэнд нь гар хүрсэн хэнийг ч өршөөдөггүйгээрээ харгис хэрцгий болсон нэгэн. Тийм ч болохоор харамсалтайгаар төгссөн болов уу.

      Дүрээ ингэж хүний сэтгэл зүрх, тархи, бодлын угт хүртэл тултал бүтээж чадах цөөн Монгол жүжигчдийн нэг бол яах аргагүй Г.Эрдэнэбилэг гэдгийг олон үзэгч хүлээн зөвшөөрдөг. Түүний бүтээсэн "Чиний эзгүйд"-ийн Жаргал, "Би чамд хайртай-2" киноны Хангай, "Бурхан өршөөг"-ийн Мөнхөө, "Сая долларын олз"-ын Эрчимхүү, "Үргээлэг" киноны Хангал тэргүүтэй дүрүүд нь ч үүнийг гэрчилдэг. Мөн тэр моринд хайртай монголчуудынхаа сэтгэлийн хөгийг сэргээсэн "Хийморь" нэрт киног найруулж, олон улсын кино наадамд ч сойж, уралдуулсан. Ингээд харахаар цаг хугацаа өнгөрөх тусам түүний мэргэжлийн ур чадвар, уран бүтээлчийн чанар чансааны жин даац нь улам нэмэгдэж байгаа юм. Эрхэм уран бүтээлчид төрсөн өдрийн мэнд хүргэж, уран бүтээлийн өндөр амжилт хүсье.

        Бид өмнө нь түүний тухай бичиж байсан "ТЭНГЭРИЙН ХҮҮ ХААН БОЛОВ" нийтлэлийг энд дарж уншаарай.